როგორც უკვე ვწერდით, საქართველოს ცხოველთა დაცვის ფედერაციამ, სოციალურ ქსელში, ქალაქ ოზურგეთის მერის, ბეგლარ სიორიძის და ქალაქ ოზურგეთის მუნიციპალიტეტის მერიის უმეთვალყურეოდ დარჩენილი ცხოველების იზოლაციის განყოფილების უფროსის და ინდმეწარმე გოგი მაღლაფერიძის მიმართ ოფიციალურ განცხადება გამოაქვეყნა და მათ წინააღმდეგ არაერთ ბრალდებას გააჟღერა.
"საქართველოს ცხოველთა დაცვის ფედერაციის" მიერ გავრცელებულ ამ ბრალდებებს ქალაქ ოზურგეთის მუნიციპალიტეტის მერიის უმეთვალყურეოდ დარჩენილი ცხოველების იზოლაციის განყოფილების უფროსი და ინდმეწარმე გოგი მაღლაფერიძე პასუხობს:
_ კანონში არ არის გაწერილი, როგორ უნდა დაიჭირო ძაღლი. ეს ყველაფერი მიშვებულია თვითდინებით. ძალიან ბევრი ბრალდება მოდის ბოლო პერიოდში ჩემს მიმართ და საინტერესოა, ჩემი უფლებები არ ირღვევა?! პარლამენტის მიერ დამტკიცებული კანონი ამ საკითხთან დაკავშირებით არ არის დამტკიცებული. 2007 წლიდან ვმუშაობ, ვიჭერდი ძაღლებს და თუ პატრონი გამოუჩნდებოდა, კარანტინის შემდეგ, ვატანდი. თუ ძაღლი ავადმყოფი იყო, ვაძინებდით. ახლა გვეუბნებიან, რომ არცერთი ძაღლი არ მოვკლათ, თუ განსაკუთრებული დაავადება არ ექნება.
_ ვისგან მოდის ეს რჩევა თუ მოთხოვნა?
_ საქართველოს ცხოველთა დაცვის ფედერაციისგან.
_ ეს ოფიციალური მოთხოვნაა?
_ მხოლოდ სიტყვიერად მეუბნებიან. მაგალითად, თქვენს ოფისთან მდებარე ტერიტორიაზე, ახლოს არის ორი ძაღლი, წავიყვანო ახლა უნდა ეს ძაღლები, "ბირკა" გავუკეთო, აცრა ჩავუტარო და დავაბრუნო ისევ ძველ ადგილზე _ ასე ითხოვს ცხოველთა უფლებების დაცვის ფედერაცია.
_ ცხოველთა უფლებების დაცვის ფედერაციაში ამბობენ, რომ თქვენ წელიწადში 1 000 ძაღლზე მეტს იჭერთ. აქედან, მხოლოდ 20-25 ძაღლის ნახვა შეიძლება ძაღლსაშენში, დანარჩენს კლავთ და ორმოში მარხავთ…
_ ეს იმ შემთხვევაში ხდებოდა, თუ ცხოველი მძიმედ არის დაავადებული. ამას მასობრივი ხასიათი არ აქვს. არასამთავრობო ორგანიზაციის წარმომადგენლები ჩვენს საქმიანობას მუდმივ მონიტორინგს უტარებენ.
_ ოზურგეთის მუნიციპალიტეტის სოფელ ბაილეთის და სოფელ ოზურგეთის საზღვარზე არის ძაღლსაშენი, მაგრამ ის არ არის შემოღობილი. ეს პრობლემას არ უქმნის მოსახლეობას?
_ იქ იღობება 1600 კვმ მიწის ნაკვეთი. იქ გავუშვებთ დანომრილ და აცრილ ძაღლებს. ასევე, ახალ შემოყვანილ ძაღლებს ჩაუტარდებათ კარანტინი. შემოღობილში იქნება ეს ძაღლები და არავის არ შეექმნება პრობლემა.
_ ძაღლსაშენის ტერიტორია თქვენი საკუთრებაა?
_ დიახ, მიწის ნაკვეთი ჩემი საკუთრება.
_ ამბობენ, რომ თქვენ საკუთარი ბიზნესი გაქვთ.
_ არანაირი ბიზნესი არ მაქვს. ვარ ინდმეწარმე და კანონიერად ვაწარმოებ ჩემს საქმიანობას.
_ თქვენ ადგილობრივ ხელისუფლებასთან გარიგებაშიც გადანაშაულებენ.
_ ამას ამბობენ ცხოველთა დაცვის ფედერაციის წარმომადგენლები, ვითომ მე ვარ სხვადასხვა მუნიციპალიტეტის გამგეობასთან "შეკრული". ეს ბრალდება, რა თქმა უნდა, სიმართლეს არ შეესაბამება. ისაუბრონ, რა ვქნა… საერთოდ არ ვიცნობ ფოთის მერს, მხოლოდ პლაკატზე მყავს ნანახი. წამაკითხონ კანონი _ საერთოდ მაქვს კი უფლება ქუჩაში გავუშვა ძაღლი? აცრილი ძაღლი გავუშვი და დაეტაკა ერთ კაცს, რომელმაც შემდეგ ფიზიკური შეურაცხყოფა მომაყენა. ფედერაციაში ამბობენ, რომ ძაღლების მკვლელი ვარ. რამდენჯერ ჩაატარეს მონიტორინგი, მაგრამ მსგავსი შემთხვევა არ აქვთ დაფიქსირებული. ძალიან დავიღალე ამდენი უსამართლო ბრალდებებით, _ გვითხრა გოგი მაღლაფერიძემ.
საქართველოს ცხოველთა დაცვის ფედერაციაში ამბობენ, რომ მათ მიმართეს გამგეობას, მერიას, ასევე, საკრებულოს რეკომენდაციით, რომ დანერგილიყო უსახლკარო ცხოველების პოპულაციის მართვის მსოფლიოში აპრობირებული მეთოდი, რაც არის სტერილიზაცია/კასტრაცია, შემდგომ ვაქცინაცია, იდენტიფიკაცია (ანუ ყურზე "ბირკის" გაკეთება) და შემდგომ დაბრუნება მიკედლების ტერიტორიაზე.
"გურია ნიუსი" იმყოფებოდა სოფელ ბაილეთის და სოფელ ოზურგეთის საზღვარზე, სადაც ახალი ძაღლსაშენის მშენებლობა მიმდინარეობს. ადგილზე მისულებს, დაახლოებით, 40-მდე ძაღლი დაგვხდა.
ამავე თემაზე:
ძაღლთა თავშესაფარი თუ სასაკლაო?
საქართველოს ცხოველთა დაცვის ფედერაცია ქალაქ ოზურგეთის მერიას პასუხობს
"ერთად შევაჩეროთ ფულზე გაყიდული ადამიანობა და დავიცვათ ცხოველთა სიცოცხლე!“
