ორგანიზაცია "საქართველოს მოსამართლეთა ერთობის" გამგეობა სასამართლოს ირგვლივ განვითარებული მოვლენების შესახებ განცხადებას ავრცელებს, სადაც აღნიშნულია, რომ საზოგადოება სიფრთხილით უნდა მოეკიდოს ყველა იმ განცხადებას, რომელმაც შეიძლება სასამართლოს დისკრედიტაცია გამოიწვიოს.
როგორც განცხადებაშია აღნიშნული, უკანასკნელ პერიოდში სასამართლოში მიმდინარე მოვლენები და კონკრეტული მოსამართლეები საზოგადოების ყურადღების ცენტრში მოექცნენ. ორგანიზაცია მიესალმება, რომ საზოგადოებრივი კონტროლი მიმდინარე პროცესებზე გაძლიერდა.
"გავრცელდა არაერთი ინფორმაცია სასამართლო სისტემაში შესაძლო კორუფციული დარღვევების შესახებ. დისკუსია გამოიწვია კონკრეტულ მოსამართლეთა მიერ ცალკეულ საქმეებზე მიღებულმა გადაწყვეტილებებმა, ასევე, საქმეთა წარმოების პროცესში განხორციელებულმა საპროცესო მოქმედებამ, რაც საზოგადოების სხვადასხვა სფეროს, მათ შორის იურიდიული საზოგადოების წარმომადგენელთა მხრიდან შეფასდა როგორც შესაძლო კორუფციული სამართალდარღვევა.
აუცილებელია განიმარტოს, რომ კორუფციული სამართალდარღვევა არის ქმედება, რომელიც შეიცავს კორუფციის ნიშნებს. კანონმდებლობის თანახმად, კორუფცია არის თანამდებობის ან მასთან დაკავშირებული შესაძლებლობის გამოყენება კანონით აკრძალული ქონებრივი ან სხვა სიკეთის მიღების მიზნით, აგრეთვე ამ სიკეთის გადაცემა ან მის მიღებასა და დაკანონებაში ხელის შეწყობა. განსაკუთრებული გულისხმიერება და სიფრთხილე სჭირდება მოსამართლის ქმედების შეფასებას, ვინაიდან სასამართლოს ავტორიტეტის დაცვა არის საზოგადოების ნორმალური ფუნქციონირების გარანტი. საზოგადოების ყველა წევრი ვალდებულია პატივი სცეს სასამართლოს ავტორიტეტს და მის დამოუკიდებლობას. სასამართლო ექვემდებარება კრიტიკას და პასუხი უნდა გაეცეს ყველა პრეტენზიას, თუმცა თავად მოსამართლე, წარმოადგენს რა ერთ-ერთ მაღალ საჯარო თანამდებობის პირს, შეზღუდულია გამოხატვის თავისუფლებაში. იგი მოვალეა, ისმინოს კრიტიკა და ამავდროულად, გამოიჩინოს კრიტიკაზე თავშეკავებულობა, თუმცა შეზღუდვის ეს ფარგლები არ გამორიცხავს საზოგადოების, თუ პროცესის მონაწილეთა მხრიდან მოსამართლის მისამართით გამოთქმულ შეფასებებში თავშეკავებულობას.
მოსამართლის გადაწყვეტილება, რომელიც შეიძლება გასაჩივრდეს, პირველ რიგში უნდა დაექვემდებაროს ინსტანციურ კონტროლს და სასამართლო განხილვის მედია სივრცეში გატანა, ე.წ. "მედია სამართალი” არის უკიდურესი ღონისძიება, რომელიც დასაშვებია მაშინ, როცა მხარეებს სხვაგვარად არ მიეცათ უფლებების დაცვის შესაძლებლობა. დამოუკიდებელი მართლმსაჯულების უზრუნველყოფის და სასამართლოს ავტორიტეტის დაცვის საქმეში კიდევ უფრო მეტი პასუხისმგებლობა აკისრიათ იურიდიული საზოგადოების წარმომადგენლებს. საქმეში – "შოპფერი შვედეთის წინააღმდეგ” (1998 წ.) ადამიანის უფლებათა ევროპულმა სასამართლომ მიუთითა, რომ მართლზომიერია იმის მოლოდინი, რომ თავიანთი საქმიანობით ადვოკატები ხელს შეუწყობენ მართლმსაჯულების ჯეროვან განხორციელებასა და ხალხის ნდობის უზრუნველყოფას", _ აღნიშნულია განცხადებაში.
ორგანიზაცია განმარტავს, რომ ვიდრე სათანადო წესით არ დადგინდება მოსამართლის მხრიდან კორუფციული ქმედების ჩადენა, წინმსწრებად შეფასებების გაკეთება არამართებულია.
"საქართველოს მოსამართლეთა ერთობა" მიმართავს ყველას, ვინც მოწოდებულია, ქვეყანაში არსებობდეს ძლიერი და დამოუკიდებელი სასამართლო, მაქსიმალური სიფრთხილით მოეკიდონ ყველა იმ განცხადებას, რამაც შეიძლება გამოიწვიოს სისტემის დისკრედიტაცია.
ნებისმიერი გადაცდომის, ან საეჭვო ფაქტის გამოვლენის შემთხვევაში დაინტერესებულმა პირებმა რეაგირებისთვის უნდა მიმართონ სათანადო უწყებებს. კონკრეტული ფაქტების დადასტურებამდე კი საჯარო შეფასებებმა შესაძლოა, საზოგადოება შეიყვანოს შეცდომაში, რაც საბოლოოდ ზიანს მიაყენებს არა მხოლოდ კონკრეტულ მოსამართლეებს ან სასამართლო სისტემას, არამედ ზოგადად უარყოფითი შედეგის მომტანი იქნება სახელმწიფოსათვის.
"საქართველოს მოსამართლეთა ერთობა" მოწოდებულია, ითანამშრომლოს ადვოკატებთან, ჟურნალისტებთან, საერთაშორისო და საზოგადოებრივ ორგანიზაციებთან და სხვა ნებისმიერ დაინტერესებულ მხარესთან სასამართლო სისტემის გაძლიერების და მის მიმართ ნდობის გაზრდის მიზნით. გამოვთქვამთ მზაობას, რომ თქვენთან ერთად განვიხილოთ გამოვლენილი კონკრეტული შემთხვევები, კომპეტენციის ფარგლებში რეაგირება მოვახდინოთ ნებისმიერ არგუმენტირებულ ფაქტზე და ერთობილვად დავგეგმოთ პრევენციული ხასიათის ღონისძებები.
