ქალაქ ოზურგეთის საკრებულოს დეპუტატი ნათია შარაშიძე ქალაქ ოზურგეთის მერს, ბეგლარ სიორიძეს ქსენოფობიური და შეურაცხმყოფელი განცხადებების გავრცელებაში ადანაშაულებს.
აღნიშნულთან დაკავშირებით მოკვლევის ჩასატარებლად, ნათია შარაშიძემ წერილით უკვე მიმართა სახალხო დამცველის ოფისს.
"გურია ნიუსი" წერილს უცვლელად გთავაზობთ:
"მოგახსენებთ, რომ გახლავართ ქ.ოზურგეთის მუნიციპალიტეტის საკრებულოს წევრი, საკრებულოს წევრად არჩევის და ჩემი მხრიდან ქალაქ ოზურგეთის ადგილობრივი ხელისუფლების მისამართით განსხვავებული აზრის გამოხატვის პირველივე დღეებიდანვე ქ.ოზურგეთის მერის ბეგლარ სიორიძის მხრიდან სიტყვიერი შეურაცხმყოფელი გამონათქვამების და ზეწოლის ადრესატი გავხდი, ზეწოლის ფორმა ბატონ ბეგლარს სხვადასხვანაირი აქვს: მათ შორის ერთ–ერთი იყო მერიის თანამშრომლების დახმარებით ჩემთვის საკრებულოს სხდომაზე ჩემი ნების საწინააღმდეგოდ თავისუფლების შეზღუდვა, ლანძღვა. ყოველივე ამას ხშირად ვაპროტესტებდი როგორც საგაზეთო სტატიებში, ისე სატელევიზიო გამოსვლებში, შემდეგ იყო ამომრჩევლების თანდასწრებით, მაღალჩიონოსნების მხრიდან სიტყვიერი შეურაცხყოფა, რაც საპროტესტო აქციით გავაპროტესტე და მოვითხოვე, რომ ვინმეს მაინც მოეთხოვა პასუხი თავგასული თანამდებობის პირებისთვის, რეაქცია დღემდე არავისგან არ ყოფილა, არც არავინ დასჯილა ამდენი შეურაცხყოფის და დამცირების გამო.
დაუსჯელობის სინდრომით გათამამებულმა ადგილობრივი ხელისუფლებამ ზღვარი დაკარგა და მათი მხრიდან ჩემი მისამართით დამცირებამ და შეურაცხყოფამ პერმანენტულად ხშირი ხასიათი მიიღო, ასე მოხდა მიმდინარე წლის 3 ივნისსაც, საკრებულოს სხდომაზე, სადაც ქალაქ ოზურგეთის მერმა ბეგლარ სიორიძემ ჯერ შუბლძარღვგაწყვეტილი მიწოდა, შემდეგ უწიგნური და ბოლოს ჩემი დამცირების მიზნით დამამცირებელ კონტექსტში მოიხსენია ჩემი ოჯახის წევრი (ამ შემთხვევაში მეუღლე) ციტატა: "აი, ვერ გებულობ ქართულს, თურქულად მოისმინე, თურქულად და გაიგებ, საქმე იმაშია, რომ ჩემი მეუღლე გახლავთ თურქეთში მცხოვრები ქართველი, დაიბადა და გაიზარდა თურქეთში და ქართულ ენას ცუდად ფლობს, სწორედ ეს მიზეზი გახლდათ ქალაქ ოზურგეთის მერის მხრიდან დაცინვის კონტექსტში ნათქვამი ფრაზის მიზეზი, ეს რომ ნამდვილად ასეა ადასტურებს იმავე დღეს მის მიერ გაკეთებული კომენტარი ვიცი, რომ მისი მეუღლე თურქული წარმომავლობისაა და იქნებ მეუღლის მშობლიურ ენაზე მაინც წაიკითხოს ის, რაც მისთვის ქართულად გაუგებარია. ქალბატონი ნათია რომ ინგლისური ენის სპეციალისტი ყოფილიყო, მაშინ ინგლისურზე მივუთითებდი.
სადაც ადასტურებს, რატომაც თქვა ის რაც თქვა, მან ხაზი გაუსვა ჩემი ოჯახის წევრის ამ შემთხვევაში მეუღლის არაქართულ წარმომავლობას და შეეცადა ამით დავემცირებინე ჩემი კოლეგებისა და გარშემომყოფთა ირგვლივ, ქალაქის მერის გამონათქვამი აშკარად შეიცავდა ქსენოფობიურ შინაარსს და დამამცირებელი იყო, ჩემთვის როგორც ქალისთვის, რომელსაც ჰყავს მეუღლე რომელიც არ დაბადებულა და არ გაზრდილა საქართველოში. თუნდაც იყოს ეთნიკურად თურქი 21-ე საუკუნეში ვფიქრობ ეთნიკურობის ხაზგასმა არ უნდა ხდებოდეს და მითუმეტეს არ უნდა ხდებოდეს ამ ფორმით დამცირება საჯარო მოხელის მხრიდან საკრებულოს წევრზე. ყოველივე ზემოთქმულიდან გამომდინარე, გთხოვთ მიიღოთ ჩემი განცხადება შეისწავლოთ და მოახდინოთ სათანადო რეაგირება"_ აღნიშნულია განცხადებაში, რომელიც შარაშიძემ სახალხო დამცველის ოფისს 9 ივნისს გაუგზავნა.
შარაშიძის მიერ ომბუდსმენისთვის გაგზავნილ განცხადებას თან ერთვის ვიდეოჩანაწერები.
შეგახსენებთ, რომ ქალაქ ოზურგეთის საკრებულოს დეპუტატის ნათია შარაშენიძის ბრალდებებს ბეგლარ სიორიძემ რამდენიმე დღის წინ უპასუხა.
ოზურგეთის მერიის მიერ "გურია ნიუსისთვის" გამოგზავნილ საპასუხო წერილში აღნიშნულია, რომ ნათია შარაშენიძის ნებისმიერი ბრალდება, რომელიც მას ქალაქ ოზურგეთის მუნიციპალიტეტის მერიისა და მერის მიმართ აქვს, ყოველთვის უსაფუძვლოა.
"მე ფაქტის კონსტანტაცია მოვახდინე, რადგან ის მატყუარაა. გამომდინარე იქედან, რომ ჩვენ ნათია შარაშენიძეს შავით თეთრზე დაწერილი ფაქტებით ვუმტკიცებთ სიმართლეს, ამის აღიარება მას მაინც არ შეუძლია. სწორედ ამას მოჰყვა ჩემი რეპლიკა ქართულსა და თურქულთან დაკავშირებით. ვიცი, რომ მისი მეუღლე თურქული წარმომავლობისაა და იქნებ, მეუღლის მშობლიურ ენაზე მაინც წაიკითხოს ის, რაც მისთვის ქართულად გაუგებარია. ქალბატონი ნათია რომ ინგლისური ენის სპეციალისტი ყოფილიყო, მაშინ ინგლისურზე მივუთითებდი. შესაბამისად, ეს არ ყოფილა ჰომოფობიური მიზნით განპირობებული რეპლიკა. მე პატივს ვცემ და აბსოლუტურად თანასწორად განვიხილავ ყველა ერის წარმომადგენელს", _ აღნიშნულია განცხადებაში.
ამავე თემაზე:
