“ბუნებრივია, ერთიან ცენტრალიზებულ სისტემას გარკვეული “სუსტი” მხარეებიც გააჩნია”

2015 წლის 1 იანვრიდან, ყველა დონის ბიუჯეტი, გარდა საგანმანათლებლო დაწესებულებებისა, სახაზინო მომსახურებაზე გადავიდა.

ექსპერტი ეკონომიკურ საკითხებში, ლევან კალანდაძე "გურია ნიუსთან" საუბრის დროს ამბობს, რომ სახაზინო მომსახურებაზე გადასვლა, პრაქტიკულად, ნიშნავს, რომ საჯარო ფინანსები და მათთან დაკავშირებული ყველა ფინანსური ოპერაცია (იგულისხმება, როგორც სამინისტროები და სხვა სახელმწიფო უწყებები, ადგილობრივი თვითმმართველობები და ყველა სიპ-ი თუ სახელმწიფოს მიერ დაფუძნებული სხვა ორგანიზაციულ-სამართლებრივი ფორმის იურიდიული პირი) ერთიან სახაზინო ანგარიშსწორების სისტემაში ექცევა: "ბუნებრივია, ეს ლოგიკურიცაა _ სახელმწიფო, ანუ საჯარო ფინანსების აღრიცხვა-ანგარიშგება და, შესაბამისად, ფინანსური ტრანზაქციები ერთიანი ცენტრალიზებული სახელმწიფო სისტემის ნაწილი უნდა იყოს და ამ მხრივ, რაიმე განსხვავებული მოსაზრება არ მაქვს. სისტემა სწორად არის დალაგებული.

ბუნებრივია, ერთიან ცენტრალიზებულ სისტემას გარკვეული "სუსტი" მხარეებიც გააჩნია. მაგალითად, ფინანსური ნაკადების მართვის დამოუკიდებლობის ერთგვარი შეზღუდული სისტემა. მხარჯველი დაწესებულებები ყველა ტრანზაქციას ხაზინის ანგარიშების მეშვეობით ახორციელებენ და არა დამოუკიდებლად საბანკო არხების მეშვეობით, როგორც წარსულში იყო. მაგრამ, თუ გავითვალისწინებთ, რომ ამ შემთხვევაში, საქმე არა კერძო თანხებთან და ფინანსებთან, არამედ საჯარო ფინანსების მართვასა და საჯარო ფინანსების აღრიცხვა-ანგარიშგებასთან გვაქვს, ეს, ერთი შეხედვით ტექნიკური ხასიათის "უხერხულობა", აუცილებელ პროცედურულ ნორმად უნდა ჩაითვალოს."

ოზურგეთის, ლანჩხუთის და ჩოხატაურის მუნიციპალიტეტის გამგეობებში გვითხრეს, რომ სახელმწიფო ხაზინის ელექტრონული მომსახურების სისტემაზე გადასვლამ პირველ ეტაპზე გამოიწვია პრობლემები, მაგრამ კონკრეტულად ამის შესახებ არ საუბრობენ.

"გურია ნიუსი" ამ საკითხთან დაკავშირებით 2015 წლის 23 იანვარს წერდა, რომ: უკვე 23-ე დღეა თვითმმართველობის ბიუჯეტი უმოქმედოა. გადაუხდელი თანხები, შეჩერებული გადარიცხვები და ხელფასების მომლოდინე ადამიანები _ ეს ის რეალობაა, რომელიც ბიუჯეტების სახაზინო მომსახურებაზე გადასვლას მოჰყვა.

1 იანვრიდან ყველა დონის ბიუჯეტი, გარდა საგანმანათლებლო დაწესებულებებისა, სახაზინო მომსახურებაზე გადავიდა.

ფინანსთა მინისტრმა ნოდარ ხადურმა ამ ინფორმაციის გაჟღერებისას აღნიშნა, რომ "ეს სამინისტროს საშუალებას მისცემს სტატისტიკურად და ინფორმაციულად ჰქონდეს წვდომა, თუ რა ხდება საჯარო ფინანსების მართვის კუთხით. აქამდე ზოგიერთს ჰქონდა კომერციულ ბანკებში, ზოგს _ ხაზინაში, ახლა მოხდება კონსოლიდაცია, რაც ჩვენ საშუალებას მოგვცემს, სტატისტიკურად და ინფორმაციულად გვქონდეს ონლაინ წვდომა, რა მდგომარეობაა საჯარო ფინანსების მართვის თვალსაზრისით. სრულად დაინერგება საჯარო ფინანსების მართვის ევროპული სისტემა. ეს იქნება არაკონტროლი, არამედ აღრიცხვიანობა. თავისთავად, ცხადია, რომ თითოეული თვითმმართველობის ბიუჯეტს ადგილობრივი თვითმმართველობის არჩეული ორგანო, საკრებულო აკონტროლებს", _ ამბობდა ხადური.

ოზურგეთის მუნიციპალიტეტის გამგეობის საფინანსო-საბიუჯეტო სამსახურის უფროსი გია მამაკაიშვილი ამბობს, რომ, როგორც ყველა ინოვაციას, თავდაპირველად ახლდა სირთულეები, თუმცა, მუნიციპალიტეტი მომზადებული შეხვდა ამ სიახლეს:

_ საფინანსო-საბიუჯეტო სამსახურის თანამშრომლებმა ფინანსთა სამინისტროში სპეციალური ტრენინგები გაიარეს. ხაზინის მომსახურებაზე მყოფი ორგანიზაციები ეტაპობრივად გადავიდნენ ახალი ტიპის სისტემაზე.

ერთიანი სახაზინო პროგრამის დანერგვამ მნიშვნელოვნად გაამარტივა და დააჩქარა საფინანსო ოპერაციების წარმოება. ახალ სისტემაზე გადასვლის შედეგად საბიუჯეტო სახსრების მართვის პროცესში გაუქმდა ქაღალდის დოკუმენტების მოძრაობა მხარჯავ ორგანიზაციებსა და სახაზინო სამსახურს შორის, რამაც გამოიწვია დროისა და ფინანსური რესურსების მნიშვნელოვანი დაზოგვა, გაიზარდა პროცესების გამჭვირვალობის ხარისხი.

აღნიშნული პროგრამით ფინანსთა სამინისტრო ჩვენ მიერ გახორციელებული საფინანსო ოპერაციების კონტროლს აწარმოებს. ასევე, პროგრამულად ხდება შეცდომების პრევენცია.

ამ პროგრამის მეშვეობით ფინანსთა სამინისტრო, ქვეყნის მასშტაბით, ფულადი სახსრების მოძრაობის ყოველდღიურ ბალანსს აფიქსირებს, _ თქვა გია მამაკაიშვილმა.

ლანჩხუთის მუნიციპალიტეტის საფინანსო, საბიუჯეტო და მუნიციპალური შესყიდვების საბიუჯეტო განყოფილების უფროსი ნინო კიკვაძე ამბობს, რომ სახაზინო წარმოებაზე გადასვლის პირველ თვეს, სისტემის გამო, იყო გარკვეული შეფერხებები, თუმცა, შემდეგ გაიმართა სისტემა და ეს შეფერხებები ძალიან მალე აღმოიფხვრა. რაც შეეხება უპირატესობას, სახაზინოზე გადასვლის უპირატესობა არის ის, რომ ელექტრონულად ხდება დოკუმენტბრუნვა.

ჩოხატაურის მუნიციპალიტეტის გამგეობის საფინანსო და მუნიციპალური შესყიდვების სამსახურის უფროსს გელა ლომინეიშვილს საბიუჯეტო სისტემის სახაზინო მომსახურებაზე გადასვლა დადებითად მიაჩნია:

_ საბიუჯეტო სახსრების ხარჯვის კონტროლის მექანიზმები კიდევ უფრო მეტად დაიხვეწა, შესაბამისად, დაგეგმილ ბიუჯეტში შემოსულობებისა და ხარჯვითი ნაწილების აღრიცხვა და გამიჯვნა მოხდა, რაც იძლევა საშუალებას, წლის განმავლობაში ვაკონტროლოთ ბიუჯეტის სახსრების მიზნობრივი, მიზანშეწონილი და ეფექტიანი გამოყენება, _ გვითხრა გელა ლომინეიშვილმა.