"სახელმწიფო უსაფრთხოების სამსახურის შესახებ" კანონპროექტი დღეს პარლამენტის პლენარული სხდომაზე განიხილეს, რომლის პირველ 21 მუხლზე, პარლამენტის წევრებმა, გუშინდელ სხდომაზე, მეორე მოსმენით უკვე იმსჯელეს.
დეპუტატებმა შეკითხვები კანონპროექტის თაობაზე მომხსენებელს, შინაგან საქმეთა მინისტრის მოადგილეს, ლევან იზორიას იმ მუხლთან დაკავშირებით დაუსვეს, რომელიც სახელწმიფო უსაფრთხოების რეჟიმის უზრუნველყოფას, ცეცხლსასროლი იარაღის გამოყენების უფლებას, სამსახურში სამუშაოდ მიღების წესს, მოსამსახურის სოციალურ დაცვასა და გარდამავალ დებულებებს შეეხება.
იურიდულ საკითხთა კომიტეტის თავმჯდომარის, ვახტანგ ხმალაძის განცხადებით, პირველი მოსმენის შემდეგ ინიციატორებთან ინტენსიური კონსულტაციები მიმდინარეობდა, რის შედეგადაც კანონპროექტი მნიშვნელოვნად გადამუშავდა.
"თუ მაშინ შეგვეძლო გვეთქვა, რომ უსაფრთხოების სამსახურის გამოყოფა შინაგან საქმეთა სამინისტროდან ეს არის ტექნიკური გამოყოფა და რაიმე სხვა ცვლილება აქ არ არის, დღეს მე სრული პასუხისმგებლობით ვაცხადებ, რომ ეს არის არა მხოლოდ ტექნიკური გამოყოფა, არამედ, ეს არის თვისობრივად ახალი სამსახურის შექმნა. რასაკვირველია, ამის შემდეგაც საჭირო იქნება გაგრძელდეს მუშაობა ამ მიმართულებით", _ განაცხადა ვახტანგ ხმალაძემ.
მან ყურადღება გაამახვილა იმ საკითხებზე, რის გამოც მისი აზრით, სხდომაზე წარმოდგენილი რედაქცია არის თვისობრივად ახალი კანონი.
"პირველი – ეს არის უფლებამოსილებათა ნაწილში უფრო მკაფიო ფორმულირებები, რომელიც ამ სამსახურს აქცევს მკაფიო განსაზღვრულ ჩარჩოებში. მეორე – ეს არის ამ სამსახურის ურთიერთობა სხვა სახელმწიფო ორგანოებთან, თუ კერძო სამართლის იურიდიულ პირებთან. აქ საქმე ეხება ე. წ. ოდეერების ინსტიტუტს. მიდგომა, რომელიც ახლა წარმოგიდგინათ ლევან იზორიამ, არის ასეთი, მთავრობა განსაზღვრავს თავისი დადგენილებით, რომელია სახელმწიფო უსაფრთხოებისთვის მაღალი რისკის მქონე ობიექტები და ეს დოკუმენტი იქნება ღია და ყველას ექნება საშუალება, შეაფასოს, არის თუ არა ესა თუ ის ობიექტი ამ სიაში სწორად შეყვანილი", _ აღნიშნა იურიდული საკითხთა კომიტეტის თავმჯდომარემ.
ფრაქცია "ერთიანი ნაციონალური მოძრაობის" წევრის, ჩიორა თაქთაქიშვილის განცხადებით, კანონის პროექტში არის დადებითი სიახლეები, თუმცა გარკვეული მნიშვნელოვანი საკითხები კვლავ პრობლემურად რჩება.
"არის საკითხები, რომელიც კანონით არ იყო განსაზღვრული და ახლა იქნება განსაზღვრული უშიშროების და უსაფრთხოების სფეროში, რაც არის დადებითი ტენდენცია, მაგრამ ასევე შეუძლებელია კმაყოფილი ვიყოთ იმით, რომ მხოლოდ კანონში წერია რაღაც, თუკი, არ გვეცოდინება რა არის ამ ჩანაწერების შინაარსი. მთავარი პრობლემა, რომელიც უშიშროების სამსახურის ფუნქციონირებას უკავშირდებოდა და საბჭოთა გადმონაშთს წარმოადგენდა, იყო მისი ჩარევა ყველა სფეროში, აბსოლუტურად დაურეგულირებლად, ყოველგვარი საზოგადოებრივი კონტროლის გარეშე. პრობლემას წარმოადგენდა აგრეთვე საყოველთაო მოსმენების სისტემა. სამწუხარო რეალობაა, რომ ამ კანონის მიღებით, არც ერთ ამ გამოწვევაზე პასუხი არ არის ჩვენთვის მისაღები", _ აღნიშნა ჩიორა თაქთაქიშვილმა.
მისივე თქმით, ფრაქცია კანონპროექტს მხარს არ დაუჭერს.
ფრაქცია "თავისუფალი დემოკრატების" წევრის, ზურაბ აბაშიძის განცხადებით, "ქართული ოცნების" წინაასაარჩევნო დაპირება იყო, რომ შინაგან საქმეთა სამინისტრო გაიყოფოდა და უსაფრთხოების სამსახური და შსს ცალ-ცალკე სტრუქტურებად ჩამოყალიბდებოდნენ.
მისი შეფასებით, შეიძლება ითვქვას, რომ ეს დაპირება სრულდება, თუმცა, ეს გადაწყვეტილება არ არის გააზრებული და სიღრმისეული. ზურაბ აბაშიძის თქმით, ის, რომ ეს სამსახური არ უნდა იყოს პოლიტიკური დევნის, პოლიტიკური შანტაჟის და პოლიტიკური ზეწოლის მექანიზმი, მხოლოდ პათოსის დონეზე რჩება. მისი განცხადებით, არაფერი იცვლება მოსმენებთან დაკავშირებითაც, უბრალოდ მოსმენებს განახორცილებს არა შინაგან საქმეთა სამინისტრო, არამდე უსაფრთხოების სამსახური. ზურაბ აბაშიძემ აღნიშნა, რომ ამ მიზეზების გამო ფრაქცია "თავისუფალი დემოკრატები" კანონის პროექტს მხარს არ დაუჭერეს.
ფრაქცია "ქართული ოცნება – რესპუბლიკელების" თავმჯდომარის მოადგილის, თამარ კორძაიას შეფასებით:
"ეს კანონი არის პირველი ნაბიჯი იმისთვის, რომ საქართველოს საზოგადოებამ გააზრებულად თქვას უარი და გააზრებულად დაემშვიდობოს საბჭოთა წაარსულს, საბჭოთა მემკვიდრეობას და პოლიციურ მმართველობას", _ აღნიშნა კორძაიამ.
თამარ კორძაიამ აღნიშნა, რომ ძალიან რთულია მოისმინო განცხადებები ამ კანონის შესახებ, რომ თითქოს ის არ არის წინგადაგმული ნაბიჯი იმ ხალხისგან, ვისაც "ოდეერებზე" არასდროს სიტყვა არ დასცდენია და საერთოდ, ეს თემა მათთვის აქტუალური არ ყოფილა დღემდე.
პარლამენტის წევრები "სახელმწიფო უსაფრთხოების სამსახურის შესახებ" კანონპროექტის თანმდევი პროექტების განხილვას პლენარულ სხდომის შესვენების შემდეგ გააგრძელებენ.
