სტრასბურგის სასამართლომ რუსეთს საქართველოს პოზიციაზე არგუმენტების წარდგენისათვის ვადად 2015 წლის 9 ოქტომბერი განუსაზღვრა.
იუსტიციის სამინისტროს ინფორმაციით, 2015 წლის 8 ივლისს, სტრასბურგის სასამართლომ საქართველოს იუსტიციის სამინისტროს ოფიციალურად დაუდასტურა საქართველო რუსეთის წინააღმდეგ (I) საქმეზე მიმდინარე წლის 2 ივლისს ქართული მხარის მიერ წარდგენილი კომპენსაციის მოთხოვნის ამსახველი დოკუმენტის მიღება.
"როგორც სასამართლოს წერილიდან ირკვევა, საქართველოს პოზიციის ამსახველი დოკუმენტი კომენტარებისათვის სტრასბურგის სასამართლომ რუსეთის ფედერაციას 8 ივლისს გადაუგზავნა სასამართლოს რეგლამენტით გათვალისწინებული პროცედურის შესაბამისად. საქართველოს პოზიციაზე შეპასუხების ვადად ევროპულმა სასამართლომ რუსეთს 2015 წლის 9 ოქტომბერი განუსაზღვრა", _ ნათქვამია იუსტიციის სამინისტროს მიერ გავრცელებულ ინფორმაციაში.
შეგახსენებთ, რომ 2014 წლის 3 ივლისს სტრასბურგის სასამართლომ საქართველოს სასარგებლოდ გამოიტანა ვერდიქტი სახელმწიფოთაშორის დავაზე "საქართველო რუსეთის წინააღმდეგ", რომელიც 2006 წელს რუსეთიდან ქართველების მასობრივ გაძევებას უკავშირდებოდა. სასამართლომ დაადგინა, რომ რუსეთმა 2006 წელს დაარღვია ევროპული კონვენციის არაერთი მუხლი. გადაწყვეტილებაში ნათქვამია, რომ რუსეთის მხრიდან ადგილი ჰქონდა კოორდინირებულ პოლიტიკას ქართველების წინააღმდეგ დაკავებისას, დაპატიმრებისას და მასობრივად ქვეყნიდან გამოძევებისას და, შესაბამისად, დაირღვა ადამიანის უფლებათა ევროპული კონვენციის მე-4 ოქმის მე-4 მუხლი. დაკავებისა და დაპატიმრების დროს ქართველები დამამცირებელ და არაადამიანურ პირობებში იმყოფებოდნენ, რითაც დაირღვა მე-3 და მე-5 მუხლები. შესაბამისად, რუსეთს აქვს სამართლებრივი ვალდებულება, კომპენსაცია გადაუხადოს საქართველოს მისი მოქალაქეების უფლებების დარღვევისთვის.
კომპენსაციის ოდენობაზე შესათანხმებლად საქართველოს და რუსეთის იუსტიციის სამინისტროებს 12-თვიანი ვადა მიეცათ, რაც უკვე ამოწურულია.
2015 წლის 6 ივლისის მონაცემებით, საქართველოს ოფიციალური მოსკოვისთვის კომპენსაცია არ მოუთხოვია, _ ამის შესახებ რუსული მედიასაშუალებები რუსეთის იუსტიციის მინისტრზე დაყრდნობით წერენ.
კრემლის განცხადებით, 2006 წელს საქართველოს მოქალაქეების მასობრივი დეპორტაციის გამო მორალური ზიანის კომპენსაციისთვის, ოფიციალურ თბილისს რუსეთისთვის არ მიუმართავს.
ოფიციალური მოსკოვის განცხადებით, ისინი კომპენსაციაზე თავიანთ პოზიციას მხოლოდ მას შემდეგ დააფიქსირებენ, რაც სტრასბურგის ადამიანის უფლებათა სასამართლო რუსეთს ქართული მხარის მოთხოვნებს გადასცემს.
შეგახსენებთ, რომ საქართველოს იუსტიციის სამინისტრომ 2 ივლისს განცხადება გაავრცელა, რომ 2006 წლის შემოდგომაზე რუსეთის ფედერაციიდან კოლექტიურად გამოძევებული ქართველების დარღვეული უფლებების აღდგენის მიზნით სტრასბურგის სასამართლოში საქართველოს პოზიციის ამსახველი დოკუმენტი წარადგინა და 70 320 000 ევროს ოდენობის კომპენსაცია მოითხოვა.
