პირველი ავტომობილი ვლადიმირ პუტინს ჯერ კიდევ უნივერსიტეტში სწავლის დროს ჰყავდა. ეს იყო"ზაპოროჟეცის" მარკის ავტომობილი, რომელიც მისმა დედამ სამმანეთიან ლატარიაში მოიგო. ოჯახმა გადაწყვიტა, არ გაეყიდა მანქანა და ის წარჩინებულ სტუდენტს, ვოვა პუტინს აჩუქეს. ისტორიკოს როი მედვედევის მტკიცებით, რომელსაც რამდენიმე წიგნი აქვს დაწერილი პუტინის ცხოვრებაზე, რუსეთის პრეზიდენტს ძალიან უყვარს ავტომობილის მართვა, მაგრამ სახალხოდ ამას იშვიათად აკეთებს, რათა პროტოკოლი არ დაარღვიოს. თუმცა, პერიოდულად იგი ჯდება საჭესთან და თავისი რეზიდენციის გარშემო, ნოვო-ოგარიოვოში სპეციალურად მოწყობილ სარბოლო ტრასებზე სეირნობს.
1997 წლის ზაფხულში ვლადიმირ პუტინმა გაიცნო ბორის ელცინი, რომელმაც ერთი წლის შემდეგ ის "ეფესბეს" დირექტორად დანიშნა, 1999 წელს კი, პუტინი პრემიერის თანამდებობაზე წარადგინა და თავის ფაქტობრივ მემკვიდრედ აქცია. რუსეთში მუსირებს ორი ვერსია.
ერთის თანახმად, პუტინის გაპრემიერებას ანატოლი ჩუბაისი ლობირებდა, ხოლო მეორე ვერსიით მისი დანიშვნა ბორის ბერეზოვსკის უშუალო ჩარევით მოხერხდა. თანამდებობის დატოვებამდე ორი კვირით ადრე ელცინმა პუტინს თავისი გადადგომის და მართვის სადავეების მისთვის გადაცემის შესახებ ამცნო.
1999 წლის 31 დეკემბერს ბორის ელცინი გადადგა, ხოლო პუტინი პრეზიდენტის მოვალეობის შემსრულებელი გახდა. კრემლთან დაახლოებულ წყაროებზე დაყრდნობით, არსებობს ვერსია, რომ ელცინსა და პუტინს შორის გაფორმდა არაოფიციალური, საიდუმლო ხელშეკრულება, რომლის თანახმად, პუტინი ვალდებულებას იღებდა, რომ ელცინის ოჯახის წევრები და დაახლოებული პირები ხელშეუხებელნი იქნებოდნენ ახალი რეჟიმის მოსვლის შემდეგ.
ცნობილია ვლადიმირ პუტინის დღის განაწესი: იგი დილის 10 საათზე იღვიძებს და იძინებს ღამის 2 საათზე. დღეს იწყებს და ამთავრებს აუზზე, სადაც 30-30 წუთს ცურავს. კრემლში ის შუადღეს ჩნდება. მისი კაბინეტი სენატის შენობაში მდებარეობს, სტალინისა და ელცინის კაბინეტების გვერდით. პუტინი კრემლში სადილობს, იქვე არის სპეციალურად მისთვის მოწყობილი ღვინის მარანი, სადაც ესპანეთიდან ჩამოტანილი წითელი ღვინო ინახება.
პუტინს აქვს ერთი არაჩვეულებრივი ახირება: პოლიტიკური კარიერის განმავლობაში მას არაერთ თანამდებობაზე უმუშავია, ხშირად გამოუცვლია სამუშაო კაბინეტები და სწორედ კაბინეტებს უკავშირდება მისი ახირება: იგი არასდროს არ ახდენდა გარდაქმნებს, კაბინეტში ყველაფერი ისე რჩებოდა, როგორც ეს მისი წინამორბედის დროს იყო. პუტინი არათუ ავეჯს, სამუშაო მაგიდასა და სავარძელსაც კი ძველს ტოვებდა.
პუტინის გარემოცვის წევრების თქმით, ვლადიმირ პუტინი საკუთარ თავში ჩაკეტილი ადამიანია და მთელი სიცოცხლის განმავლობაში მას ერთი ახლო მეგობარი ჰყავდა, რომელიც მის თვალწინ დაიღუპა. პუტინმა, იმ დროს უკვე სპორტის ოსტატმა სამბოში, თავისი მეგობარი სამბოს სექციაში ჩაწერა, ერთ-ერთ ვარჯიშზე მისი მეგობარი ცუდად დაეცა და ხერხემალი დაიზიანა, რამდენიმე საათის შემდეგ კი საავადმყოფოში გარდაიცვალა. ეს ყველაფერი პუტინის თვალწინ მოხდა. თვითმხილველთა თქმით, ამან პუტინზე ძალიან იმოქმედა და მას შემდეგ მას ახლო მეგობარი არ ჰყოლია.
