"ერთიანი ნაციონალური მოძრაობა" ე.წ. საზღვრის აღმნიშვნელი ბარერების დადგმას ეხმაურება და აცხადებს, რომ აღნიშნული ქმედება საქართველოს მთავრობის არასწორი პოლიტიკის ბრალია.
"საქართველოს საზოგადოებას კარგად ახსოვს, რომ ქვეყნის ეკონომიკური მდგომარეობის გაუმჯობესებასთან ერთად, ბიძინა ივანიშვილის ერთ-ერთი მთავარი წინასაარჩევნო დაპირება რუსეთთან ურთიერთობების "დალაგება" და გაუმჯობესება იყო. აშკარაა, რომ მისი მმართველობის სამი წლის თავზე, ყველა სხვა დაპირებასთან ერთად, ვითარება ამ დაპირების კონტექსტშიც არა თუ გაუმჯობესებული, არამედ მნიშვნელოვნად გაუარესებულია.
რუსეთის საოკუპაციო ძალები აგრძელებენ საოკუპაციო ხაზის გადმოწევას საქართველოს არაოკუპირებული ტერიტორიის სიღრმეში. ამჯერად პირდაპირი საფრთხე შეექმნა ბაქო-სუფსის ნავთობსადენს. პოტენციურად საფრთხე შეიძლება დაერმუქროს საკვანძო სატრანსპორტო მაგისტრალს. ამ ფონზე მომხდარზე მთავრობის რეაქცია განსაკუთრებით საგანგაშოა. შემაშფოთებელია მინისტრ ზაქარეიშვილის აბსურდული განცხადება, რომ რუსეთის ნაბიჯი "ოკუპაციის კანონის ფარგლებში ჯდება," თავდაცვის მინისტრის განცხადება რომ "ამაში განსაკუთრებული არაფერია," ვიცე-პრემიერ კალაძის მოწოდება გაუგებარი ახალი ფორმატის შექმნის აუცილებლობასთან დაკავშირებით (მაშინ როცა საგარეო საქმეთა სამინისტრომ უარყო ამ მიმართულებით რაიმე დისკუსიის არსებობა). მსგავსი განცხადებების სერია დააგვირგვინა პრემიერ-მინისტრის გამაოგნებელმა მოწოდებამ რომ "რუსები ყურადღებას მიაქცევენ" და თავად აღკვეთავენ საკუთარ ქმედებებს. ამგვარი რეაქცია კიდევ ერთხელ გვაჩვენებს არა მარტო იმას რომ მთავრობის შიგნით არ არსებობს არც კოორდინაცია და არც მინიმალური კომპეტენცია, არამედ იმასაც რომ ივანიშვილის გუნდს საერთოდ არ შესწევს უნარი მსგავს გამოწვევებზე სერიოზულად იმუშაოს.
რუსეთის აგრესიულ ქმედებები წაახალისა საქართველოს მთავრობის მხრიდან ოკუპანტ სახელმწიფოზე ეფექტიანი საერთაშორისო დიპლომატიური ზეწოლის ფაქტიურმა მოხსნამ. ამასთან, ნეგატიური ფონი გაამძაფრა ოკუპირებული ტერიტორიის მიმდებარედ განლაგებული საპოლიციო დანაყოების და სპეციალური დანიშნულების რაზმების ფაქტიურმა დაშლამ, რითაც მთავრობამ მნიშვნელოვანი პრევენციული ფაქტორი მოშალა", _ აღნიშნავენ პარტიაში.
მათივე განცხადევით, შექმნილ ვითარებაში ერთადერთი გამოსავალი, მტავრობის პოლიტიკის შეცვლაა.
"ივანიშვილის ხელისუფლებიდან არჩევნების გზით ჩამოცილებამდე, აუცილებელია კარდინალურად შეიცვალოს ივანიშვილის მთავრობის პოლიტიკა. ჩვენი ამოცანაა თავიდან ავიცილოთ ქვეყნისთვის სახიფათო ნებისმიერი გართულება, მაგრამ სწორედ ამ ამოცანის მისაღწევად აუცილებელია ადექვატური რეაგირება. წინააღმდეგ შემთხვევაში ვითარება ისეთ სახიფათო ზღვარს შეიძლება მიუახლოვდეს რომ სერიოზული გამწვავების თავიდან არიდება შეუძლებელი გახდება.
კარასინი-აბაშძის ფორმატმა, რომელიც მთავრობის მიერ საკუთარი პიარის და არარსებული პროგრესის ტირაჟირებისთვის იქნა გამოყენებული, მოადუნა საერთაშორისო ყურადღება და რუსეთის აგრესიულ ნაბიჯებზე რეაგირება შეასუსტა. აუცილებელია სრული ფოკუსირება ჟენევის ფორმატზე რომელსაც შუამავლის სტატუსით ესწრებიან ევროკავშირი და აშშ.
ასევე აუცილებელია ამ პრობლემის აქტუალიზაცია ყველა საერთაშორისო ფორმატში და ქვეყნის შიგნით პოლიციური დანაყოფების გაძლიერება ადგილზე რათა მათ, საერთაშორისო ზეწოლასთან ერთად, შეასრულონ ამ ტიპის პროვოკაციების შემაკავებელი როლი", _ აღნიშნავენ პარტიაში.
შეგახსენებთ, რომ პრემიერ-მინისტრმა ირაკლი ღარიბაშვილმა საოკუპაციო ხაზთან ე.წ. საზღვრის აღმნიშვნელი ბანერების აღმართვას პროვოკაცია უწოდა და განაცხადა, რომ , "მთავრობამ იცის, რა უნდა გააკეთოს და პანიკა საჭირო არ არის".
"მინდა, ყველას სიმშვიდისკენ მოგიწოდოთ. საჭირო არ არის ზედმეტი აჟიოტაჟი და პანიკა. მთავრობამ იცის, რა უნდა გააკეთოს. მთავრობამ იცოდა, რას აკეთებდა და ჩვენ მიზანმიმართულად, თანმიმდევრულად მივყვებით ჩვენს გზას. ჩვენ მშვიდად, მაგრამ პრინციპულად და მტკიცედ უნდა გამოვიყენოთ ყველა საერთაშორისო ბერკეტი. ის ფაქტი, რომ ეს ტერიტორია მოქცეული იყო, ასე ვთქვათ, ოკუპანტების გავლენის ქვეშ და ეს ტერიტორია არ იყო ჩვენი კონტროლის ქვეშ, მგონი, ყველასთვის ცნობილია. ბანერების დადგმა შეიძლება შეფასდეს როგორც პროვოკაცია და აბსოლუტურად გაუმართლებელი, მითუმეტეს იმ ფონზე, როდესაც ჩვენ განვაცხადეთ და სამი წლის განმავლობაში ჩვენი ქმედებით დავამტკიცეთ, რომ ნამდვილად გვსურს რუსეთთან ურთიერთობების ნორმალიზება და დიალოგის გზით, მშვიდობიანი მოლაპარაკების გზით ურთიერთობების დარეგულირება და დეოკუპაციის პროცესის დაწყება, მაგრამ მხოლოდ და მხოლოდ მშვიდობიანი გზით. ჩვენ საპასუხოდ ვხედავთ ასეთ პროვოკაციას, რომელიც აბსოლუტურად გაუმართლებელია, მითუმეტეს, ჩემი წარმომადგენელი ზურაბ აბაშიძე დღეს გაემგზავრა პრაღაში, სადაც ხვალ აქვს შეხვედრა კარასინთან. ასე, რომ აბოლუტურად გაუგებარი და გაუმართლებელია ასეთი ქმედება", _ განუცხადა ღარიბაშვილმა ჟურნალისტებს და იმედი გამოთქვა, რომ "რუსეთის ხელისუფლება დაინტერესდება ამგვარი პროვოკაციებით და შეჩერდება ეს პროცესი, ვინაიდან ეს არც ერთ მხარეს არ წაადგება".
"ჩვენ გვსურს კონსტრუქციული, პრაგმატული ურთიერთობები განვავითაროთ, მაგრამ, რა თქმა უნდა, დავრჩებით პრინციპულები ისეთ საკითხებში, რომელიც ეხება ჩვენს ტერიტორიებს – ჩვენს აფხაზეთს და ჩვენს სამაჩაბლოს. მინდა, კიდევ ერთხელ მოგიწოდოთ სიმშვიდისკენ. ჩვენ ძალიან კარგად ვიცით, რა უნდა გავაკეთოთ და ყველა საერთაშორისო ბერკეტს ვიყენებთ და გამოვიყენებთ", _ განაცხადა ირაკლი ღარიბაშვილმა.
მისივე თქმით, ბაქო-სუფსის ნავთობსადენი სტრატეგიულად მნიშვნელოვანი ობიექტი არამხოლოდ ჩვენთვის, არამედ რამდენიმე სახელმწიფოსთვის და პარტნიორი სახელმწიფოები ყველაფერს გააკეთებენ, რათა ეს პრობლემა მშვიდობიანი გზით მოგვარდეს.
რაც შეეხება რუსეთთან დიალოგის ფორმატიას გადახედვას, პრემიერ-მინისტრის ინფორმაციით, ამ ფორმატის გადახედვა ან გაფართოება არ იგეგმება.
"ამ ეტაპზე არ იგეგმება არავითარი ფორმატის გაფართოება. ის ფორმატი, რაც ჩვენ გვაქვს, დარჩება. მეორე ფორმატი არის ჟენევის დისკუსიები. ასე, რომ არ ვაპირებთ ამ ეტაპზე რაიმე ფორმატის გადახედვას ან გაფართოებას", _ განაცხადა ირაკლი ღარიბაშვილმა.
ვიცე-პრემიერმა კახა კალაძემ კი აღნიშნა, რომ "პოლიტიკური მიმართულებით რუსეთთან მძიმე ურთიერთობა გვაქვს და საჭიროა კონკრეტული ნაბიჯების გადადგმა".
მისივე თქმით, აბაშიძე-კარასინის ფორმატი ამ მიმართულებით სამუშაოდ შეიძლება არ გამოდგეს და ძალიან მნიშვნელოვანი იქნება მოვიფიქროთ სხვა რაიმე ფორმატი, იმისთვის რომ პოლიტიკური მიმართულებით ურთიერთობების დალაგება მოვახერხოთ. კალაძის ინფორმაციით, ახალი ფორმატის შექმნაზე საუბარი სახელისუფლებო გუნდში აუცილებლად იქნება.
