2012 წელი ხელისუფლებამ დიდი კაშხლების მშენებლობის წლად გამოაცხადა _ ხუდონჰესი, ნამახვანის, დარიალის და აჭარის ჰესების კასკადები… _ ეს, ერთი შეხედვით აღმშნებლობითი პროექტები უამრავ პრობლემას მოიცავს.
კინოს სახლში, “მწვანე ალტერნატივის” მიერ ორგანიზებულ შეხვედრაზე, რომელიც 11 თებერვალს გაიმართა, ექსპერტების მიერ დასახელდა 10 მთავარი მიზეზი, რის გამოც, გამოც უარი უნდა ვთქვათ დიდი კაშხლების მშენებლობაზე:
_ წყლის ქვეშ აღმოჩნდება ათასობით ჰექტარი სასოფლო სამეურნეო სავარგული და ტყის მასივი;
_ დაიტბორება ისტორიული სოფლები, კულტურული და არქეოლოგიური მემკვიდრეობის ძეგლები;
_ ათასობით ადამიანს იძულებით მოუწევს საკუთარი მიწაწყლის მიტოვება ადეკვატური კომპენსაციის გარეშე;
_ განადგურდება ფლორისა და ფაუნის უმნიშვნელოვანესი სახეობები;
_ შეუქცევადი ზიანი მიადგება შავი ზღვის სანაპირო ზოლს, იმ შემთხვევაში, თუ მდინარეები ჩაედინება შავ ზღვაში;
_ შეიცვლება მიკროკლიმატი, რაც უარყოფით ზეგავლენას ახდენს სოფლის მეურნეობასა და ტურისტულ გარემოზე;
_ არარაციონალურად გამოიყენება საქართველოს ბუნებრივი რესურსები _ ინვესტორებს ათასობით ჰექტარი ფართობის სასოფლო სამეურნეო სავარგული და ტყის მასივი გადაეცემათ სიმბოლურ 1 დოლარად;
_ ელექტროენერგიის მოხმარების ტარიფი არ შემცირდება;
_ არ შეუწყობს ხელს ადგილობრივი მოსახლეობის დასაქმებას და სიღარიბის დაძლევას რეგიონებში;
_ განუსაზღვრელი დროით გადაავადებს განახლებადი ენერგოპროექტების გახორციელებას.
სწორედ ზემოთ ჩამოთვლილი პრობლემების შესახებ ისაუბრეს სხვადასხვა კუთხიდან ჩამოსულმა მოქალაქეებმაც.
კარლო კოპალიანი, ცაგერის რაიონი: “მე შემოვიარე ცაგერის რაიონის ყველა სოფელი და ვესაუბრე ჩემს მოსახლეობას ამ კაშხლების დადებითი და უარყოფითი მხარეების შესახებ. მინდა გითხრათ, რომ მოსახლეობის 80% წინააღმდეგია მათი აშენებისა”.
მისი თქმით, ძალიან კარგია ენერგორესურსებზე ზრუნვა, მაგრამ ეს იმას არ ნიშნავს, რომ ჩვენი სამშობლო ერთ დიდ წყალსატევად ან ნაგებობად ვაქციოთ. როგორც მან აღნიშნა, 2000 წელს დაიდო მსოფლიოს წამყვანი გარემოსდაცვითი ორგანიზაციების რეკომენდაციები დიდი კაშხლების მშენებლობის მიზანშეუწონლობის შესახებ.
“ისინი იმდენ სარგებელს ვერ მოუტანენ მოსახლეობას და ქვეყანას, რამდენსაც სოციალურ და ეკონომიკურ ზიანს”.
კოპალიანის თქმით, კაშხლების მშენებლობის გამო, 14 სოფელს უწევს ასახლება და ამასთან დაკავშირებით მოსახლეობას აზრს არც კი ეკითხებიან.
ანალოგიურ მოსაზრებას იზიარებენ შეხვედრაზე მოსული სხვა კუთხის მცხოვრებლებიც.
ხელისუფლების ახალ ინიციატივას პოლიტიკური პარტიებიც გამოეხმაურნენ, მაგალითად სოციალ-დემოკრატებმა განცხადება გაავრცელეს, რომელშიც ნათქვამია: “მთავრობა აპირებს ქვეყნის სავაჭრო დეფიციტი “იაფი” ჰიდროელექტროენერგიის ექსპორტით აღმოფხვრას. სინამდვილეში რა რეალურ ხარჯებთანაა ეს დაკავშირებული სრულიად შეუსწავლელი და გაუთვალისწინებელია. სოციალ-დემოკრატები პრინციპულად უარყოფენ ისეთი პროექტების გახორციელებას, რომლებიც ეწინააღმდეგებიან საქართველოს მდგრად, ანუ ეკონომიკურ-სოციალურ-ეკოლოგიურად გაწონასწორებულ, სტაბილურ, გრძელვადიან, უსაფრთხო და ჰარმონიულ განვითარებას,” _ ნათქვამია განცხადებაში.
დიდი კაშხლების აშენების წინააღმდეგ გამოვიდნენ “ლეიბორისტები” და განაცხადეს, რომ ეს ყველაფერი ხელისუფლების უგუნური პოლიტიკის ბრალია: “ჩვენ ჩვენი საქმე უნდა ვაკეთოთ, ხელისუფლებამ კი, თუ უნდა არ მოგვისმინოს”, _ თქვა სოსო შატბერაშვილმა.
“დემოკრატიული მოძრაობის” წევრის შალვა ოგბაიძის თქმით კი, ხელისუფლება ხალხთან და პროფესიონალებთან დისკუსიას გაურბის.
“გარდა იმ მნიშვნელოვანი პრობლემებისა, რაზეც პროფესიონალებმა ისაუბრეს, ჩემთვის, როგორც ერთი რიგითი მოქალაქისთვის, მთავარია, რომ ხელისუფლებასთან დიალოგი გაიხსნას”, _ აღნიშნა ოგბაიძემ.
ერთ-ერთმა მომხსენებელმა, კახა მაქაცარიამ შეხვედრისას, გააჟღერა ინფორმაცია, რომ ჯერ კაშხლები შენდება და მხოლოდ შემდეგ, ფორმალურად იქმნება პროექტები. მან ასევე პროექტის გატაცების ფაქტებიც ახსენა. ამ საკითხთან დაკავშირებით “გურია ნიუსი” აუცილებლად შეეცდება მეტი ინფორმაცია მოიპოვოს.
არა დიდი კაშხლებს! _ ეს გზავნილი საზოგადოებამ ხელისუფლებას შორიდან გაუგზავნა, რადგან იგი, მუდმივად გასულია მომსახურებისა და დიალოგის ზონიდან.
