ცხელი სეზონის დადგომასთან ერთად ყველა დასასვენებლად წასვლაზეა ორიენტირებული, თუმცა ოჯახურ თუ სამეგობრო წრეში დასვენება მგზავრობასთან და მის ხარჯებთან არის დაკავშირებული. ამიტომ, "გურია ნიუსი" დაინტერესდა გაძვირდა თუ არა საქართველოს მასშტაბით კურორტებისკენ მგზავრობის ღირებულება.
ამის გასარკვევად 10-მდე საქალაქთაშორისო ავტოსადგურს დაუკავუკავშირდით.
როგორც "გურია ნიუსს" ავტოსადგურების უმეტესობაში უთხრეს, წელს მგზავრობის ფასი შარშანდელთან შედარებით გაიაფდა ან საერთოდ არ გაძვირებულა, თუმცა საქალაქთაშორისო სამარშრუტო ტაქსებისგან განსხვავებით, საქართველოს რკინიგზამ მატარებლის ბილეთის ფასიც ვაგონების რაოდენობის გაზრდასთან ერთად სეზონურად გააძვირა.
10 ივლისიდან 15 სექტებრის ჩათვლით "საქართველოს რკინიგზა" მუშაობის საგანგებო რეჟიმზე გადადის. ამ პერიოდში მოქალაქეებს მატარებლით მგზავრობისას ბილეთის შეძენა განსხვავებული ტარიფით მოუხდება. როგორც რკინიგზის მენეჯმენტში აცხადებენ, თბილისიდან ბათუმამდე, პირველი კლასის ბილეთის ღირებულება 40 ლარი, ხოლო მეორე კლასის – 23 ლარია, რაც შეეხება დანარჩენ პერიოდს, 10 თვის განმავლობაში მოქმედებს ფასდაკლების სისტემა, რომლის მიხედვითაც პირველი კლასით მგზავრობა – 25 ლარი, ხოლო მეორე კლასით – 18 ლარია.
ავტოსადგურ "დიდუბის" დირექტორის თქმით, მგზავრობის ღირებულება არათუ გაიზარდა, შემცირდა კიდეც.
მგზავრობის ღირებულება არ გაზრდილა, გასულ წელთან შედარებით, პირიქით, როგორც საკურორტო ზონის, ისე სხვა ქალაქების მიმართულებით, საშუალოდ 15%-ით შევამცირეთ", _ ამბობს ავტოსადგურ "დიდუბის" დირექტორი ნესტორ მიქატაძე "გურია ნიუსთან" საუბრისას.
ავტოსადგურ " დედაქალაქის" ინფორმაციით კი, მგზავრობის ფასები არ მათთან შეცვლილა.
"მგზავრობის ღირებულება არ არის შეცვლილი, იგივე ფასებია რაც გასულ წელს იყო, "_ აღნიშნეს ავტოსადგურ "დედაქალაქში."
როგორც თბილისის ცენტრალური ავტოსადგურში განგვიცხადეს, მგზავრობის ღირებულება, პირიქით, გაიაფდა.
"წელს მგზავრობას 1 თეთრიც კი არ მოუმატია. ზამთრის სეზონზე საერთაშორისო მიმართულებით ფასდაკლება იყო და ზაფხულშიც იქნება. ასევე ქვეყნის მასშტაბით მგზავრობაც გაიაფდა. მაგალითად, კახეთის მიმართულებით მგზავრობა 10 ლარი თუ ღირდა, წელს 7 ლარი გახდა", _ამბობენ თბილისის ცენტრალურ ავტოსადგურში.
სატრანსპორტო კომპანია "მეტრო ჯორჯიას" ცნობით, მგზავრობის საფასური გაძვირდა.
"მგზავრობის ფასი თბილისი-ბათუმის, ბათუმი-თბილისის მიმართულებით 5 ლარით გაძვირდა, 20 ლარი ღირდა და 25 გახდა."_ აცხადებენ "მეტრო ჯორჯიაში".
ავტოსადგურების უმრავლესობა ირწმუნება, რომ ლარის კურსის ვარდნას მგზავრობის ღირებულებაზე არ უმოქმედია.
"ლარის კურსის ვარდნას საქალაქთაშორისო მგზავრობის ღირებულებაზე არ უმოქმედია. მგზავრობის ფასი ისევ იგივე რჩება", _აღნიშნეს ჩვენთან საუბრისას ავტოსადგურ "ოკრიბაში."
საქალაქთაშორისო ტრანსპორტისგან განსხვავებით, ბათუმამდე, სარკინიგზო მიმოსვლასთან ერთად, საჰაერო მიმოსვლაც გაძვირდა.
როგორც კომპანია "აირზენაში" აცხადებენ, ბათუმამდე ფრენა გაძვირდა, ამას კი, დოლარის კურსის მატებას უკავშირებენ.
