“საქართველოს დემოკრატიული განვითარების კავშირის” აღმასრულებელი დირექტორი, ლევან ხინთიბიძე “გურია ნიუსთან” საუბარში ამბობს, რომ “მოქალაქეთა პოლიტიკური გაერთიანებების შესახებ” საქართველოს ორგანულ კანონში შესული 2011 წლის 28 დეკემბრის ცვლილებები აშკარად შეიცავს რისკებს, რომელიც მიმართულია სამოქალაქო აქტივობის წინააღმდეგ.
ლევან ხინთიბიძის თქმით, ცვლილებებში არსებულ ნორმათა ბუნდოვანება და კანონის შესაძლო დამრღვევთა განუზომლად არაგონივრული ფართო წრე, ქმნის ინტერპრეტირების საშუალებას, რომლის მიხედვითაც, შესაძლოა, სოლიდურად დაჯარიმდეს პირი (როგორც ფიზიკური, ასევე იურიდიული) ან კიდევ უარესი, ისე იქნეს სისხლის სამართლის პასუხისგებაში მიცემული, რომ ამის შესახებ მას წინასწარი განზრახვა არც კი ჰქონდეს: _ ასევე, იბადება კითხვა “პარტიას და მასთან დაკავშირებული იურიდიული პირების” ცნებასთან მიმართებაში, რომლის დეფინიციაც არაერთგვაროვანია და რომელ პირთა წრეზეა საუბარი, გაურკვეველია.
ასევე, გაურკვეველია ტერმინოლოგია, რომელიც განსაზღვრავს “პარტიებთან კავშირში მყოფ იურიდიულ პირებს (ასევე ფიზიკურსაც)”. ეს განსაკუთრებით სახიფათო თემაა, რადგანაც ამ მუხლით შესაძლებელია სახელმწიფო ზედამხედველობა და ფინანსური შეზღუდვები დაუწესდეს დამოუკიდებელ, არასამთავრობო ორგანიზაციებს, რომლებიც სხვადასხვა პროექტებს ახორციელებენ ადგილობრივი თუ საერთაშორისო დონორი ორგანიზაციების მხარდაჭერით, ქვეყანაში დემოკრატიის გასავითარებლად და ადამიანის საყოველთაოდ აღიარებულ უფლებათა დასაცავად.
ნიშანდობლივია კონტროლის პალატისთვის უაპელაციოდ გაზრდილი უფლებამოსილებებიც. კონტროლის პალატის ფუნქციაა, მეთვალყურეობა და მონიტორინგი დაუწესოს სახელმწიფო, საჯარო ფინანსების განკარგვასა და მათ მიზნობრივ გამოყენებას, ხოლო ახალი ცვლილებების საფუძველზე თუ “დადგინდა”, რომ კერძო პირი “დაკავშირებულია პარტიასთან” (საინტერესოა, კერძოდ, ვინ და როგორ ადგენს?!), მაშინ მის ფინანსებზე ზედამხედველობას უკვე აწესებს კონტროლის პალატა, მიუხედავად იმისა, ეს ფინანსები ბიუჯეტიდანაა მიღებული თუ კერძო შემოსავალია. არ ვიცი, აქ სად არის ლოგიკა ან არსებობს თუ არა მსგავსი საერთაშორისო გამოცდილება ამ თვალსაზრისით.
სამწუხაროდ, უკვე რეალიზაციას იწყებს ამ ცვლილებებით გამოწვეული, ყველაზე ცუდი პროგნოზი, რომლის მიხედვითაც კონტროლის პალატამ უკვე მოსთხოვა 2 არასამთავრობო ორგანიზაციას ბოლო პერიოდის ფინანსური ანგარიშები, რადგანაც “დაადგინა”, რომ ისინი ან მათი საქმიანობა “დაკავშირებულია პარტიასთან”. ეს ფაქტი იმას ნიშნავს, რომ მსგავსი “შემოწმებები” ბევრ “მსგავს” ორგანიზაციებში გახორციელდება და რითი დასრულდება ეს ყველაფერი და ვინ არის შემდეგი, ამას დრო გვიჩვენებს. ზოგადად კი, ეს ყველაფერი უფრო სამოქალაქო სექტორის, მოქალაქეების დაშინებას ჰგავს, ვიდრე “უცხო ქვეყნის ფინანსების ქართულ პოლიტიკაში” გაჩენის შიშს, რაც დემოკრატიის ხარისხს აუარესებს და ეწინააღმდეგება საქართველოს კონსტიტუციით აღიარებულ უფლებებსა და თავისუფლებებს, _ თქვა ჩვენთან საუბრისას ლევან ხინთიბიძემ.
