"აწარმოე საქართველოში" სახელმწიფო პროგრამის ფარგლებში შპს "ჯი-ემ-სი-ჯის" დირექტორი მაია შიშნიაშვილი ლანჩხუთში იმყოფებოდა და მუნიციპალიტეტის გამგეობის სასესიო დარბაზში მიკრო და მცირე ბიზნესით დაინტერესებულ პირებთან შეხვედრა გამართა, რომელსაც ორგანიზება საგარეო ეკონომიკური ურთიერთობების, ინვესტიციების, ტურიზმის, ტრანსპორტისა და მეწარმეობის განვითარებისა და სოფლის მეურნეობის საინფორმაციო-საკონსულტაციო ცენტრებმა გაუწიეს. აღნიშნულ შეხვედრას ასევე ესწრებოდნენ "ჯი-ემ-სი- ჯის" კურატორი გურიის რეგიონში დავით გოგუაძე, საგარეო ეკონომიკური ურთიერთობების, ინვესტიციების, ტურიზმის, ტრანსპორტისა და მეწარმეობის განვითარების ცენტრის ხელმძღვანელი გელა ზოიძე და სხვადასხვა ადმინისტრაციული ერთეულების წარმომადგენლები.
აღნიშნული პროგრამა მიზნად ისახავს საქართველოს სხვადასხვა რეგიონში მიკრო და მცირე ბიზნესის განვითარებას და მეწარმეების დაფინანსებას. შეხვედრისას მაია შიშნიაშვილმა აღნიშნა, რომ პროგრამის ძირითადი დანიშნულებაა წაახალისოს ახალი ბიზნესის წამოწყება, დანერგოს ახალი ინოვაციები, ამასთან ხელი შეუწყოს უკვე არსებულის განვითარებას. გარდა ფინანსური მხარდაჭერისა, პროგრამა ასევე ითვალისწინებს საკონსულტაციო მომსახურეობის გაწევას, რომ მოსახლეობამ მიიღოს მაქსიმალურად სრუყოფილი ინფორმაცია საკუთარი ბიზნესის მართვასთან დაკავშირებით და შემდგომში მიღებული ინფორმაცია პრაქტიკაში ეფექტიანად განახორციელოს.
შეხვედრისას ითქვა, რომ მიკრო და მცირე მეწარმეობის იდეების განსახორციელებლად გრანტის სახით გაიცემა: ერთ მეწარმეზე – 5000 ლარი, ორ მეწარმეზე-1000 ლარი. სამ მეწარმეზე – 15000 ლარის ოდენობით ბენეფიციარისთვის გაცემული თანხის 20%-იანი თანამონაწილეობით.
ბიზნეს-იდეის კონკურსში მონაწილეობის უფლება აქვს საქართველოს სრულწლოვან (18 წელს მიღწეული) მოქალაქეს, რომელიც არ არის საჯარო მოხელე; არ არის ს.ს.ი.პ. მეწარმეობის სააგენტოს თანამშრომელი ან მისი ოჯახის წევრი (დედა, მამა, შვილი, და, ძმა); არ გააჩნია მიმდინარე ვადაგადაცილებული საგადასახადო ვალდებულება სახელმწიფოს წინაშე განაცხადის შეტანის მომენტში; აცხადებს მზაობას ბიზნეს იდეეების კონკურსში გამარჯვების შემთხვევაში, დარეგისტრირდეს მეწარმე სუბიექტად და მოიპოვოს სპეციალური დაბეგვრის სტატუსებიდან ერთ-ერთი.
"ჯი-ემ-სი-ჯის" დირექტორმა ხაზი გაუსვა ორ გარემოებას: პირველი – პროექტისთვის მნიშვნელობა არ აქვს, ვის რა დავალიანება აქვს ბანკებში, მთავარია ბენეფიციარს არ ჰქონდეს სახელმწიფოს წინაშე დავალიანება; მეორე- შესაძლებელია ამხანაგობის წევრები იყვნენ ერთი ოჯახის წარმომადგენლები.
"ეს პირველი პროექტია, როდესაც მეწარმეებისთვის ხდება გრანტის გაცემა, რაც კოოპერატივების შემთხვევაში არ ხდებოდა, გრანტი დაბრუნებადი იყო. აქედან გამომდინარე, აქტუალურია ყველა ინიციატივის შეკრება და ბიზნეს-იდეის განაცხადების შევსება, რომელიც 15 აგვისტომდეა შესაძლებელი. ამიტომ მუნიციპალიტეტის ყველა ტერიტორიული ერთეულის წარმომადგენელს ვთავაზობთ მოგვმართონ და ჩვენ მოვემსახურებით ოპერატიულად, რათა მოხდეს მათი ბიზნეს-იდეის ელექტრონულად დარეგისტრირება, რაც გრანტის მიღების აუცილებელი პირობააა. ამ მიზნით 8 აგვისტოს, შაბათს ცენტრი იმუშავებს ჩვეულებრივ რეჟიმში, რადგან მოსულმა მოქალაქეებმა ადგილზე შეავსონ განაცხადისელექტრონული ფორმა. ამასთან, ნებისმიერი შეკითხვის გაჩენის შემთხვევაში მათ გაეწევათ შესაბამისი კონსულტაცია", _ განაცხადა შეხვედრისას საგარეო ეკონომიკური ურთიერთობების, ინვესტიციების, ტურიზმის, ტრანსპორტისა და მეწარმეობის განვითარების ცენტრის ხელმძღვანელმა გელა ზოიძემ.
დავით გოგუაძის თქმით კი, "ჯი-ემ-სი ჯის" წარმომადგენლები გურიაში მზად არიან შესაბამისი კონსულტაცია და მომსახურება გაუწიონ მსურველებს.
