ზაფხულში, როცა ნაირ-ნაირი ხილი და ბოსტნეული გვაქვს, სასურველია, ადვილად ხელმისაწვდომი ხალხური სამკურნალო საშუალებებით გავიუმჯობესოთ ჩვენი ყოველდღიურობა.
თუ სახესა და ხელებზე გაქვთ პიგმენტური ლაქები, სისტემატურად წაისვით ვაშლის, ატმის, კიტრის ნათალი, ხოლო თუ ასეთ ნაყენს მოამზადებთ, პიგმენტებს სერიოზულად შეებრძოლებით:
_ ავიღოთ ნახევარი კილოგრამი ვაშლის ხის გამხმარი ქერქი, დავაქუცმაცოთ, დავასხათ ლიტრნახევარი წყალი და დაბალ ცეცხლზე ვადუღოთ მანამ, სანამ ქვაბში ნახევარი ჭიქის რაოდენობით არ დარჩება. შემდეგ გავწუროთ. ჩავასხათ მინის პატარა ბოთლში და ბამბის საშუალებით, დღეში 2-3 ჯერ გავიწმინდოთ სახე. შემდეგ წავისვათ მკვებავი კრემი. ერთი თვის თავზე შედეგს იგრძნობთ.
_ კიტრის ლოსიონის დამზადება ძალზე მარტივად შესაძლებელი და ყველასთვის ხელმისაწვდომია _ სახლის პირობებში გავთალოთ კიტრი და ნათალს დავასხათ სპირტი ან შინ გამოხდილი არაყი. აუცილებლად მინის ჭურჭელში უნდა მოვათავსოთ. დავდგათ 4-5 დღით. შემდეგ გავწუროთ. ძალიან კარგი საშუალებაა სახის გასაწმენდად. განსაკუთრებით ზაფხულში, როცა კანი ადვილად და ხშირად ჭუჭყიანდება. ამავე დროს სასარგებლო და კანისთვის სიხალისისა და ცოცხალი ეფექტის მიმნიჭებელია. თუ აღნიშნულ ლოსიონს დამზადების პროცესში ცოტა გლიცერინს და რამდენიმე წვეთ ლიმონის წვენს დავამატებთ, სითხე გაცილებით ნაზი და სურნელოვანი იქნება.
_ გირჩევთ კარიესის წინააღმდეგ ნატურალური შავი ჩაი გამოიყენოთ. დალიეთ ის დილა-საღამოს მხოლოდ უშაქროდ! ჩაიში არსებული ფტორი ამაგრებს კბილის ემალს და ეწინააღმდეგება კარიესის გაჩენას.
_ არაერთხელ თქმულა, თუმცა კიდევ შეგახსენებთ, რომ მუხის ქერქი ერთ-ერთი ყველაზე კარგი საშუალებაა ღრძილების გასამაგრებლად. აუცილებლად მოიძიეთ მუხის ქერქი თქვენს მახლობელ გარემოში, გაახმეთ, გამოაშრეთ და შეინახეთ, რომ ზამთარშიც გქონდეთ. ნახევარ კილოგრამ მუხის გამხმარ ქერქს დაასხით ორი ლიტრი წყალი და დაბალ ცეცხლზე ადუღეთ, სანამ ნახევარი ლიტრი არ გახდება. გავწუროთ, მინის ჭურჭელში ჩავასხათ, ბნელ ადგილზე შევინახოთ ყოველთვის. დღეში ორ-სამჯერ გამოივლეთ პირის ღრუში. ღრძილების სერიოზულ გამაგრებას იგრძნობთ, დაახლოებით, სამი კვირის შემდეგ.
_ ქათმის კვერცხის ნაჭუჭი სასარგებლოა ძვლის გასამაგრებლად, ძვლის ტვინის სისხლწარმომშობი ფუნქციის გასაუმჯობესებლად _ ქათმის კვერცხის ნაჭუჭი კარგად გავრეცხოთ, კარგად გავაშროთ და სანაყით დაფქვამდე მივიყვანოთ. შემდეგ ცოტა რაოდენობით, კოვზის წვერით შევურიოთ ფაფაში და დღეში ორჯერ ერთ წლამდე ასაკის ბავშვებს მივცეთ. უფრო ზედა ასაკიდან მეტი რაოდენობითაც შეიძლება მივცეთ.
პროცესს ერთ თვეზე მეტხანს ნუ გააგრძელებთ. სასურველია, ნაჭუჭის ნაფქვის მიღება წელიწადში ორჯერ.
_ ნუ დაგეზარებათ ზაფხულში ხშირად მიირთვათ ოხრახუშის წვენი, რა თქმა უნდა, მცირე დოზით. ეს პირდაპირ აისახება თქვენს ჯანმრთელობაზე.
