რამდენიმე დღის წინ გამართულ საქართველოს ფეხბურთის ფედერაციის აღმასკომის სხდომაზე, განიხილეს სპორტული დავების არბიტრაჟისა და საფეხბურთო კლუბ ლანჩხუთის "გურიას" შორის არსებული დავის საკითხი. შეგახსენებთ, რომ ხსენებულმა არბიტრაჟმა კლუბს ყოფილი მწვრთნელების თემურ ლორიასა და თენგიზ პატარაიას კონტრაქტით გათვალისწინებული ნარჩენი დავალიანების გადახდა დააკისრა. საუბარია 40 ათას ლარზე, რომელიც კლუბს 10 აგვისტომდე უნდა დაეფარა, ან მწვრთნელებთან მოლაპარაკებები ეწარმოებინა ხსენებული თანხის გადახდის გზების თაობაზე.
როგორც "გურიის" ექსმთავარმა მწვრთნელმა თემურ ლორიამ "გურია ნიუსს" განუცხადა, კლუბს საამისოდ ნაბიჯიც კი არ გადაუდგამს.
"ვის უნდა ამათთან საუბარი, მაგრამ ამის მცდელობაც კი არ ყოფილა. ერთხელ ვთქვი და ვიმეორებ, ასე არც ლიცენზირების ჯარიმის გადახდას აპირებდა ზაზა ურუშაძე, მაგრამ მოუწია და ასე იქნება ჩვენს შემთხვევაშიც. აღმასკომმა "გურიას" ვადა 7 სექტემბრამდე მისცა და თუ არ გადაიხდის ამ ვადაში, ქულათა მარაგის 3 – დან 9 ქულამდე ჩამორთმევით დაჯარიმდება. თუ ამ შემთხვევაშიც არ გადაიხდის, კიდევ მიეცემა მოკლე ვადა და ამის გასვლის შემდგომ, გათამაშებიდანაც მოიხსნება. ეს რომ ასე იყო, კლუბის ლიცენზირების მენეჯერმა, ირაკლი ვაშაკიძემ აღმასკომის სხდომაზე საკუთარი ყურებით მოისმინა" – გვითხრა თემურ ლორიამ.
ამას გარდა თემურ ლორიამ გაოცება ვერ დამალა, მუნიციპალიტეტის გამგებელმა ზაზა ურუშაძემ რევაზ არველაძეს რომ გადააბრალა ყველაფერი.
"წავიკითხე პატივცემული გამგებლის კომენტარი და გაოცებული დავრჩი. თურმე არველაძე ყოფილა დამნაშავე კლუბმა ლიცენზირება რომ ვერ გაიარა და შესაბამისად ჯარიმა რომ გადაიხადა, ასევე ბავშვთა და ჭაბუკთა ლიგის თანხა რომ დაიკარგა უეფადან. ლიცენზირების არქონას მანამდე მეც მაბრალებდა, მაგრამ კლუბს ერთი საბუთიც არ გაუგზავნია საამისოდ და ჩემი ლიცენზირების აღდგენის თაობაზე ოფიციალურ განაცხადს ხომ ჯვარი წერია. ისიც დაემატა ამ "ბრალდებებს", ჩვენი დავალიანების გამო კლუბს თანხა რომ აქვს გადასახდელი და ამისთვის თურმე უსაფუძვლოდ ემუქრებიან.
არველაძის ბრალია თურმე, კლუბს მომავალ არჩევნებზე ხმის მიცემის უფლება რომ არ აქვს. ლიცენზირება რომაა საჭირო საამისოდ, მან ვითომ ეს არ იცის? ვერ გავიგე, უნდა რომ ქაოსი იყოს ფედერაციაში და "გურია" ყოველგვარი წესებისა და კანონების გარეშე გამოდიოდეს? არც ლიცენზიის აღება იყოს საჭირო და არც ხელშეკრულების უსამართლოდ, ცალმხრივად გაწყვეტისთვის თანხის გადახდა? ხომ არ შეიძლება რაშიც თვითონაა დამნაშავე, ყველაფერი სხვას გადააბრალოს. მსაჯების თემით, წაგების და სხვა პრობლემების დაფარვა კი სისუსტეა და მეტი არაფერი" – დასძინა ლორიამ.
მუნიციპალიტეტის გამგებელმა და ამავდროულად კლუბ "გურიის" პრეზიდენტმა, ზაზა ურუშაძემ, აღნიშნულ საკითხზე კომენტარის გაკეთებისგან თავი შეიკავა.
"მე არაფერი გამიგია აღმასკომის სხდომის შესახებ. არც ოფიციალური დოკუმენტი მოგვსვლია რამე და რა უნდა გითხრათ? როცა მოგვივა მაშინ გავაკეთებთ კომენტარს" – განაცხადა ურუშაძემ.
