შსს-ს თბილისის მთავარი სამმართველოს ვაკე-საბურთალოს სამმართველოს თანამშრომლებმა, ჩატარებული ოპერატიულ-სამძებრო და საგამოძიებო ღონისძიებების შედეგად, ჯგუფურად ჩადენილი ქურდობის ბრალდებით, ორგანიზებული ჯგუფის 5 წევრი – 1988 წელს დაბადებული გიორგი თ, 1988 წელს დაბადებული გიორგი ც, 1990 წელს დაბადებული ლევან ჭ, 1993 წელს დაბადებული ლევან დ. და 1986 წელს დაბადებული ირაკლი კ. დააკავეს.
სამართალდამცველებმა გიორგი თ, გიორგი ც. და ლევან ჭ. იმ დროს დააკავეს, როდესაც მათ თბილისში, წულუკიძის ქუჩის მეორე შესახვევის N2 კორპუსის მიმდებარე ტერიტორიაზე განთავსებული, "თიბისი ბანკის" სწრაფი ჩარიცხვის აპარატი გაქურდეს და 38 500 ლარი მოიპარეს.
გამოძიებამ დაადგინა, რომ გიორგი თ, გიორგი ც. და ლევან ჭ. აღნიშნული აპარატიდან "აჭარაბეთის" არავერიფიცირებულ ანგარიშზე დიდი ოდენობით თანხებს რიცხავდნენ, ლევან დ. და ირაკლი კ. კი ამ ანგარიშიდან ჩარიცხული თანხების გადათამაშებას ახდენდნენ "აჭარაბეთის" ვერიფიცირებულ ანგარიშზე, რომელიც თავიანთი დემოგრაფიული მონაცემების მიხედვით ჰქონდათ შექმნილი. ბრალდებულებს გადათამაშებული თანხა "აჭარაბეთის" ვერიფიცირებული ანგარიშიდან გამოქონდათ, გამოტანილ თანხას კვლავ იმავე სწრაფი ჩარიცხვის აპარატში რიცხავდნენ და დანაშაულებრივ საქმიანობას აგრძელებდნენ. როდესაც სწრაფი ჩარიცხვის აპარატში გარკვეული თანხა დაგროვდა, გიორგი თ-მ, გიორგი ც-მ და ლევან ჭ-მ გატეხეს სწრაფი ჩარიცხვის აპარატი და იქ არსებულ თანხას მართლსაწინააღმდეგოდ დაეუფლნენ.
სამართალდამცველებმა ნაქურდალი თანხა სრულად ამოიღეს. ხუთივე დაკავებული ჩადენილ დანაშაულს აღიარებს.
გამოძიება წინასწარ შეთანხმებით ჯგუფურად ჩადენილი ქურდობის ფაქტზე მიმდინარეობს.
