ეკონომიკის სამინისტროს მხრიდან თავისუფლების ქუჩის დასაწყისში არასასოფლო-სამეურნეო დანიშნულების უძრავი ქონების გასხვისების ფაქტს, მიმდებარე ტერიტორიაზე მცხოვრები რამდენიმე ოჯახი არამართებულად მიიჩნევს. ამასთან დაკავშირებით მათ რამდენიმე დღის წინ მცირე აქციაც მოაწყვეს, ოთხშაბათს კი გურიის გუბერნატორს გია სალუქვაძეს პირადად შეხვდნენ.
"ჩვენ შევხვდით გუბერნატორს და პირადად გავაცანით არსებული ვითარება. თან ადგილზე გადაღებული ფოტომასალებიც წარვუდგინეთ. მანაც, თავის მხრივ მოიკვლია საჭირო დოკუმენტაცია. საუბრიდან გამომდინარე დაგვრჩა შთაბეჭდილება, რომ ბატონმა გიამ ყურადიღო ჩვენი არგუმენტები. ის დაგვპირდა, რომ არსებული ვითარების შესწავლის მიზნით სპეციალურ კომისიას შექმნიდა და სათანადო დასკვნებს შემდგომ გამოიტანდა. მან მოგვცა პირობა, რომ მოსახლეობას მისხალ სიმართლესაც არ დაგვიკარგავდა და არ დაგვაზარალებდა.
ჩვენ იმედი გვაქვს, რომ გუბერნიაც და ეკონომიკის სამინისტროც გაითვალისწინებს ადგილობრივების აზრს და ისე იმოქმედებს"- გვითხრა მარიკა მენაღარიშვილმა, რომელიც თავადაც იმყოფებოდა გუბერნატორთან შეხვედრაზე.
საქმე ისაა, რომ მიმდინარე წლის თებერვალში სახელმწიფო ქონების ეროვნული სააგენტოს მიერ პრივატიზების მიზნით ქალაქ ლანჩხუთში, თავისუფლების ქუჩის #1ა-ში მდებარე უძრავ ქონებაზე გამოცხადდა აუქციონი და მოხდა მისი პრივატიზება.
აღნიშნული ქონების პრივატიზების მიზნით განხორციელებული ადმინისტრაციული წარმოების ფარგლებში, ქონების ეროვნულ სააგენტოში წარდგენილია სწორედ გუბერნატორის ადმინისტრაციის დადებითი დასკვნა ნახსენები მიწის ფართის პრივატიზებასთან დაკავშირებით.
ეკონომიკის სამინისტროს განცხადებით, საჯარო რეესტრის ეროვნულ სააგენტოში რეგისტრირებული მონაცემის თანახმად, პრივატიზებული მიწის ნაკვეთის ფართობი შეადგენს 24 კვ.მეტრს და მდებარეობს შიდა საუბნო გზის (ჩიხის) მიმდებარედ და საერთოდ არ მოიცავს ამ უკანასკნელს (ჩიხს) ან/და მის ნაწილს. პრივატიზებული მიწის ნაკვეთი თავისუფალია ნარგავებისგან და შესაბამისად ის არ მოიცავს ცაცხვის ხე-მცენარეებს.
ეკონომიკის სამინისტროსგან განსხვავებით საპირისპიროს ამტკიცებს ადგილობრივი მოსახლეობა.
"როგორც ჩანს ეკონომიკის სამინისტრო შეცდომაშია შეყვანილი და სწორედ ამიტომ ვფიქრობთ, რომ უმჯობესია შეიქმნას კომისია, რომელიც საკითხთან დაკავშირებით რეალურ დასკვნას დადებს. ფაქტია, რომ ამ ტერიტორიის გასხვისება არ შეიძლებოდა. თუ მიწის ახლანდელი მფლობელი საკუთარ მიზანს განახორციელებს და აქ ობიექტს ააშენებს (ჩვენი ინფორმაციით მას სავაჭრო ობიექტის გახსნა სურს), ჩიხში შესასვლელი ერთადერთი სამანქანო გზა იკეტება. ღმერთმა ყველა დაიფაროს რაიმე უბედურებისგან, მაგრამ თუ რამე გაუთვალისწინებელი მოხდა, აქ ვერც სახანძრო და ვერც სხვა მანქანა შემოვა. ვერც ყანის მოსავალს მივიტანთ საკუთარ ეზოებამდე.
ფაქტია, რომ ეკონომიკის სამინისტროს არასწორად მიაწოდეს მასალები. მისი განცხადებით, თითქოს პრივატიზებული ფართი ჩიხის მიმდებარედ მდებარეობს და მას არ მოიცავს, ასევე ფართი თავისუფალია ნარგავისგანო. არადა ფაქტია, რომ იქ ცაცხვის ხე ნამდვილად დგას და ჩიხში შესასვლელ სამანქანო გზასაც კეტავს" -აცხადებენ ადგილობრივები.
ამის გარდა, როგორც მოსახლეობა ამბობს, ჩიხში შესასვლელი გზის გაფართოების მიზნით მიწის ეს ნაწილი წლების წინ იქვე მცხოვრებმა ჯიჯიეშვილების ოჯახმა დათმო.
"თუ ამის დადასტურება გახდა საჭირო, აუცილებლად მოვიკვლევთ არქივში ყველა სათანადო დოკუმენტს. ფაქტია, ჩიხში შესასვლელად ნორმალური სამანქანო გზა რომ გვქონოდა, თავად მოსახლეობამ დათმო კუთვნილი მიწის ფართი ისევ თავისსავე საკეთილდღეოდ და არა იმისთვის, რომ შემდგომ გაყიდულიყო"– ამბობს მოსახლეობა.
თუმცა, ეკონომიკის სამინისტრო ამ ფაქტს არ ადასტურებს.
"პრივატიზებული მიწის ნაკვეთი არასდროს წარმოადგენდა კერძო საკუთრებას და სარგებლობაში არსებული ქონების აღწერისა და რეგისტრაციის მიზნით ამერიკის შეერთებული შტატების განვითარების საერთაშორისო სააგენტოს (USAID) და მიერ 2000 წელს განხორციელებული სისტემური მონაცემები, რომლის თანახმადაც დასახელებული ტერიტოარია არ წარმოადგენს კერძო მფლობელობას და შესაბამისად სახელმწიფო საკუთრებაშია"-ნათქვამია სამინისტროს განცახდებაში.
გურიის გუბერნატორის გია სალუქვაძის თქმით, გადაწყდა აღნიშნულ საკითხთან დაკავშირებით შეიქმნას მუშა ჯგუფი.
"ჯერჯერობით, არ შემიძლია იმის თქმა, რამდენად კანონიერად ან არაკანონიერად მოხდა აღნიშნული მიწის ფართის პრივატიზება. მე შევხვდი ადგილობრივებს, მოვისმინე მათი პრობლემის შესახებ და მივიღე გადაწყვეტილება მუშა ჯგუფის შექმნასთან დაკავშირებით, რომელიც დეტალურად შეისწავლის საკითხს. ამასთან, სანამ რეალური დასკვნა არ გვექნება ხელთ, გავეცი მითითება, არ მოხდეს იქ მდგარი ცაცხვის ხის მოჭრა. მოკლედ, კონკრეტულად რა და როგორაა, ამის თქმა მხოლოდ საკითხის შესწავლის შემდეგ შეგვეძლება, თუმცა, პირობას ვდებ სიმართლეს არავის დავუკარგავ" – განაცხადა გუბერნატორმა.
აღნიშნული საკითხი რომ კიდევ ერთხელ გადასახედია, ამას ადასტურებს ლანჩხუთის საკრებულოს ეკონომიკის, ქონების მართვისა და ბუნებრივი რესურსების საკითხების კომისიის თავმჯდომარე გიორგი ჩახვაძეც, რადგან მისი აზრით, აღნიშნული მონაკვეთი მოსახლეობისთვის სასიცოცხლოდ მნიშვნელოვანია და ამასთან იქ კანალიზაციისა და კავშირგაბმულობის ქსელიც გადის.
აღნიშნულთან დაკავშირებით საქმის კურსში საერთოდ არ იყო გამგეობის ეკონომიკის, ქონების მართვისა და ბუნებრივი რესურსების სამსახური.
"როგორც წესი მიწის შესყიდვის შემთხვევაში, გუბერნია წერილით მოგვმართავს და საკითხის შესწავლას ითხოვს. ამ ფაქტზე კი არავითარი შეკითხვა არ მოსულა და სამსახურიც შესაბამისად , საქმის კურსში არ ყოფილა. მხოლოს ხის მოჭრის ნებართვის შესახებ შემოვიდა საკრებულოში წერილი" – გვითხრა სამსახურის უფროსმა, გოგი ფაცურიამ.
