საქართველოს მოქალაქეებს უფლება აქვთ იცოდნენ რაში რამდენს ხარჯავს მათ მიერ დაქირავებული ხელისუფლება. ამ უფლებას ანიჭებს კანონი, რომელიც ადგენს რა სახის ინფორმაცია უნდა იყოს საზოგადოებისთვის ხელმისაწვდომი. წარმოგიდგენთ 2011 წლის ბიუჯეტიდან ლანჩხუთის მუნიციპალიტეტის მიერ გახორციელებულ სახელმწიფო შესყიდვების წლიურ გეგმას _ რა მიზნითა და რა რაოდენობის თანხა დახარჯა გასული წლის განმავლობაში ბიუჯეტიდან ადგილობრივმა ხელისუფლებამ.
საარქივო მომსახურებაში 1537,5 ლარი გადაუხადეს საქართველოს ეროვნულ არქივს. შპს “რომპეტროლ საქართველოს” ანგარიშზე, შეძენილი საწვავის სანაცვლოდ, 4171,75 ლარია გადარიცხული. საკანცელარიო ნივთებისა და კომპიუტერული დისკების შესაძენად 1470 ლარია გახარჯული.
ინდმეწარმე თამარ თედორაძეს სხვადასხვა წვრილმან ნივთებზე ჴ ცოცხებზე, ჯაგრისებზე, აქანდაზებზე, იატაკის საპრიალებლებზე, სათლებზე, სარეცხ საშუალებებზე 155,5 ლარი გადაუხადეს. უსაფრთხოების დაცვაზე 3000 ლარი გადაურიცხეს “დაცვის პოლიციის დეპარტამენტს”. საფოსტო და საკურიერო მომსახურებაზე, რატომღაც, მხოლოდ 36 ლარი დაიხარჯა.
რეზერვისტთა და წვევამდელთა ტრანსპორტირებაზე გამგეობამ 2011,8 ლარი დახარჯა. მონაცემთა ბაზის პროგრამული პაკეტების ღირებულებაა 880 ლარი, ინტერნეტ მომსახურებაში კი კომპანია “სილქნეტს” 9075 ლარი გადაუხადეს. 2011 წელს ლანჩხუთის მუნიციპალიტეტის გამგეობამ 150 ლარის ღირებულების პირველადი ელემენტები და პირველადი ბატარეები შეიძინა ინდმეწარმე “ივლიანე გოგუაძისგან”. “ვისოლ პეტროლიუმ ჯორჯიასგან” 7600 ლარის ღირებულების საწვავია შეძენილი.
გამგეობის თანამშრომლების შრომისმოყვარეობა იმ თანხის პირდაპირპროპორციულია, რაც სხვადასხვა წვრილმანი ნივთების შეძენისთვისაა დახარჯული. “სამუშაო რეჟიმიდან” გამომდინარე, როგორც ჩანს, მუშაობისთვის ხშირად სჭირდებათ ბურთულიანი ავტოკალმების, ფლომასტერების, მარკერების, ფანქრების, საშლელების, საკორექციო ფანქრებისა და სითხეების, “ორგანაიზერების”, სახაზავი ქაღალდების, ჭიკარტების, სარჭების, სკრეპების, სტეპლერების და ანტი სტეპლერების შეძენა-განახლება. ასეთ წვრილმან ნივთებზე 2453,36 ლარი დაუხარჯავთ. ზემოჩამოთვლილი ნივთები წლის განმავლობაში რამდენჯერმე შეიძინეს. 2011 წლის ბოლოსთვის, გამგეობას თანამშრომლებისთვის კვლავ შეუძენია 605 ლარის ღირებულების საკანცელარიო საქონელი ჴ რვეულები, ფორმები, ბაინდერები, საქაღალდეები, უბის წიგნაკები, საბუღალტრო წიგნები და ა.შ.
ინდმეწარმე ნიკოლოზ ქურიძეს 150 ლარი გადაუხადეს სტუმრის მიღება-მომსახურებაში. თუმცა, ვინ იყვნენ სტუმრები ან რა სახის მომსახურება გაუწიეს მათ, ჩვენთვის უცნობია.
ჩვენმა მოქალაქეებმა აუცილებლად უნდა იცოდნენ, რომ ცივილიზებული სამყაროს მსგავსად, ჩვენთანაც არსებობს უპატრონო ძაღლების თავშესაფარი და მის მომსახურებაში ქალაქის მუნიციპალური სამსახური ყოველწლიურად 6000 ლარს ხარჯავს.
ჩვენი მაღალჩინოსნები სამსახურებრივი ავტომანქანებით გადაადგილდებიან და რა თქმა უნდა, ამ ავტომობილებს შეკეთება ესაჭიროება. ამ მომსახურებას გამგეობასა და საკრებულოს 2011 წელს შპს “გოჩა ებრალიძე და კომპანია” უწევდა, რაშიც ზემოთ აღნიშნულმა კომპანიამ 26 880 ლარი მიიღო.
2011 წლის განმავლობაში 2-ჯერ _ მარტის და ნოემბრის თვეებში ინდმეწარმე თამარ თედორაძისგან შეისყიდეს როზეტები, ელექტროვარვარიანი ნათურები, ჰალოგენური და ხაზოვანი ნათურები, ფარნები, ჭერის და კედლის განათება, საიზოლაციო ლენტები, კაბელიანი დამაგრძელებლები, ამომრთველები, ხელსაბანი საპნები, ჯაგრისები, სანაგვე ყუთები, აქანდაზები, სათლები და გადაუხადეს 447,2 ლარი. იმავე ინდმეწარმეს გასული წლის დეკემბერში კვლავ გადაუხადეს 447.2 ლარი და ამ ჯერად სხვა სახის საქონელი შეიძინეს ჴ მტვრის საწმენდი ტილოები, ჰაერის დეზინფექტორები, მაკრატლები, იატაკის საპრიალებლები, იატაკის ტილოები, ზარები, დასაკეცი კიბეები, კარების საკეტები და ა.შ.
შპს “ელიტ აუდიტს” აუდიტორული მომსახურებისთვის 4950 ლარი გამოუყვეს. საინფორმაციო ფურცლების დამზადება-გავრცელებაში, განცხადებების, ინფორმაციების და სურათების გამოქვეყნებაში შპს “ჰო და არას” 3960 და 3400 ლარი გადაუხადეს. საჩუქრებსა და ჯილდოებზე 310 ლარი დახარჯეს, ოღონდ ვინ იყო ამ საჩუქრების ადრესატი, შესყიდვების გეგმის ანგარიშში მითითებული არ არის. კომპიუტერული აქსესუარების, საოფისე აპარატურის და მოწყობილობების შეკეთებაში შპს “სტაგმს” 220 ლარი გადაუხადეს.
ასე რომ, 2011 წლის განმავლობაში, ჩვენმა “ხელმომჭირნე” ხელისუფლებამ “წვრილმანებზე”, დაახლოებით, 80 000 ლარი დახარჯა.
