ოზურგეთის მუნიციპალიტეტის სოფელ შრომაში, ოსიძეების 8-სულიანი ოჯახი სოციალურად მძიმე პირობებში ცხოვრობს. ისინი თითქმის რვა წლის განმავლობაში თხოვდნენ ხელისუფლებას საცხოვრებელი პატარა "კუხნის"გადახურვას, რაც ამდენი წლის განმავლობაში არ მოხერხდა.
ოსიძეების ოჯახში 3 მცირეწლოვანია, აქედან, ერთი ლეიკემიითაა დაავადებული; აქვე ცხოვრობს მოხუცი, რომელსაც ინსულტი აქვს გადატანილი. 8-სულიანი ოჯახს რამდენიმე თვეა, რაც სოციალური დახმარება შეუჩერდა.
იური ოსიძე "გურია ნიუსთან" ამბობს, რომ რვა წლის მანძილზე ოზურგეთის მუნიციპალიტეტის დახმარებას ჰპირდება, თუმცა, მისივე თქმით, მიუხედავად ხელისუფლების შეცვლისა, ჯერჯერობით, მათ საკეთილდღეოდ არაფერი ჩანს: "გაუსაძლის პირობებში ვცხოვრობთ. უკვე 8 წელია, გვპირდებიან, რომ სახურავს გაგვიკეთებენ. ტერიტორიულად ნატანების მიწაზე ვცხოვრობთ, იურიდიულად კი სოფელ შრომას ვეკუთვნით. მიწა ჩვენი არ არის. ეს იყო ძველი ჩაის ფაბრიკის ბინები. ბებიაჩემი 18 წლის ასაკიდან აქ ცხოვრობს, ამ სახლში გააჩინა შვილები და აქ ვცხოვრობთ ჩვენც, შვილიშვილები. სადაც ბოსტანი გვაქვს, იმ მიწაზეც გვედავებიან და, რეალურად, მარტო ეს ავარიული ქოხია ჩვენი. ყოველ გაწვიმებაზე სახლშიც წვიმს _ ამ ზამთარს ვერ გადავიტანთ, თოვლს ვერ გაუძლებს სახურავი. აქ ვცხოვრობთ ორი ძმა, ჩემი ძმის ცოლი, მისი სამი მცირეწლოვანი ბავშვით, ბებიაჩემი და დედაჩემი. მთავრობას ვთხოვთ სახლის გადახურვას. გვპირდებიან ამდენი წელია და ჯერ არაფერი არ ჩანს. გვპირდებიან და ვართ ასე მოლოდინში. უბრალოდ, ერთჯერად დახმარებას გამიკეთებენ და მისტუმრებენ. სოციალური დახმარება წინასწარ ჰქონდა გამოტანილი. მოგვიხსნეს და ახლა პენსიით ვიხდით იმ ვალს. არანაირი საშუალება არ გაგვაჩნია, საერთოდ არაფერი გვაქვს, არანაირი შემოსავალი. წყალიც არ გვაქვს _ 3 კილომეტრიდან ვეზიდებით ხელით. ინფრასტრუქტურის სამსახურიდან გვითხრეს, რომ თქვენთან ნამყოფები ვართ და ვიცით, რომ კატასტროფული მდგომარეობააო. 8 თვის წინ იყვნენ, ამდენ ხანს არ შეიძლებოდა, დაგვხმარებოდნენ?! ზამთარი მოდის, ამ ქოხის გადახურვას რა დასჭირდებოდა? ამ სოფელში რამდენიმეს ისეთს გადაუხურეს სახლი და მისცეს მასალა, ვინც საერთოდ არ ცხოვრობს სახლში. ჩვენ უპატრონოები რომ ვართ, ამიტომ არ გვაქცევენ ყურადღებას?!"
ვალენტინა ოსიძე: "ხელისუფლებამ ნახა, იცის, რა მდგომარეობაშიც ვართ, მაგრამ არაფერი. მორიელები დარბიან ოთახში _ ჩემს შვილს უკბინა, ძლივს გადავარჩინეთ. სოფელში ვართ, შინაური პირუტყვი ხომ გვჭირდება _ ქათამი, ღორი, საბოსტნე მიწა?!
ოზურგეთის გამგეობაში გვითხრეს, შენნაირი აქ ძალიან ბევრი გვყავსო. 5 წელია ახალ-ახალ განცხადებებს ვწერთ. გეკითხებით, როდის უნდა გვეღირსოს ჭერი? ჩავედით გამგეობაში და ვუთხარით "გურია ნიუსი" დაინტერესდა ჩვენი ამბით და გააშუქებენ,-მეთქი. ასე მითხრეს _ მაგენს მეტი საქმე კი არ აქვს არაფერი, მის საქმეს იკეთებენო.
რამდენიმე წლის წინ კი, როცა ჟურნალისტები დაინტერესდნენ ჩვენი პრობლემებით, სამი დღე პოლიციაში მატარეს _ რას შეგპირდნენ, რით გეხმარებიანო. არაფერი არ დამპირდნენ,-მეთქი, _ ვუთხარი", _ ამბობს ვალენტინა ოსიძე.
ოზურგეთის მუნიციპალიტეტის გამგებლის წარმომადგენელი სოფელ შრომაში მაყვალა დარჩია "გურია ნიუსთან" ადასტურებს აღნიშნული ოჯახის პრობლემებს და ამბობს, რომ დახმარებას პირველივე შესაძლებლობისთანავე გაუწევს: "ნამდვილად ავარიული მდგომარეობა აქვთ, აუცილებლად საჭიროებს დახმარებას, საქმის კურსში არის ინფრასტრუქტურის სამსახურიც და პირველივე შესაძლებლობისთანავე დავეხმარებით", _ ამბობს დარჩია.
"გურია ნიუსი" ამ თემას კვლავ მიუბრუნდება, რადგან სწორედაც "მეტი", უფრო მნიშვნელოვანი საქმე ნამდვილად არ გვაქვს!
