ბრიუსელში ნატოს შტაბ-ბინაში ნატო-საქართველოს კომისიის სხდომა 28+1-ის ფორმატში ჩატარდა. კომისიას ნატოს გენერალური მდივანი იენს სტოლტენბერგი და საქართველოს თავდაცვის მინისტრი თინათინ ხიდაშელი ესწრებოდნენ.
კომისიის სხდომა იენს სტოლტენბერგმა გახსნა. სიტყვით გამოსვლისას მან ნატო-საქართველოს თანამშრომლობაზე გაამახვილა ყურადღება და აღნიშნა, რომ საქართველო დანაპირების ერთგული რჩება და შეუფერხებლად განაგრძობს რეფორმირების პროცესს. მისი განცხადებით, საქართველო ალიანსის უახლოესი პარტნიორია. ნატოს წევრი ქვეყნების თავდაცვის მინისტრებთან შეხვედრის დროს იენს სტოლტენბერგმა საქართველოში რუსეთის ქმედებებიც დაგმო.
„უელსის სამიტზე, ნატო საქართველოს არსებითი პაკეტის მხარდაჭერას დაპირდა. ჩვენ ამ პაკეტით გათვალისწინებულ ელემენტებს უკვე ვახორციელებთ. მნიშვნელოვანი საქმეა გავაძლიეროთ საქართველოს უსაფრთხოება და მხარი დავუჭიროთ ქვეყნის ევრო-ატლანტიკურ სტრუქტურებში მისწრაფებას. საქართველო სუვერენული სახელმწიფოა საერთაშორისოდ აღიარებული საზღვრებით. მას უფლება აქვს განსაზღვროს თავისი მომავალი და უსაფრთხოების სისტემა,“ – განაცხადა იენს სტოლტენბერგმა.
კომისიის სხდომის დასრულების შემდეგ, ნატოს მინისტერიალის პრესკონფერენციაზე საუბრისას იენს სტოლტენბერგმა ხაზი გაუსვა საქართველოს ხელისუფლების მიერ სახელმწიფო ინსტიტუტების რეფორმირების წარმატებულ პროცესს. ნატოს გენერალურმა მდივანმა საერთაშორისო მისიებში საქართველოს მონაწილეობაც შეაფასა. როგორც მან აღნიშნა, საკუთარი სამხედრო კონტრიბუციით საქართველოს უდიდესი წვლილი შეაქვს ნატოს სხვადასხვა მისიებში, განსაკუთრებით კი ავღანეთში.
„მე დარწმუნებული ვარ, რომ საგარეო საქმეთა მინისტრები დეკემბრის მინისტერიალზე შეიმუშავებენ გზებს და საშუალებებს, რომლის ფარგლებშიც საერთაშორისო მისებში საქართველოს მიერ გაწეული წვლილი შესაბამისად იქნება აღქმული. ურთიერთობები სწორი მიმართულებით ხორციელდება და საქართველო ნამდვილად სწორ გზას ადგას. ჩვენ მივესალმებით პროგრესს, რომელსაც თქვენი ქვეყანა და ალიანსი ერთობლივად ვაღწევთ,“ – აღნიშნა ნატოს გენერალურმა მდივანმა.
კომისიის სხდომაზე ნატოს წევრი ქვეყნების წარმომადგენლებთან თინათინ ხიდაშელმა ნატო-საქართველოს არსებითი პაკეტის იმპლემენტაციაზე და ერთობლივ შესრულებაზე ისაუბრა. საქართველოს თავდაცვის მინისტრმა ნატოელ პარტნიორებს იმ მიღწეულ შედეგებზეც მიაწოდა ინფორმაცია, რომელსაც საქართველომ არსებითი პაკეთის მიღების შემდეგ მიაღწია. თინათი ხიდაშელმა ხაზი გაუსვა იმას, თუ რამდენად მნიშვნელოვანია დეკემბრის მინისტერიალის და ვარშავის სამიტის პოლიტიკური შედეგები.
„გენერალური მდივნის მხრიდან ძალიან მნიშვნელოვანი გზავნილები გაკეთდა. ვფიქრობ, ვისაც ობიექტურობა ოდნავ მაინც აქვს შერჩენილი, ყველა ძალიან კარგად დაინახავს, როგორ არის გამქრალი საქართველო ნატოს რადარიდან. როდესაც იენს სტოლტენბერგი ნატოს მინისტერიალის პრესკონფერენციაზე თავის შესავალ სიტყვაში საქართველოზე საუბრობს და ორჯერ ახსენებს ჩვენს ქვეყანას, ეს, ჩემი აზრით, ბევრ რამეს უსვამს ხაზს. პირველ რიგში ეს მიუთითებს გენერალური მდივნის პირად დამოკიდებულებას საქართველოს მიმართ, რაც უკიდურესად მნიშვნელოვანია ამ ტიპის ურთიერთობებში. მისთვის საქართველო არის ერთერთი პრიორიტეტული ქვეყანა.
ეს ამბები ერთმანეთისგან დამოუკიდებლად არ ხდება და ამას დიდი მნიშვნელობა ექნება ვარშავის სამიტისთვის. ნატო-საქართველოს კომისიის სხდომაც ამ სულისკვეთებით წარიმართა. პროგრესი, რომელსაც საქართველო დღითიდღე აჩვენებს ალიანსს ცალსახად და ერთმნიშვნელოვნად უნდა გამოიხატოს ვარშავის სამიტის გადაწყვეტილებებში. ეს იყო პირველი სხდომა რომელიც მსჯელობდა ნატო-საქართველოს ურთიერთობებზე ვარშავის სამიტის კონტექსტში, ამიტომ ძალიან კმაყოფილი ვარ.
ჩვენ მივიღეთ სრული და უალტერნატივო მხარდაჭერა. ახლა უკვე ველოდებით ამ პროცესის გაგრძელებას 2016 წლის ზაფხულში – ვარშავაში , როდესაც ჩვენ წარვადგენთ არსებითი პაკეტის შესახებ ანგარიშს. ეს ანგარიში უნდა იყოს მაქსიმალისტური. ყველა პუნქტი და დებულება, რომელიც პაკეტში ეწერა, საქართველოს მიერ შესრულებული და დასრულებული იქნება,“ – განაცხადა თავდაცვის უწყების ხელმძღვანელმა სხდომის დასრულების შემდეგ.
კომისია წარმოადგენს NATO-საქართველოს პოლიტიკური კონსულტაციების ფორუმსა და პრაქტიკული თანამშრომლობის მექანიზმს, რომლის მიზანია დაეხმაროს საქართველოს ალიანსში გასაწევრიანებლად. კომისია ხელს უწყობს NATO-საქართველოს შორის პოლიტიკური დიალოგისა და ყველა შესაბამის დონეზე თანამშრომლობის გაღრმავებას.
