ჩოხატაურის საავადმყოფო-პოლიკლინიკის, შპს “ადითის” პრობლემები ჩვენი მკითხველისთვის უცხო თემა არ არის _ უხელფასობა და დაპირებები კარგა ხანია, მედპერსონალს თავის ტკივილად ექცა. შესაბამისად, საავადმყოფოში ხშირად გაიგონებთ _ “ჩვენ აქ კაპიკებზე ვმუშაობთ”, “არანაირი შემოსავალი არ გვაქვს”. თუმცა, როგორც ჩვენი რესპონდენტები ამბობენ, ამის გამო მოსახლეობა არ უნდა დაისაჯოს. მათი თქმით, ჩოხატაურის “ადითში” თანხას იმ ადამიანებსაც სთხოვენ, რომლებიც პოლისით სარგებლობენ.
რამდენიმე დღის წინ, ჩოხატაურის მუნიციპალიტეტის ერთ-ერთი სოფლის მკვიდრმა მშობიარე მეუღლე საავადმყოფოში გვიან ღამით მოათავსა. ოჯახი სიღარიბის ზღვარს ქვემოთ იმყოფება და მათ სამედიცინო პოლისიც აქვთ, რაც საავადმყოფოში თანხის გადახდისგან ათავისუფლებთ. ჩვენი რესპონდენტის თქმით, სამშობიაროში ექიმმა (რომლის ვინაობის დასახელებისგან თავს ვიკავებთ), ღამის ქირად 20 ლარი გამოართვა: _ ექიმმა მითხრა, რა იყო, გიჭირს ჩემთვის ფულის მოცემა, მეორედ რომ მოხვალ, პატივი ხომ უნდა გცეო?! _ ამბობს ჩვენი რესპონდენტი.
ჩოხატაურის საავადმყოფოს დირექტორი, თემურ კოროშინაძე ამბობს, რომ კომენტარს ამ საკითხთან დაკავშირებით, ბრალდების დასაბუთების შემდეგ გააკეთებს: _ გააჩნია, რისთვის გაათია ღამე(?!). თუ ის ოჯახი ოფიციალურად შემოვიდა სტაციონარში, დაფიქსირდა, სოციალურად დაუცველია, პოლისი უფინანსებს სამედიცინო მომსახურებას, არაფერს გადაიხდის, მაგრამ თუ მისი პოლისი, ან მისი ნოზოლოგია დაფინანსებას არ ექვემდებარება, მან უნდა გადაიხადოს. ოღონდ უნდა გადაიხადოს სალაროში და არა ვინმეს ჯიბეში. თუ ვიღაცამ ვიღაცას ჯიბეში ფული ჩაუდო, მაგაზე კომენტარს ვერ გავაკეთებ, სანამ ეს ბრალდება არ იქნება დასაბუთებული, _ აღნიშნა კოროშინაძემ.
_ ბატონო თემურ, როგორც ჩვენი რესპონდენტი ამბობს, ექიმმა მას ფული პირდაპირ მოსთხოვა და შეახსენა, რომ მეორედ მოსვლისას პატივისცემა დასჭირდებოდა… საინტერესოა, ჰიპოკრატეს ფიცის აღსრულება პაციენტის პატივისცემაა თუ ექიმის მოვალეობა?
_ ჰიპოკრატეს ფიცი, ეს არის მოვალეობა, რომელიც ყველამ უნდა შეასრულოს. მე მჭირდება კონკრეტული პიროვნების ვინაობა, რომელიც დამიფიქსირებს, რომ ეს ფაქტი ნამდვილად მოხდა და ამ საქმეს მიეცემა მსვლელობა. სხვა შემთხვევაში, რეაგირებას ვერ მოვახდენ.
_ ეს ერთადერთი პრეტენზია არ არის, რომელიც სამშობიარო განყოფილების მისამართით გამოთქვეს _ ჩვენი რესპონდენტის თქმით, ექოსკოპიის კაბინეტში, 7 თვის ორსულ 18 წლის გოგონას უთხრეს, რომ არ იცოდნენ, ბავშვი ცოცხალი იყო თუ არა. გულისცემა არ ისმისო და ქუთაისში გაუშვეს. ქუთაისში ჩასულებმა გაარკვიეს, რომ ბავშვს არანაირი პრობლემა არ ჰქონდა. ჩვენთან საუბარში გოგონას ოჯახის წევრებმა აღნიშნეს, რომ თქვენი სამედიცინო პერსონალის მიმართ ნდობა დაკარგეს და გეგმიურ კონსულტაციებზეც აღარ უნდოდათ მოსვლა.
_ არ არის გამორიცხული, რომ ამ საქმეში რამე საყურადღებო ნამდვილად იყო. მოგეხსენებათ, მედიცინა ზუსტი მეცნიერება არ არის. იმ კლინიკებიდანაც კი, სადაც ულტრათანამედროვე აპარატურა დგას, ხდება ხოლმე საკონსულტაციოდ სხვა სამედიცინო კლინიკებში გაგზავნა. ეს ჩვეულებრივი ამბავია, კონკრეტულად ამ შემთხვევაში, მე არ ვიცი, რა სიტყვებით გადასცეს პაციენტს, რომ ის საჭიროებდა კონსულტაციას. ცუდს ვერ ვხედავ იმაში, თუ ექიმს უნდა, პაციენტის ჯანმრთელობის მდგომარეობა გადაამოწმოს სხვა კლინიკაში. ამ ფაქტსაც დაკონკრეტება სჭირდება.
_ ეს ადამიანები, ვინაობას მხოლოდ იმიტომ არ ამხელენ, რომ შესაძლებელია, ისევ დასჭირდეთ საავადმყოფოში მოსვლა. ჩოხატაურში კი, სამწუხაროდ, სხვა საავადმყოფო არ არის…
_ პაციენტს შეუძლია, მოვიდეს მეორედ, მესამედ, როგორც მისი ჯანმრთელობა მოითხოვს. ექიმმა მას უნდა გაუწიოს დახმარება. ეს არის ცალსახად გაწერილი და დაფიქსირებული კანონი. თავს თუ იკავებენ, ეს არ არის იმის დასტური, რომ ფაქტი ნამდვილად მოხდა. კარგი იქნება, თუ ამის დაფიქსირება მოხდება, რათა შემდგომ ასეთი შემთხვევა აღარ განმეორდეს. ნებისმიერ შემთხვევაში, ექიმმა ავადმყოფს უნდა გაუწიოს დახმარება. მე ვთხოვ ყველას _ თუკი ვინმე დაუმსახურებლად მოითხოვს რამეს ან ადგილი ექნება არაეთიკურ ქმედებას, განაცხადოს ოფიციალურად. ავადმყოფის ტკივილი უნდა გეტკინოს, ისე ავადმყოფს ვერ უმკურნალებ. არავის ეგონოს, რომ გაცხადების შემდეგ აქ მოსული პაციენტი სამედიცინო მომსახურებას ვერ მიიღებს. როცა არაფრის გამო ექიმს კარებს ამტვრევენ თავზე, როცა ფიზიკურ შეურაცხყოფას აყენებენ, როცა ამ შენობის მინებს ამსხვრევენ, აი, მაშინ მართლა უნდა პრევენციული ზომების მიღება. ჩვენ ბევრჯერ შეგვიკეთებია კარები და ჩაგვისვამს მინები, რომელიც ზოგმა ნასვამ მდგომარეობაში, ზოგმა დაუმსახურებლად, ზოგმაც, უბრალოდ, უზრდელობის გამო დააზიანა. მოქალაქეს არ აქვს უფლება, ექიმს დაუმსახურებლად მიაყენოს შეურაცხყოფა, ისევე, როგორც ექიმს არ აქვს უფლება ავადმყოფს არ მიხედოს. კიდევ ერთხელ გეტყვით, რომ პაციენტს თუკი რამე აქვს გადასახდელი, უნდა გადაიხადოს მხოლოდ ამ დაწესებულების სალაროში და არა ვიღაცის ჯიბეში, _ გვითხრა კოროშინაძემ.
აღსანიშნავია, რომ ჩვენ მიერ გაჟღერებული ამ ინფორმაციებით ჯანდაცვის სამინისტროს მედიაციის სამსახური დაინტერესდა. როგორც მედიაციის სამსახურის წარმომადგენელმა ჩვენთან საუბარში აღნიშნა, საკითხს აუცილებლად შეისწავლიან.
