“სახლი თავზე უნდა დაემხოს პატრონს, დახმარება რომ გაუწიონ?”

22 წელია, რაც შოთა ბოლქვაძის ოჯახი ჩოხატაურის მუნიციპალიტეტის სოფელ ჩაისუბანში აჭარიდან ჩამოსახლდა. ბოლქვაძეები სოციალურად დაუცველი ოჯახების ნუსხაში არიან. როგორც შოთა ბოლქვაძის მიერ “გურია ნიუსისთვის” გამოგზავნილი წერილიდან ირკვევა, 22 წლის წინ შეძენილი მათი სახლი ავარიულ მდგომარეობაშია და იქ ცხოვრება შეუძლებელია.

“ვცხოვრობთ სოფელ ჩაისუბანში, სოციალურად შეჭირვებულები ვართ. 46 000 ქულა მივიღეთ. ვსარგებლობთ მწირშემოსავლიანი მიწის ნაკვეთით. ასევე ვარ მძიმე ავადმყოფი და სიარულიც მეკრძალება ექიმის მიერ; მხოლოდ ტკივილგამაყუჩებელი წამლების მიღების შემდეგ შემიძლია გადაადგილება. ჩემს სახლში ცხოვრება საშიშია, ყოველი ქარის ამოვარდნის დროს ველოდები სახლის დანგრევა-დაშლას. ოთახში მეტი სიცივეა, ვიდრე ქუჩაში, არ მაქვს გარემონტებისა და გათბობის საშუალება. რატომ ვიყიდე თავის დროზე 22 წლის წინ ძველი სახლი? მე აჭარიდან მიწის ეროზიის გამო ჩამოვსახლდი და სახლიც საშუალების მიხედვით ვიყიდე”, _ გვწერს ბოლქვაძე.

მისივე წერილიდან ირკვევა, რომ ჩოხატაურის გამგეობას დახმარებისთვის რამდენჯერმე მიმართა: _ 2008 წელს რომ განცხადება დავწერე, მიპასუხეს, ახლა საშუალება არ გვაქვს და შემდგომისთვის გავითვალისწინებთო. 2010 წელს განმეორებით მივმართე, მაგრამ პასუხიც ვერ მივიღე. 2011 წლის 11 აგვისტოს კიდევ მივმართე გამგებელს განცხადებით. კანონით განსაზღვრულ დროში რომ პასუხი ვერ მივიღე, პასუხის გასაგებად, გამგეობაში ჩემი შვილი გავაგზავნე. გამგეობის სოციალური სამსახურის უფროსმა უთხრა, ჩვენ ამოვალთ მდგომარეობის შესამოწმებლად და პასუხსაც ამოგიტანთო. არ ამოვიდნენ. არც პასუხი გამოაგზავნეს. მეოთხედ, 2011 წლის ბოლოს დავწერე განცხადება და ამჟამინდელ გამგებელს, ლელა იმედაშვილს პირადად ვესტუმრე. იმედაშვილმა მითხრა, რომ 2011-ში ვერ დამეხმარებოდა, რადგან ფონდი იყო ამოწურული. დამპირდა, რომ გამოაგზავნიდა კომისიას შესასწავლად და 2012 წლისთვის დამეხმარებოდა. გამგებელს ისიც ვთხოვე, რომ თუ დახმარებას ვერ შეძლებდა, თავშესაფარი მაინც გამოენახა, რადგან წინ ზამთარი იყო. მართალია, ამოვიდნენ და შეამოწმეს ჩემი სახლი, თუმცა არც დახმარება გამომიყვეს და არც თავშესაფრით უზრუნველმყვეს, _ წერს ბოლქვაძე.

ბოლქვაძე ამბობს, რომ დამოუკიდებლად შეაგროვა ყველა ის დოკუმენტი, რომელიც დახმარების მისაღებად არის საჭირო და გამგეობის მისაღებში 13 იანვარს დატოვა, თუმცა პასუხი დღემდე არ მოუღია: _ მოგმართავთ თქვენ და გთხოვთ, ეგებ თქვენ გამარკვიოთ, თუ რას გვიპირებენ. სავალდებულოა, სახლი დაემხოს მეპატრონეს თავზე, იმსხვერპლოს რომელიმე წევრი ან ყველა, რომ დახმარება გაუწიონ? _ გვწერს ბოლქვაძე.

“გურია ნიუსი” შოთა ბოლქვაძეს სახლში ესტუმრა. ბოძებზე შემდგარი სახლი სიძველისგან მართლაც იშლება და სასწრაფოდ შეკეთებას საჭიროებს.

როგორც ბოლქვაძემ ჩვენთან საუბრისას აღნიშნა, უსახსრობის გამო, რამდენიმე წელი უშუქოდ იყვნენ. შუქი 2011 წლის 31 დეკემბერს ჩაურთეს.

_ ჩოხატაურის მუნიციპალიტეტის გამგეობამ ერთჯერადი დახმარების სახით 150 ლარი მომცა. ამ თანხით მხოლოდ შუქის დავალიანების გადახდა მოვახერხე, _ აღნიშნა ბოლქვაძემ “გურია ნიუსთან” საუბრისას.

ჩოხატაურის მუნიციპალიტეტის გამგებელი, ლელა იმედაშვილი ამბობს, რომ ძირითადი დახმარება სტიქიისგან დაზიანებული სახლების მეპატრონეებზე გაიცემა.

_ ყველა განცხადება სახლებთან დაკავშირებით იხილება. ჯერჯერობით, არ ვართ საბოლოოდ ჩამოყალიბებული რომელი სახლები იქნება ეს, მაგრამ ჩვენ რეალური საჭიროებების მიხედვით გავცემთ დახმარებას. ძირითადად, დახმარება გაიცემა სტიქიისგან (მეწყერისგან და წყალდიდობისგან) დაზიანებულ სახლებზე. პირველ რიგში ჩვენ ამ კატეგორიის სახლებს განვიხილავთ და შემდეგ მოვარგებთ რეალურ ბიუჯეტს, იმიტომ რომ სიძველის გამო როცა არის სახლი ავარიული, ამის განხილვა ჯერ ძნელი იქნება. ჯერ არ გვაქვს საბოლოო გადაწყვეტილება მიღებული, თუ რომელ სახლებს შევაკეთებს პირველ ეტაპზე, _ თქვა ჩვენთან საუბრისას იმედაშვილმა.