ოზურგეთის მუნიციპალიტეტის სოფელ ლიხაურში, სახალხო დღესასწაული "ექვთიმეობა" დღის ოთხ საათზე სავედრებელი პარაკლისის გადახდით დაიწყო.
ექვთიმე თაყაიშვილის სახლ-მუზეუმის დირექტორი, რუსლან ურუშაძე ამბობს, რომ "ექვთიმეობა" უკვე ტრადიციულად იმართება და ეს მომავალშიც გაგრძელდება.
" მეხუთედ აღინიშნება ექვთიმეობა, მას შემდეგ, რაც შეიქმნა ექვთიმე თაყაიშვილის სახლ-მუზეუმი სოფელ ლიხაურში. გილოცავთ, ყველას ამ დღეს." -თქვა რუსლან ურუშაძემ.
ჩვენს მიერ მოპოვებული ინფორმაციით, 1982 წელს, 30 მაისს ლიხაურში საბჭოთა ხელისუფლების ინიციატივით დაწესდა "ექვთიმეობის" აღნიშვნა.
"როგორც ამბობენ, კომუნისტების დროს ტარდებოდა ექვთიმეობა დიდი მასშტაბებით. 80-იან წლებში გაიხსნა ექვთიმე თაყაიშვილის ძეგლი, რომლის ავტორი იყო, ლიხაურელი მოქანდაკე რობერტ გოგოლიშვილი, არქიტექტორი კი ანზორ გომართელი. ეს ღონისძიება რესპუბლიკის მასშტაბით იგეგმებოდა, ყველა ცნობილი მეცნიერი ლიხაურში იყო, მაგრამ ზუსტი დღე არ იყო დადგენილი, უფრო მეტად გაზაფხულზე ტარდებოდა. სახალხო ზეიმი იყო, გაშლილი სუფრებით, სამეცნიერო კონფერენციებით და ა.შ. ოღონდ 90-იან წლებში შეჩერდა და 2010 წელს აღდგა", _ ამბობს რუსლან ურუშაძე.
"ყველას გილოცავთ დღევანდელ დღეს. დღეს "ექვთიმეობა" აღინიშნება ოზურგეთის მუნიციპალიტეტში და ყველას მადლობას მოგახსენებთ მობრძანებისთვის. მე დარწმუნებული ვარ, რომ ყოველწლიურად მასშტაბები შეიცვლება ამ დღის აღნიშვნის."- თქვა ოზურგეთის მუნიციპალიტეტის გამგებელმა, მერაბ ჭანუყვაძემ.
პარაკლისის გადახდის შემდეგ მოეწყო კონფერენცია თემაზე "ექვთიმე თაყაიშვილის ცხოვრება და მოღვაწეობა".
ღონისძიების მეორე ნაწილი კულტურულ ღონისძიებებს დაეთმო, გაიმართა გალა კონცერტი ანსამბლ "ქართული ხმებისა" და მომღერალ მაკა ზამბახიძის მონაწილეობით. კონცერტში ასევე მონაწილეობამიიღო ფოლკლორული და ქორეოგრაფიული ანსამბლებმა: "შემოქმედი", "იადონი", "ურეკი", "ბალავარი", "ზენაარი".
კონცერტის შემდეგ ოზურგეთის მუნიციპალიტეტის სხვადახვა სოფლის წარმომადგენლებმა სპეციალურად მოწყობილ კუთხეებში ადგილობრივი წარმოების პროდუქტები გამოფინეს.
ღონისძიების ორგანიზატორები უყვნენ: ოზურგეთის მუნიციპალიტეტის გამგეობის კულტურის, სპორტისა და ტურიზმის განვთარების სამსახური, ა (ა) ი. პ. "ოზურგეთის მუნიციპალიტეტის კულტურის, სპორტისა და ტურიზმის განვითარების ცენტრი".
სახალხო ზეიმს ესწრებოდნენ გურიის გუბერნატორი გია სალუქვაძე, გუბერნატორის მოადგილეები, ქალაქ ოზურგეთის მერი, საკრებულოს თავმჯდომარე და სხვა ოფიციალური პირები.
