– დღეს დადგინდა ეს წესები, დაუკონკრეტა საკრებულოს თავმჯდომარის თანაშემწემ “გურია ნიუსის” კორესპონდენტებს გიორგი გირკელიძეს და ჟანა მეგრელიშვილს, რომლებიც ოზურგეთის მუნიციპალიტეტის ადმინისტრაციის შენობის მიმდებარე ტერიტორიაზე იმყოფებიან. საკრებულოს თავმჯდომარის თანაშემწემ მათ განუცხადა, რომ ის არაკომპეტენტურია და განმარტებას ვერ გააკეთებს, თუ რატომ არ უშვებენ ჟურნალისტებს ადმინისტრაციულ შენობაში, სადაც ოზურგეთის მუნიციპალიტეტის გამგეობა, საკრებულო, გურიის სამხარეო ადმინისტრაცია, საოლქო საარჩევნო კომისია და განათლების რესურსცენტრია განთავსებული. როგორც “გურია ნიუსს” “საქართველოს ახალგაზრდა იურისტთა ასოციაციის” ოზურგეთის ოფისის ხელმძღვანელმა თამაზ ტრაპაიძემ უთხრა, თუ რომელიმე ადმინისტრაციულ შენობაში შესვლასთან დაკავშირებით სპეციალური ნებართვაა საჭირო, უნდა არსებობდეს შესაბამისი ადმინისტრაციული აქტი. ამასთან, ნებისმიერ დაინტერესებულ პირს უნდა ჰქონდეს საშუალება, წინასწარ იცოდეს იგი, რადგან რეგულაცია ქცევის ზოგად წესს ეხება და იგი ნორმატიული ხასიათისაა. წინააღმდეგ შემთხვევაში, ირღვევა ზოგადი ადმინისტრაციული კოდექსის მოთხოვნები.
_ ბატონო თამაზ, ვის უნდა დაეკისროს პასუხიმგებლობა კოდექსის დარღვევისთვის?
_ რაც შეეხება იმას, პასუხისმგებლობა ვის ეკისრება, რა თქმა უნდა, ადმინისტრაციის ხელმძღვანელს. მას უნდა მიეღო სათანადო წესით ადმინისტრაციულ შენობაში პირთა შესვლის შეზღუდვა.
_ ითვლება თუ არა ეს ჟურნალისტის საქმიანობაში ხელის შეშლად?
_ თუ მართლაც არსებობს ადმინისტრაციული აქტი და ყველა პირზე ვრცელდება, იმ შემთხვევაში არა, მაგრამ თუ სხვა პირებისგან განსხვავებით, კონკრეტულად, როგორც ჟურნალისტს ეზღუდება უფლება, შეიძლება, აღვიქვათ ჟურნალისტის საქმიანობის ხელის შეშლად, რაც სისხლის სამართლის დანაშაულია და ისჯება სისხლის სამართლის კოდექსის 154-ე მუხლით და ისჯება სისხლის სამართლის კოდექსის 154-ე მუხლით, _ გვითხრა ტრაპაიძემ.
და აღნიშნა, რომ ადმინისტრაციული წარმოების დროს დაკითხვაზე დასწრების უფლება აქვს ნებისმიერ დაინტერესებულ პირს, მათ შორის, ჟურნალისტსაც. რა თქმა უნდა, თუ დასაკითხი პირის სურვილი იქნება.
