ამჯერად “ხანძარი” ფასებს გაუჩნდა

ხანძარმოდებული ტყე-ველის თემა მთელ საქართველოში, ჰაერის ტემპერატურის ვარდნასთან ერთად მინელდა. სამაგიეროდ, ოზურგეთში, ახალი წლის მოახლოებასთან ერთად, მზა პროდუქტსა თუ სხვადასხვა ნახევარფაბრიკატზე ფასების შემპარავი ზრდა ყოველდღიურად იგრძნობა.  ცეცხლი ახლა ბაზრებსა თუ მაღაზიებში “მძვინვარებს,” _  ყველაზე თვალშისაცემი ზეთის ფასის კვლავ 40-50 თეთრით მატებაა _ ახლა ერთი ლიტრი ზეთის ფასი 4-დან 5 ლარამდე მერყეობს. მხოლოდ ერთი დასახელების (“ოლეინა”) _ ღირს 3 ლარი და 90 თეთრი. სხვადასხვა დასახელების ძეხვის ფასი საშუალოდ 30-35 თეთრით არის გაზრდილი. ვანილსაც კი, რომელიც 10 თეთრი ღირდა, ამ ფასში ახლა აქა-იქ თუ ნახავთ და მისი ღირებულება 15-20 თეთრის ფარგლებში მერყეობს. ასევე, ხორბლის ფქვილის ფასის ზრდასთან ერთად, მოიმატა მაკარონის ნაწარმის ფასმაც.
ჯერჯერობით, მიუხედავად მითქმა-მოთქმისა, შაქრის ფასი სტაბილურია _ იგი 2-დან 2 ლარსა და 20 თეთრამდე მერყეობს. თუმცა, ხშირად გვესმის, რომ მალე ერთი კილოგრამი შაქრის ფასი 3 ლარს მიაღწევს, საახალწლოდ კი 4 ლარი გახდება. იმის გასაგებად, თუ ვისი გავრცელებულია ეს ხმები, მართლა არსებობს თუ არა შაქრის ასე გაძვირების საფრთხე, “გურია ნიუსი” ოზურგეთის არაერთ მარკეტსა და ბაზარს ეწვია. ზოგან გამყიდველებმა (მაგალითად, აბაშიძის ქუჩაზე) პირდაპირ მოგვახალეს, დიახ, 1 კგ შაქრის ფასი მალე 3 ლარი გახდებაო. კითხვაზე, თუ საიდან იციან ეს, გვიპასუხეს, ახალი წელი მოდის და იმიტომო.
კვლავ დასმულ კითხვაზე, ვინ დაადგინა, რომ ახალი წლის მოახლოებასთან ერთად, შაქრის ფასი ხელაღებით გააორმაგოს, ვინ და _ მიშამ (?) თქვენ ჭურში ზიხართო? _ გვიპასუხეს. მიუხედავად ბევრი მოვაჭრის განმარტებისა, რომ “ოპტავოი” ფასმა თითქმის ყველა დასახელების პროდუქტზე მოიმატა, აშკარაა, რომ ზოგი მოვაჭრე საახალწლოდ ფასების ზრდას თვითნებურადაც გეგმავს და აქედანვე ცდილობს, რომ ხალხს ყური შეაჩვიოს მოახლოებულ საფრთხეს, ან სულაც ადრიანად განაწყოს საახალწლო ვაჭრობისთვის ადამიანები, რადგანაც თავადაც სარფიანი დახლი დაუდგეს.
რაც შეეხება აგრარულ ბაზარს, სიძვირე აქაც იგრძნობა: 1 კგ ყველი 8 ლარი ღირს, 1კგ ხორცი _ 9 ლარი. რაც შეეხება სხვადასხვა სახის  ბოსტნეულს,  მისმა ფასმა, საშუალოდ, 15-20 თეთრით მოიმატა, თუ არ ჩავთვლით ნიორს, რომელსაც მართლა ცეცხლი უკიდია და 1 კილოგრამი 10 ლარი ღირს. იმატა ცოცხალი ფრინველის ფასმაც _ ქათამს, საშუალოდ, 20-25 ლარს აფასებენ.
როგორც ბაზარში გვითხრეს, ჯერ სად ხართ, 25 დეკემბრის შემდეგ მოდით და რაც ნახეთ, იმაზე უარესს ნახავთო. უეჭველია, “გურია ნიუსი” საკალანდო ფასების თემას გურიაში, წლის ბოლომდე კვლავ მიუბრუნდება.