ოზურგეთის მუნიციპალიტეტის საკურორტო ზოლში, ურეკი-შეკვეთილში, ზღვიდან 100 მეტრი დაშორებით, მშენებლობის უფლება, სავარაუდოდ, ძალიან მალე, არავის ექნება _ აღნიშნულ საკითხი ოზურგეთის მუნიციპალიტეტის საკრებულოზე უნდა დამტკიცდეს
"გურია ნიუსს" ის მოქალაქეები დაუკავშირდნენ, რომლებიც ურეკი-შეკვეთილში, ზღვიდან 100 მეტრის ზოლში, მიწის ნაკვეთებს ფლობენ. როგორც მათ გვითხრეს, თუ ოზურგეთის მუნიციპალიტეტის ადგილობრივი ხელისუფლება გადაწყვეტს, რომ მათ უფლება არ მისცენ, ააშენონ ან სასტუმრო, ან პატარა "ბუნგალო", ეს იქნება ძალიან ცუდი პრეცედენტი და დღევანდელი მთავრობის დიდი მინუსი, რადგან მიწის მფლობელებს მიაჩნიათ, რომ მათი უფლებები ირღვევა.
"წინა ხელისუფლება სწორედ ასეთი მეთოდებით უზღუდავდა ადამიანებს პატარა ბიზნესსაქმიანობას და ატერორებდა მათ. დღეს, ჩვენ, მიწის მფლობელებს მშენებლობის უფლებას არ მოგვცემენ? თუ ჩვენ გვერდით, სადაც ჩვენი მიწაა, იქ სხვებს აქვთ სასტუმროები, კაფე-ბარები და ასე შემდეგ, ჩვენ რატომ არ უნდა გვქონდეს? ამით ჩვენი უფლებები არ ირღვევა? ამ ზოლში უკვე ყველგან გაიყვანეს გაზი, მაშინ რატომ გაიყვანეს, თუ მშენებლობის აკრძალვას აპირებდნენ? იქნებ, გაგვარკვიოთ, რა და როგორ იქნება ამასთან დაკავშირებით,"_ უთხრეს "გურია ნიუსს" იმ ადამიანებმა, რომლებსაც, მათი თქმით, მშენებლობის უფლებას არ აძლევენ.
ოზურგეთის მუნიციპალიტეტის საკრებულომ, რამდენიმე დღის წინ, ოზურგეთის მუნიციპალიტეტის ურეკი-შეკვეთილის ტურისტული სარეკრეაციო კომპლექსის მიწათსარგებლობის გენერალური გეგმის მესამე ეტაპი განიხილა.
როგორც მაშინ საკრებულოს თავმჯდომარემ დავით დარჩიამ განმარტა, საკრებულომ უკვე დაამტკიცა გეგმის მეორე ეტაპი: "ჩვენი პოზიცია _ განვითარებისთვის აუცილებელია აღნიშნული გეგმის პრაქტიკაში რეალიზება", _ თქვა დარჩიამ საკრებულოს სხდომაზე.
ურეკი-შეკვეთილის ტურისტული სარეკრეაციო კომპლექსის მიწათსარგებლობის გენერალური გეგმა შპს "არტსტუდიოს" მიერ შემუშავდა და ოთხ ეტაპს მოიცავს. პირველ და მეორე ეტაპთან დაკავშირებით, ოზურგეთის მუნიციპალიტეტის საკრებულომ შესაბამისი ნორმატიული აქტები უკვე მიიღო, ხოლო მესამე ეტაპი საკრებულოს უახლოეს სხდომაზე უნდა დაამტკიცონ _ აღნიშნული გეგმა ზღვიდან 100 მეტრ ზოლში მშენებლობის შეზღუდვას ითვალისწინებს.
ოზურგეთელი დავით მახარაძე ამბობს, რომ მას ურეკში, ზღვიდან 100 მეტრ ზოლში პატარა, ძველი სახლი აქვს და აპირებს ახალი, პატარა სასტუმროს ჩადგმას:
"მე არ გამოვრიცხავ, რომ ჩემს მიწაზე ავაშენო ახალი სახლი. სახლი, რომელიც იქ დგას, არის ძველი. ჩემს შვილებს სურვილი აქვთ, რომ ააშენონ ან მინისასტუმრო ან პატარა კოტეჯი, თუ რა თქმა უნდა, ამის უფლებას მოგვცემენ. თუ არა, იძულების წესით, იძულებული ვიქნები, ისევ იმ, ძველ სახლში ვიცხოვროთ", _ ამბობს მახარაძე.
ოზურგეთის მუნიციპალიტეტის საკრებულოს თავმჯდომარე დავით დარჩია "გურია ნიუსთან" ამბობს, რომ საბოლოო გადაწყვეტილება აღნიშნულ საკითხთან დაკავშირებით ჯერ საკრებულოს არ მიუღია:
"ურეკის განაშენიანების გენერალური გეგმის პროექტი მზადდება. ტენდერი ეკონომიკის სამინისტრომ ჩაატარა და მასში მონაწილეობდნენ სხვადასხვა ფირმები. ტენდერში, რომელსაც მე და გამგებელი მერაბ ჭანუყვაძე ვესწრებოდით, გაიმარჯვა ფირმა "არტ სტუდიომ", რომელმაც სერიოზული ხედვები წარმოადგინა ამ საკურორტო ზოლის _ ურეკი -შეკვეთილის განვითარებისთვის. პროექტი დასრულებული არ არის _ გავლილია ორი ეტაპი. მეორე ეტაპის საჯარო განხილვა ურეკში მოეწყო. ნებისმიერ მსურველს ჰქონდა უფლება, დასწრებოდა მას და იქ პრეტენზია არავის გამოუთქვამს. დარწმუნებული ვარ, რომ ეს თუ გაკეთდება, გვექნება ერთ-ერთი საუკეთესო კურორტი. ზღვიდან 100 მეტრ ზოლში მშენებლობის ნებართვასთან დაკავშირებით შეზღუდვები უნდა დაწესდეს", _ ამბობს დარჩია და ურეკში, წინა წლებში უკანონო მშენებლობებთან დაკავშირებით განმარტავს:
_ ერთ რამეს ვეთანხმები _ ურეკში არეულობაა მშენებლობის კუთხით. ადრე ვინ რას აკეთებდა, ყურადღება არ ექცეოდა. დარღვევებით არის გაცემული მშენებლობის ნებართვები. თუ ჩვენ გვინდა, რომ ოზურგეთის მუნიციპალიტეტის ბიუჯეტის შემოსავლის წყარო გახდეს ურეკი, როგორც საკურორტო ზონა, მშენებლობებთან დაკავშირებით ნებართვების გაცემის წესში ცვლილება უნდა მოხდეს.
_ ბატონო დავით, ის ადამიანები, რომლებიც ფლობენ მიწის ნაკვეთებს და სურთ, ააშენონ სასტუმროები, საკუთარი უფლებების დარღვევაზე საუბრობენ. მათ მიაჩნიათ, რომ ეს გადაწყვეტილება ბიზნესის განვითარებას ხელს შეუშლის. აღსანიშნავია ისიც, რომ მიწის ნაკვეთებს ფლობენ სხვადასხვა ქვეყნის მოქალაქეები…
_ ჯერჯერობით, ეს საკითხი საბოლოოდ გადაწყვეტილი არ არის _ კიდევ მოხდება ამ თემის საჯარო განხილვა საკრებულოზე. როგორც ვიცი, იმ ასმეტრიან ზოლში ერთსართულიანი შენობების დადგმაზე შეზღუდვა არ უნდა მოხდეს, არ უნდა გაკეთდეს იქ, ასე ვთქვათ, "ცათამბრჯენები". ვიღაცამ რომ მაღალი კორპუსები ააშენოს და დაჩრდილოს ტერიტორია, ამის უფლებას ნამდვილად ვერ მივცემთ ვერავის. კურორტის უნიკალურობა ის არის, რომ ეს მაგნიტური ქვიშა, რომელიც ურეკშია და რითაც ფასი ადევს ურეკს, თუ მოვსპეთ და გავანადგურეთ ასე ხელაღებით, რა საჭირო იქნება მაშინ სახლების ჩადგმა? სანამდე უნდა გაგრძელდეს ეს გაუთავებელი მშენებლობები? ამის გამო ფიჭვები უნდა მოვჭრათ? ჩემი მოსაზრება ასეთია _ ერთი ხეც არ უნდა მოიჭრას. არც კერძო საკუთრების დანგრევა მოხდება. და თუ მაინც დაინგრა რომელიმე კერძო ნაგებობა, მაშინ მის მფლობელებს გარკვეულ კომპენსაციას მისცემს სახელმწიფო", _ ამბობს დარჩია "გურია ნიუსთან" საუბრისას.
