ოზურგეთის მუნიციპალიტეტის სოფელ ნატანებში ციტრუსის აღება ჯერ არ დაწყებულა. სოფელში ჩასულებს გვითხრეს, რომ, სავარაუდოდ, მომავალ კვირაში დაიწყებენ კრეფას.
"გლეხის ნამუშევარს საერთოდ არ აქვს ფასი, თანაც, წელს ნაკლები მოსავალი გვექნება. ციტრუსს დაავადება გაუჩნდა, ძალიან ძვირი ჯდება წამლები და აქედან გამომდინარე, ხალხი ვერ პატრონობს. ციტრუსიდან შემოსული თანხით ხან წამლის ფულსაც ვერ ფარავენ. გასაღების კუთხით, რა გითხრათ, ჯერჯერობით, არ დაწყებულა ციტრუსის ჩაბარება და აქედან გამომდინარე, რას გადაგვიხდიან, არ ვიცით", _ გვითხრეს სოფელ ნატანების მცხოვრებლებმა.
შპს "კიდობანის" დამფუძნებელი და ოზურგეთის მუნიციპალიტეტის საკრებულოს დეპუტატი დავით სიხარულიძე: "ვფიქრობ, რომ წელს ხარისხიანი ციტრუსის გასაღებას პრობლემა არ შეექმნება. მით უმეტეს, როდესაც მოსახლეობას ჩვენი ტრანსპორტით მივაწვდით ყუთებს და ჩვენივე ტრანსპორტით წამოვიღებთ პროდუქტს. ინტენსიურად ვმუშაობთ, რომ გარკვეული მარაგები შევქმნათ ყუთებთან დაკავშირებით, ქარხანა კი მზად არის, რომ მიიღოს, გადაამუშავოს და ექსპორტირება გაუკეთოს სუბტროპიკულ ხილს. აქ მხოლოდ მანდარინზე არ არის საუბარი _ შეიძლება ვიგულისხმოთ კივი და ლიმონი, ფორთოხალი და ა. შ." _ თქვა სიხარულიძემ.
მისივე თქმით, წელს გურიაში და მის მიმდებარე ზოლში ნაკლებია მოსავალი, აჭარაში კი კარგ მოსავალს ელოდებიან: _ რაც აჭარაში ეღირება ციტრუსი, იმაზე ნაკლები ფასი ჩვენთან არ იქნება.
სოფლის მეურნეობის სამინისტროს მიერ მოწოდებული ინფორმაციით, ციტრუსის ექსპორტი, ძირითადად, გახორციელდება უკრაინაში, ბელორუსში, რუსეთში, სომხეთში, აზერბაიჯანსა და ყაზახეთში.
სამინისტროში, ასევე, გვითხრეს, რომ საქართველოს მთავრობის ხელშეწყობით, სოფლის მეურნეობის სამინისტრომ და სოფლის მეურნეობის პროექტების მართვის სააგენტომ სამრეწველო გადამუშავებისთვის განკუთვნილი მანდარინის რეალიზაციის ხელშემწყობი ღონისძიებები უკვე დაიწყო. კომპანიები, რომლებიც 1 კგ. სამრეწველო გადამუშავებისთვის განკუთვნილ მანდარინს არანაკლებ 20 თეთრად შეისყიდიან, სოფლის მეურნეობის პროექტების მართვის სააგენტოსგან 1 კგ. მანდარინზე 10 თეთრის ოდენობის სახელმწიფო სუბსიდიას მიიღებენ.
მანდარინის რეალიზაციის ხელშეწყობის პროგრამის ბიუჯეტი 2 000 000 ლარია. პროგრამა 2016 წლის პირველ თებერვლამდე გაგრძელდება.
მიმდინარე წლის ციტრუსის სეზონზე იმუშავებს ციტრუსის შემფუთავი 30-მდე საწარმო, სადაც პლასტმასის, მუყაოსა და შპონის (ხის) ტარაში პროდუქციის შეფუთვა, პაკეტებად შეკვრა და ექსპორტირებისთვის მომზადება მოხდება.
ჩვენთვის ცნობილი გახდა, რომ მიმდინარე წელს, ქობულეთის საკონსერვო ქარხანა სტანდარტულ მანდარინს მიიღებს. წარმოებული იქნება ციტრუსის კონცენტრატი, საიდანაც დამზადდება წვენი, რომელიც მიეწოდება რეგიონის სამომხმარებლო ბაზარს. ასევე, დაგეგმილია პროდუქციის ექსპორტი იაპონიაში, ჰოლანდიასა და ისრაელში.
ცნობილი ხდება, რომ გურიაში, ნატანებში იმუშავებს ციტრუსის დამახარისხებელი საწარმო. გარდა ამისა, სამრეწველო მანდარინის (ენესის) ჩასაბარებლად შესაძლებელია ქობულეთის ორი საწარმოთი სარგებლობა.
"ჩვენი ვარაუდით, ციტრუსის სეზონზე არანაირი პრობლემა არ იქნება არც რეალიზაციის და არც სამრეწველო გადამუშავების თვალსაზრისით. მოსახლეობა არასტანდარტულ ციტრუსს ყრიდა, ჩვენ კი რეალურად ვთავაზობთ დახმარებას, რომ არ გადაყარონ და სარგებელი ნახონ. ეს იყო ყველაზე რთული მიმართულება ციტრუსის რთველის პერიოდში და ჩვენ ეს პრობლემა გადავჭერით ჯერ კიდევ შარშან. წელს კი ამ მხრივ პრობლემებს არ ველოდებით. არასტანდარტულ მანდარინში საწარმოსგან, მინიმუმ, 20 თეთრს მიიღებენ, მათ შორის, იქნება სახელმწიფო სუბსიდია 10 თეთრი _ ანუ, 10 თეთრს გადაიხდის ქარხანა, 10 თეთრს სახელმწიფო და გლეხი მიიღებს გარანტირებულ 20 თეთრს", _ აღნიშნა მედიის წარმომადგენლებთან სოფლის მეურნეობის მინისტრმა ოთარ დანელიამ.
