ბიზნესმენ ფადი ასლისა და პარლამენტარ თამაზ მეჭიაურს შორის დაწყებულ ონლაინ დაპირისპირებაში, ია ფარულავას მეუღლე მუსიკოსი ტარიელ სუარიც ჩაერთო. სუარი მეჭიაურს იმ განცხადების გამო სთხოვს პასუხს, რომელიც პარლამენტარმა ფადი ასლის მისამართით გააკეთა და რომელშიც ია ფარულავაა ნახსენები:
”ბატონო მეჭიაურო თქვენი თანამდებობიდან გამომდინარე ნამდვილად არ გაგიჭირდებათ გერმანიის სასამართლოში გადაამოწმოთ საქმე, რომლის მიხედვითაც ოდესღაც ერთ-ერთ წარუმატებელ ადამიანს მოვატეხე ყბა, რის შედეგადაც მან უკეთესად დაიწყო საკუთარი საქმის კეთება.
რომ არა თქვენი ასაკი, იას ხსენების გამო, თქვენი ყბაც იგივე ხვედრს გაიზიარებდა.
თქვენ არა მხოლოდ ბატონი ბიძინას სახელს არცხვენთ, არამედ მთელი პარტიისას! ამ ასაკში არ გეკადრებათ ასეთი რამ!
რაც შეეხება ფადი ასლს. საქართველოში მრავალწლიანი ცხოვრების შემდეგ, თუნდაც ჩვენი ქვეყნის სიყვარულისა და პატივისცემის ნიშნად ურიგო არ იქნებოდა ქართულად საუბარი მაინც ესწავლა.”- წერს სუარი ფეისბუქის საკუთარ გვერდზე.
შეგახსენებთ, რომ საქართველოს ვაჭრობის საერთაშორისო პალატის პრეზიდენტმა, ბიზნესმენმა ფადი ასლიმ სოციალურ ქსელში საქართველოს პარლამენტის წევრის თამაზ მეჭიაურის შესახებ პოსტი გამოაქვეყნა:
"თამაზ მეჭიაური ერთ ძველ აღმოსავლურ ანდაზას მაგონებს: „სულთნის ძაღლს თავი სულთანი ეგონაო“ _ წერს ფადი ასლი.
პოსტს პოსტით უპასუხა მეჭიაურმა:
"შენ იმის ასლადაც ვერ გამოდექი, რაც იას სჭირდება" _ ასე უპასუხა ბიზნესმენს საქართველოს საპარლამენტო უმრავლესობის წევრმა და "ქართული ოცნების" ერთ-ერთმა სახემ.
