უმწეოთა სასადილოდან დაწყებული სიყვარული

130 ბენეფიციარი, მათი ყოველდღიურობა და უმწეოთა სასადილოდან დაწყებული, ქორწინებით დაგვირგვინებული სიყვარული.
სოციალურად დაუცველი ადამიანებისთვის უფასო სასადილოები თითქმის ყველა რეგიონში ფუნქციონირებს, მათ შორის ოზურგეთის მუნიციპალიტეტშიც. უპოვართა კვებისთვის ბიუჯეტიდან მიმდინარე წელს 62 500 ლარია გამოყოფილი. 2011 წლის ბიუჯეტის პროექტის თანახმად, მიუხედავად იმისა, რომ პროდუქტები საგრძნობლად გაძვირდა, დაფინანსების გაზრდა მხოლოდ 2 500 ლარით იგეგმება.
“გურია ნიუსმა” უმწეოთა სასადილოში მონიტორინგი ჩაატარა. მენიუ თვალსაჩინო ადგილზეა გამოკრული, სადილს ყოველდღე ორი მზარეული ამზადებს და მზრუნველობამოკლებულებს ცხელი კერძით უმასპინძლდებიან.
როგორც გავარკვიეთ, სადილი 13:00 საათზე უკვე მზად აქვთ, ეს იმათთვის, ვისაც განკუთვნილი ულუფა სახლში მიაქვს, ხოლო დაახლოებით 40-მდე ბენეფიციარი სადილს ადგილზე მიირთმევს.
“გურია ნიუსმა” ის ადამიანები გამოკითხა, ვინც ყოველდღე  სასადილოში სადილობს. როგორც ისინი ამბობენ, გემრიელ სადილს დროულად და ყოველდღე მიირთმევენ:
“წვნიანს ყოველდღე ვჭამთ, ხორცს კვირაში _ ოთხჯერ, დესერტად კი ხილის წვენი გვაქვს. სამწუხაროდ, ასე წავიდა ჩემი ცხოვრება _ მარტოხელა ვარ და უკვე ისეთი ასაკი მაქვს, სადილის მომზადებაც მიჭირს. ამიტომ ხშირად აქ ვჭამ. როცა შეუძლოდ ვარ, მეზობელი მოდის და მას ატანენ ჩემს ულუფას”, _ გვითხრა 72 წლის ქალბატონმა.
“სულ გემრიელ საჭმელს აკეთებენ, ყოველდღე დავდივარ.  გუშინ არ შემეძლო და მეზობელი გამომეგზავნა. მე მყოფნის, ბებო, რასაც მაჭმევენ, მეუბნებიან კიდეც, გაგატანთ სახლშიო, მაგრამ არ მინდა”, _ გვითხრა კამოს ქუჩაზე მცხოვრებმა 69 წლის ქალბატონმა.
შემოდგომის დასაწყისში, უფასო სასადილოს ბენეფიციარებმა _ 45 წლის მამაკაცმა და 44 წლის ქალბატონმა იქორწინეს. მათ ერთმანეთი აღნიშნულ სასადილოში, 2 წლის წინ გაიცნეს, შემდეგ დაახლოვდნენ, როგორც ამბობენ, შეუყვარდათ ერთმანეთი და სექტემბერში დაქორწინება გადაწყვიტეს.
როგორც უფასო სასადილოს ხელმძღვანელი ოლეგ შარაშენიძე ამბობს, საახალწლოდ, ტრადიციულ სადღესასწაულო სადილს გეგმავს. სურთ, წყვილის დაქორწინება საზეიმოდ აღნიშნონ.
შარაშენიძის თქმით, დღეის მდგომარეობით, სადილი 130 ბენეფიციარისთვის მზადდება. აქედან უმრავლესობას სახლში მიაქვს, რატომღაც ასე ამჯობინებენ. დაახლოებით, 40-მდე ბენეფიციარი კი სასადილოში
სადილობს. მათ შორის არიან ახლომდებარე სოფლების მცხოვრებლებიც. განსაზღვრული მენიუ ყველა რეგიონში იდენტურია.
_ რამდენად საკმარისია ბიუჯეტით გამოყოფილი თანხა, გაძვირებული პროდუქტების  ფასებს თუ გავითვალისწინებთ?
_ 2011 წლისთვის დღევანდელი ფასებით წარვადგინეთ პრეისკურანტი. მგონი, დაამტკიცებენ. ეს მუნიციპალიტეტის პროექტია, მე, უბრალოდ დაქირავებული ვარ. ვფიქრობ, ყველაზე კარგი პროექტია იმ კუთხით _ 130 ადამიანი, ასე თუ ისე, დაპურებულია. ზოგადად ცუდია, ამ საკითხზე, ამ კონტექსტში, რომ გვიწევს საუბარი, მაგრამ რეალობის ფონზე, ესეც რომ არ იყოს, რა უნდა ქნან ამ ადამიანებმა?
_ 62 ათასი ლარიდან, საკვები პროდუქტების შეძენისთვის, თვეში რამდენი იხარჯება?
_ დაახლოებით, 3 600 ლარზე მეტი. ახლა საგრძნობლად მოიმატა ფასებმა. ამას ემატება კომუნალური გადასახადები, წყალი, გაზი, დენი და მოსამსახურე პერსონალის შენახვა. ზამთარში დენის გადასახადი იზრდება, რადგან ელექტრო ღუმელით ვათბობთ სასადილო ოთახს. რადგან ბუნებრივი გაზი არ არის შემოყვანილი, ბალონს კვირაში რამდენჯერმე ვტუმბავთ. ახალი წლიდან, შესაძლოა, ბენეფიციარების შემადგენლობა შეიცვალოს _ ზოგი მიდის, შვილს მიჰყავს, ზოგიც სამწუხაროდ, გარდაიცვალა. რამდენი განცხადებაც შემოვიდა, ყველა დავაკმაყოფილეთ. ამ რიცხვს, რომც გინდოდეს, ვერ გაზრდი. რადგან ამას ინვენტარიზაცია სჭირდება, არც დარბაზში დაეტევა ამდენი ადამიანი. თუმცა, ამ ეტაპზე, განცხადებებით თუ ვიმსჯელებთ, არც მოთხოვნილებაა.
_ ისეთები არ არიან, ვისი სოციალური მდგომარეობაც შეიცვალა?
_ არა, სამწუხაროდ ასეთები არ არიან. თუმცა, სასურველია, იცვლებოდეს მათი სოციალური მდგომარეობა.
_ პროდუქტებს ყოველდღიურად ყიდულობთ?
_ აბსოლუტურად, ყოველდღიურად. დილით ადრე ვყიდულობთ პროდუქტებს. მარაგს ვერ დავაწყობთ _ არ მიმაჩნია მართებულად და ფიზიკურადაც ვერ დაატევ 130 ადამიანისთვის განკუთვნილ პროდუქტს. გვირჩევნია, ახალ-ახალი და ყოველდღე შევიძინოთ. იმის გამო, რომ წიწიბურა ძალიან გაძვირდა და დეფიციტურიც იყო, ერთი თვის ვადით ამოვიღეთ მენიუდან და ვერმიშელით ჩავანაცვლეთ. ახლა შემოვიდა ბაზარზე, მაგრამ ძალიან ძვირია. იანვარში არსებული ფასებით შედგენილი პრეისკურანტის თანახმად, იგივე წიწიბურა 1.40 თეთრი ღირდა, ახლა კი ხუთ ლარამდე გაიზარდა მისი ფასი. მთავარია, ბენეფიციარები იყვნენ კმაყოფილნი. მოდით, ნებისმიერ დროს და შეამოწმეთ პროდუქტების ხარისხი, სადილის მომზადების პროცესი და ჰიგიენა.
_ საერთაშორისო ფონდები, არასამთავრობო ორგანიზაციები ან კერძო მეწარმეები გეხმარებიან?
_ არა. ადგილობრივი ბიუჯეტი გვაფინანსებს მხოლოდ.
მზარეულების თქმით, მათი სამუშაო დღე 9:30 წუთიდან იწყება და 16:00 საათამდე გრძელდება, ამ დროის მონაკვეთში, ისინი ახერხებენ პირველი, მეორე  კერძი და დესერტი _ ხილის კომპოტი მოამზადონ. სადილობის შემდეგ კი სასადილო დაასუფთავონ. როგორც ისინი ამბობენ, ერთის მხრივ სასიამოვნოა, როცა უმწეოს უმასპინძლდები, ხოლო მეორეს მხრივ, რთულია, როცა ამდენ შეჭირვებულთან გიხდება ყოველდღიური ურთიერთობა და მათ პრობლემებს ისმენ.