20 ნოემბერს ოზურგეთის მუნიციპლიტეტის საკრებულოს რიგგარეშე სხდომა შედგა. სხდომაზე თავიდან რეგისტრაცია გაიარა 34 -მა დეპუტატმა, თუმცა, საკითხების მსვლელობისას არაერთი გაიპარა კიდეც, საბოლოოდ კი ეს ფაქტი დავისა და შეხლა-შემოხლის საგანიც გახდა. ობლად გამოიყურებოდა ნაციონალი დეპუტატების მაგიდაც, – ისინი სხდომის დაწყებისთანავე გაუჩინარდნენ.
დღის წესრიგით გათვალისწინებული ექვსი საკითხიდან, პირველის ირგვლივ: "ოზურგეთის მუნიციპალიტეტის 2016 წლის ბიუჯეტის დამტკიცების შესახებ," ოზურგეთის მუნიციპალიტეტის საკრებულოს დადგენილების მისაღებად საჯარო ადმინისტრაციული წარმოების დაწყების თაობაზე, _ საფინანსო სამსახურის უფროსმა გია მამაკაიშვილმა ისაუბრა. მან განმარტა, რომ საკრებულოს სამანდატო, საპროცედურო და იურიდიულ საკითხთა კომისია გაეცნო გამგებლის მიერ წარმოდგენილ ოზურგეთის მუნიციპალიტეტის 2016 წლის ბიუჯეტს, რომლის შემოსულობები განისაზღვრება 8 338.0 ათასი ლარით.
"პრიორიტეტები იქნება განათლების ხელშეწყობა, ინფრასტრუქტურის გახორციელება, ჯანმრთელობის დაცვაზე ხელშეწყობა, _ თქვა მამაკაიშვილმა, ხოლო საკერებულოს თავმჯდომარის მოადგილემ, დიმიტრი კვერღელიძემ თავის მხრივ აღნიშნა, რომ მართალია, განათლების კუთხით 2 მილიონი ლარი იხარჯება, მაგრამ ინფრასტრუქტურა მაინც გახდება უფო პრიორიტეტული, რადგან ცენტრალური ბიუჯეტიდან ტრანსფერით შეივსება ადგილობრივი შემოსულობები და ჩვენ, ახლანდელმა საკრებულომ, ისე უნდა დავამთავროთ ჩვენი საქმიანობა, ინფრასტრუქტურული პროექტები დაუმთავრებელი არსად არ უნდა დარჩესო.
საკითხი გადაიდო დეპუტატთა თანხმობით, რათა ძირითადად ბიუროს და მერე საკრებულოს სხდომაზე გამოთქმული შენიშვნები თუ ცვლილებები, საკრებულოს 25 ნოემბრის სხდომიდან დაუბრუნდეს აღმასულებელ ხელისუფლებას. საბოლოოდ კი, 25 დეკემბრისთვის ბიუჯეტი მიიღებს დახვეწილი სახეს.
საკრებულოს სხდომის დღის წესრიგის მეოთხე საკითხზე: "ოზურგეთის მუნიციპალიტეტის ტერიტორიაზე ადგილობრივი გადასახადის შემოღებისა და მისი განაკვეთების შესახებ," ოზურგეთის მუნიციპალიტეტის საკრებულოს დადგენილების მისაღებად საჯარო ადმინისტრაციული წარმოების დაწყების თაობაზე, მუნიციპალიტეტის გამგებლის მოადგილემ არჩილ ყაზაიშვილმა ისაუბრა.
მან ადგილობრივი გადასახადების განაკვეთები წარმოადგინა, რის მიხედვითაც დასაბეგრი ქონების ღირებულება უძრავ ქონებასთან მიმართებაში უნდა გაიზარდოს 2000 წლამდე მიღებულ აქტივებზე _ სამჯერ; 2000 წლიდან 2004 წლამდე მიღებულ აქტივებზე _ 2-ჯერ და 2004 წელს მიღებულ აქტივებზე 1,5-ჯრ. ფიზიკური პირის დასაბეგრ ქონებაზე გადასახადის წლიური განაკვეთები, 40 ათასიდან 100 ათას ლარამდე შემოსავლის მქონე ოჯახისთვის _ საგადასახადო პერიოდის ბოლოსთვის და დასაბეგრი ქონების საბაზრო ღირებულების 0,2 პროცენტი იქნება, ხოლო 100 ათასი ლარის ან მეტი შემოსავლის მქონე ოჯახებისთვის – საგადასახადო პერიოდის ბოლოსთვის დასაბეგრი ქონების საბაზრო ღირებულების 1,0 პროცენტი.
დეპუტატთა ხმაური და ურთერთ შეხლა-შემოხლა გამოიწვია, სასოფლო სამეურნეო დანიშნულების მიწაზე ქონების გადასახადის წლიური განაკვეთის გაზრდამ, რის მიხედვითაც ერთი ჰა სახნავი და საკარმიდამო მიწის გადასახადი 109 ლარი უნდა გახდეს, სათიბის – 30 ლარი, საძოვრის _ 24 ლარი, ბუნებრივი რესურსებით მოსარგებლე პირისთვის შესაბამისი ლიცენზიის გაცემის საფუძველზე გამოყოფილი მიწები კი _ სამი ლარი.
ასკანის, მაკვანეთის და სხვა სოფლების დეპუტატებმა კატეგორიული წინააღმდეგობა გასწიეს სახნავი თუ საძოვარი მიწის საგადასახადო თუ გასაყიდი ფასის გაზრდაზე.
"მე წინააღმდეგი ვარ და არც არასდროს დაგეთანხმებით. ეს არ არის გლეხის სასიკეთოდ გადადგმული ნაბიჯი და ხალხის საწინააღმდეგოდ ნუ წახვალთ. მე არაერთხელ ვყოფილვარ საკრებულოს დეპუტატი და ვერაფერს მომატყუებთ," _ თქვა სოფელ ასკანის დეპუტატმა ილია მამალაძემ. სოფელ მაკვანეთის დეპუტატმა ნუგზარ კალანდარიშვილმა კი საკრებულოს თავმჯდომარეს დავით დარჩიას პირდაპირ მიმართა, ეს საკითხი დადებითად არ გადაეწყვიტათ და პასუხისმგებლობით დაეყენებინათ კენჭისყრაზე. თუმცა, კენჭისყრის დროს აღმოჩნდა, რომ 34 დეპუტატიდან 11 უკვე წასულიყო.
-სად არიან დეპუტატები? საკითხი თავიდან დავაყენოთ კენჭისყრაზე, -ამბობდნენ დარბაზში დარჩენილი საკრებულოს წევრები.
"რა ვიცი, სადაა, რატომ წავიდნენ? ყოველ ხუთ წუთში შეიძლება მიდი-მოდიოდეს კაცი?- თავის მხრივ კიხულობდა საკრებულოს თავმჯდომარე დავით დარჩია.
-მე ვეძებო სად დადიან? შენ რას აკეთებ? დაუძახე და მოიყვანე, _ პასუხს არ აგვიანებდნენ მიწის გადასახადის ზრდით უკმაყოფილო დეპუტატები.
საბოლოოდ, აღნიშნულ საკითხზე, კენჭისყრით 11 დეპუტატი წინააღმდეგი წავიდა. საკრებულოს დეპუტატმა ლელა ნაცვალაძემ კატეგორიულად მოითხოვა, გაერკვიათ, ჩავარდა თუ არა ეს საკითხი. სოფელ კონჭკათის დეპუტატი ტარიელ აროშიძე კოლეგებს არ დაეთანხმა, ადმინისტრაციულ განხილვაზე გავიდეს და მერე ვუყაროთ კენჭიო. მაკვანეთის მაჟორიტარმა დეპუტატმა ნუგზარ კალანდარიშვილმა საყვედური უთხრა კოლეგას, გლეხების საწინააღმდეგო საქმეს ნუ გავაკეთებთ, აქ რატომ ვართ, თუ ასეთი გადაწყვეტილება მივიღეთ, მერე ხალხი ჩვენ გამოგვიდგება სოფელში და რა პასუხი უნდა გავცეთო?
საპასუხოდ ტარიელ აროშიძე ლანძღვაზე გადავიდა და კოლეგისკენ გაიწია კიდეც. დარბაზში შეურაცმყოფელი გამოთქმები ისმოდა, "ცხვირს გაგიტეხ" და "მე შენ გაჩვენებო". ბილწსიტყვაობაში შორს წავიდა ტარიელ აროშიძე… საფინანსო სამსახურის უფროსი გია მამაკაიშვილი ამაოდ მოუწოდებდა გაწიწმატებულ კოლეგებს ზრდილობისა და სიმშვიდისკენ. უკმაყოფილება ამით დასრულდა, თუმცა მომდევნო , რიგით გათვალისწინებულ საკრებულოს სხდომაზე, სეჭვოა, აღნიშნულ საკითხი დადებითად გადაწყდეს.
საკრებულოს დეპუტატი ლელა ნაცვალაძე, სხდომის შემდეგ, "გურია ნიუსს" ესაუბრა:
"არ დავუშვებთ მიწის გადასახადის თუ გასაყიდი ფასის გაზრდას. ეს საკრებულოს ისტორიაში შავ ლაქად დარჩება და გლეხების საწინააღმდეგოდ გადაგმული ნაბიჯი იქნება. მათ მიერ გადახდილი თანხა ვერ შექმნის ისეთ ამინდს, რომ ბიუჯეტი გაიზარდოს. სივრცითი დაგეგმარების და ინფრასტრუქტურის კომისიის თავმჯდომარე ტარიელ აროშიძე ასე არ უნდა საუბრობდეს. ჩვენ, დეპუტატების უმრავლესობა, დარწმუნებული ვარ, გავაპროტესტებთ ამ საკთხს და არ დავუშვებთ, რომ საკრებულოს მომდევნო სხდომაზე ეს საკითხი დადებითად გადაწყდეს. ფაქტიურად, დღეს დეპუტატთა ნაწილი ვერც მიხვდა, რაში იყო საქმე, რადგან ბიუროს წევრი ყველა არ არის და საკითხის განხილვა ჯერ სწორედ ბიუროზე ხდება, აქ კი ერთბაშად კენჭისყრაზე გამოაქვთ, რის განხილვას კი არა წაკითხვასაც ვერ ასწრებენ" – თქვა მან.
