სირია-თურქეთის საზღვარზე დღეს თურქმა სამხედროებმა რუსეთის კუთვნილი ბომბდამშენი სუ -24 ჩამოაგდეს. რა გავლენა შეიძლება იქონიოს ამ შემთხვევამ მოსკოვისა და ანკარის ურთიერთობებზე? ამასთან დაკავშირებით "ნოვოე გაზეტა" სამხედრო მიმოხილველ პაველ ფელგენგაუერს ესაუბრა. "გური ანიუსი" ამ საუბრის თარგმანს გთავაზობთ.
"ეს საქმე თურქმენების დაცვას უკავშირდება. თურქებმა ამის გამო უკვე გამოიძახეს ჩვენი ელჩი ახსნა-განმარტებისათვის, მოიწვიეს უშიშროების სხდომა, რადგანაც რუსეთის ავიაცია თურქმენებს ბომბავს, ისინი კი იბრძვიან როგორც ოპოზიციის ნაწილი ბაშარ ასადის რეჟიმის წინააღმდეგ. თურქეთმა განაცხადა, რომ მისთვის ეს მიუღებელია და დაიცავენ თურქმენებს.
ფაქტიურად ეს ნიშნავს, რომ თურქეთი რუსეთის ავიაციისათვის სირიის ჩრდილოეთით აკრძალულ ზონას ქმნის და აპირებს ეს ზონა დაიცვას. ესე იგი ჩამოაგდებს რუსულ თვითმფრინავებს, თუკი ისინი ამ ზონაში მოხვდებიან.
რუსმა სამხედროებმა თავის მხრივ უნდა აღიარონ, რომ თუკი ამ ზონაში რუსული თვითმფრინავები მოხვდებიან თურქებს მათი ჩამოგდების უფლება აქვთ ან ომი უნდა დაიწყონ თურქეთთან. სავარაუდოდ, იომებენ. ესე იგი შესაძლებელია, შემდგომი საჰაერო ბრძოლები, სადაც რუსული თვითმფრინავები იერიშს მიიტანენ თურქულ ბომბდამშენებზე, რომ დაიცვან საკუთარი საჰაერო ხომალდები. შესაძლოა თურქებმა დაკეტონ ბოსფორიც, ამ კონფლიქტში ნატოც ჩაერიოს და ასეთი სახის კონფლიქტში კი რუსეთს ნაკლები შანსი აქვს ბირთვული იარაღის გამოყენების გარეშე.
შეგახსენებთ, რომ ცნობა რუსული ბომბდამშენის ჩამოგდების შესახებ ტელეარხმა CNN Turk -მა დღეს დილით გაავრცელა და აღნიშნა, რომ თურქმა სამხედროებმა ქვეყნის საზღვრის სიახლოვეს ამოუცნობი სამხედრო თვითმფრინავი ჩამოაგდეს, რომელმაც ქვეყნის საჰაერო სივრცე დაარღვია. რუსეთის სამხედრო უწყებაში კი დაადასტურეს, რომ სუ -24 -მა კატასტროფა სირიის ჩრდილოეთში განიცადა. რუსეთის თავდაცვის სამინისტროს განცხადებით, ბომბდამშენი ჩამოგდების დროს მიწაზე სამიზნეებს ანადგურებდა.
თურქული მხარის ინფორმაციით, რომელსაც Reuters-ი თურქ სამხედრო ჩინოვნიკზე დაყრდნობით ავრცელებს, თურქეთის კუთვნილმა გამანადგურებელმა F-16 ВВС რუსული თვითმფრინავი მას შემდეგ ჩამოაგდო, როცა დაარღვია საზღვარი და უგულვებელყო ყველა გაფრთხილება.
