საყოველთაო ჯანდაცვის პროგრამისთვის ხელისუფლებას შესაძლოა, დამატებითი თანხების გამოყოფა დასჭირდეს. საქმე იმაშია, რომ "ერთიანი ნაციონალური მოძრაობის" წარმომადგენლის ზურაბ ჭიაბერაშვილის განცხადებით, პროგრამის ბიუჯეტში მხოლოდ ერთი კვირის თანხაა დარჩენილი, თანხის ნაწილის დამატება კი, სამინისტროს საავადმყოფოების დაჯარიმების ხარჯზე მოუწევს. თუმცა, პარლამენტის ჯანმრთელობის დაცვისა და სოციალურ საკითხთა კომიტეტში აცხადებენ, რომ საყოველთაო ჯანდაცვის პროგრამას არანაირი საფრთხე არ ემუქრება და ჭიაბერაშვილი საზოგადოების შეცდომაში შეყვანას ცდილობს.
საყოველთაო ჯანდაცვის პროგრამის ბიუჯეტში მხოლოდ ერთი კვირის თანხაა დარჩენილი,- ამის შესახებ "ერთიანი ნაციონალური მოძრაობის" წარმომადგენელმა ზურაბ ჭიაბერაშვილმა დღეს გამართულ ბრიფინგზე განაცხადა.
როგორც ჭიაბერაშვილმა ამბობს, "საყოველთაო ჯანდაცვის პროგრამის" ბიუჯეტში მხოლოდ 12 მლნ ლარია დარჩენილი. მისივე თქმით, თუ პროგრამიდან საავადმყოფოებისათვის ვალების გასტუმრების დღემდე არსებულ ტემპს გავითვალისწინებთ, ეს თანხა ჯანდაცვის სამინისტროს მხოლოდ ერთი კვირა თუ ეყოფა.
"დღემდე საყოველთაო ჯანდაცვის პროგრამის ყოველდღიური საკასო ხარჯი საშუალოდ 1,56 მლნ ლარია. დეკემბერში პროგრამას მინიმუმ 48 მლნ ლარი სჭირდება. ეს არ ნიშნავს, რომ დამატებითი 36 მლნ ლარი კიდევ რომ იქნას მოძიებული, ჯანდაცვის სამინისტრო კლინიკების დავალიანებას სრულად დაფარავს. დავალიანება დარჩება და ეს მედპერსონალის ხელფასების გაუცემლობაში, სამედიცინო მომსახურების ხარისხის დაქვეითებასა და პაციენტების მიერ ჯიბიდან გადახდების ზრდაში აისახება. აღსანიშნავია, რომ 2 კვირაც არ გასულა, რაც მთავრობამ ჯანდაცვის სამინისტროს 96 მლნ ლარით გაუზარდა დაფინანსება.
საყოველთაო ჯანდაცვის პროგრამის ქრონიკულად დეფიციტურ ბიუჯეტს ამ თანხიდან 50 მლნ ლარი ერგო და პროგრამის უკვე 484 მლნ ლარამდე გაზრდილი ფინანსები 534 მლნ ლარამდე გაიზარდა", _ განაცხადა ჭიაბერაშვილმა.
მისივე თქმით, უცნობია, საიდან მოიძიებს დავით სერგეენკო კიდევ 36 მლნ ლარს. ჯანდაცვის სამინისტროს დავალიანება საავადმყოფოების მიმართ კი 100 მლნ ლარზე მეტია და, საგანგებო ზომების მიღების გარეშე, მედპერსონალის მნიშვნელოვან ნაწილს 2016 წლის იანვრამდე უხელფასოდ მუშაობა ემუქრება.
"როგორც უკვე არაერთხელ ვთქვი, დავით სერგეენკოს რამდენიმე ალტერნატივა აქვს: პირველი, მთავრობა საყოველთაო ჯანდაცვის პროგრამაზე კიდევ ამატებს თანხებს. სერგეენკოსთვის ეს ყველაზე ადვილი გამოსავალია, ღარიბაშვილი–ხადურისათვის – ყველაზე რთული; მეორე, ჯანდაცვის მინისტრი საავადმყოფოებში სამედიცინო რეგულირების სააგენტოს "სადამსჯელო რაზმებს" აგზავნის და საავადმყოფოებისათვის 2013-14-15 წლებში უკვე გადარიცხული თანხების კორექტირებას იწყებს. ეს ნიშნავს, რომ საავადმყოფოებისათვის სამინისტროს მიმდინარე და ნოემბერ–დეკემბრის მომავალი დავალიანება კორექტირებისას "აღმოჩენილი" ჯარიმებში გაიქვითება; მესამე, სამინისტრო უთანხმდება სამედიცინო სექტორს, რომ ნოემბერ–დეკემბერში საავადმყოფოებს თანხებს ვეღარ ან მინიმალურად ჩაურიცხავს და, სამაგიეროდ, 2016 წლის იანვარში, როცა ახალი ბიუჯეტი შევა ძალაში, ერთბაშად ჩაურიცხავს 100 მლნ ლარზე მეტს.
სამედიცინო პერსონალმა უხელფასოდ რომ მიატანოს იანვრამდე და ხმა არ ამოიღოს, თუ 2016 წლის დასაწყისში ჯანდაცვის სამინისტრომ ერთბაშად გაისტუმრა 2015 წელს დაგროვილი დავალიანება, შეგვიძლია წარმოვიდგინოთ, ისედაც გაუბედურებულ ლარს რა დღე ელის. ეს კი იმავეს ნიშნავს, რაც ენერგეტიკაში მოხდა: დღეს გვიზოგავენ 1 თეთრს, ხვალ კი სანაცვლოდ ჯიბიდან 3 თეთრს გვაცლიან," _ განაცხადა ზურაბ ჭიაბერაშვილმა დღეს გამართულ ბრიფინგზე.
ჭიაბერაშვილმა ჟურნალისტებს საყოველთაო ჯანდაცვის გასული წლების ბიუჯეტიც წარმოუდგინა და აღნიშნა, რომ "2013 წელს, საყოველთაო ჯანდაცვის პროგრამაზე 260 მილიონი ლარი დაიხარჯა; 2014 წელს- 340 მილიონი ლარი; 2015 წელს დაგეგმილი იყო 470 მილიონი ლარის გახარჯვა, თუმცა, სექტემბერში ამ თანხას კიდევ 14 მილიონი ლარი დაემატა, ცოტა ხნის წინ კი, როგორც ჭიაბერაშვილი აცხადებს, ჯანდაცვის სამინისტროსთვის 96 მილიონი ლარი გამოყვეს. ამ თანხიდან, 50 მილიონი ლარი დაემატა საყოველთაო ჯანდაცვის პროგრამას, დანარჩენი თანხა კი, სხვა ხვრელების ამოსავსებად გამოიყენეს".
ჭიაბერაშვილი ამბობს, რომ ჯამურად, 2015 წელს, საყოველთაო ჯანდაცვის პროგრამისთვის გამოყოფილი 534 მილიონი ლარიდან უკვე გახარჯულია 522 მილიონი ლარი. მისივე განმარტებით, ჯანდაცვის სამინისტრო საყოველთაო ჯანდაცვის პროგრამაზე თვეში დაახლოებით 47,45 მილიონ ლარს ხარჯავს.
"გურია ნიუსის" კითხვაზე, რაში ხედავს არსებული სიტუაციიდან გამოსავალს და რას სთავაზობს სახელმწიფოს, ჭიაბერაშვილი გვპასუხობს:
"დიფერენცირება უნდა მოხდეს. ყველა პირს მკურნალობა არ უნდა დაუფინანსდეს. ალბათ, გახსოვთ, როგორ ხდებოდა ჩვენს დროს, სახელმწიფო აძლევდა თანხას ჯანდაცვის სამინისტროს, ჯანდაცვის სამინისტრო სადაზღვეოს, სადაზღვეო კი, საზოგადოებას უხდიდა მისთვის საჭირო თანხას. ახლა კი, ჯანდაცვის სამინისტროსა და საზოგადოებას შორის პირდაპირი კავშირია. სამინისტრო თანხასაც თავად განკარგავს და ხარჯვის კონტროლსაც ახორციელებს. რაც მიგვაჩნია, რომ არასწორი პოლიტიკაა", _ აღნიშნავს ჭიაბერაშვილი.
"ნაციონალური მოძრაობის" ბრალდებებს, პარლამენტის ჯანდაცვის კომიტეტში უპასუხეს. ჯანმრთელობის დაცვისა და სოციალურ საკითხთა კომიტეტის თავმჯდომარე დიმიტრი ხუნდაძე ზურაბ ჭიაბერაშვილს ურჩევს "ჯანმრთელობას გაუფრთხილდეს" და საზოგადოების შეცდომაში შეყვანის მცდელობას თავი დაანებოს.
"საყოველთაო ჯანდაცვის პროგრამას არანაირი საფრთხე არ ემუქრება. კორექტირებული ბიუჯეტი მიიღო პარლამენტმა, დაამტკიცა. ახლა პრეზიდენტთან არის გადაგზავნილი, მოეწერება ხელი და მოხდება მისი გამოქვეყნება. ასე რომ, ჭიაბერაშვილი დამშვიდდეს, გაუფრთხილდეს საკუთარ ჯანმრთელობას და მოსახლეობის ჯანმრთელობაზე იზრუნოს არა ნეგატიური პოზიციიდან, არამედ დაანებოს თავი საზოგადოების შეცდომაში შეყვანას", _ განაცხადა დიმიტრი ხუნდაძემ.
"გურია ნიუსი" აღნიშნულ საკითხთან დაკავშირებით, ჯანდაცვის სამინისტროსაც დაუკავშირდა, თუმცა უწყებაში აცხადებენ, რომ მთავრობის პოზიცია პარლამენტის ჯანმრთელობის დაცვისა და სოციალურ საკითხთა კომიტეტის თავმჯდომარემ, დიმიტრი ხუნდაძემ უკვე დააფიქსირა.
"იდენტური პოზიცია გვაქვს ამ საკითხთან დაკავშირებით, ამიტომ დამატებითი კომენტარის გაკეთების საჭიროებას ვერ ვხედავთ", _ გვითხრეს ჯანდაცვის სამინისტროს პრესსამსახურში.
შეგახსენებთ, რომ საყოველთაო ჯანმრთელობის დაცვის სახელმწიფო პროგრამა ამოქმედდა 2013 წლის 28 თებერვლიდან. პროგრამის მიზანი იყო, ჯანმრთელობის დაზღვევის არმქონე საქართველოს მოსახლეობისათვის, სამედიცინო მომსახურების ხელმისაწვდომობისათვის, ფინანსური უზრუნველყოფა შეექმნა.
პროგრამა მოიცავს როგორც ოჯახის ან უბნის ექიმის მომსახურებას, ასევე ექთნის მომსახურებას უფასოდ. ასევე მოსახლეობას სრულად უფინანსდება ანალიზების, გადაუდებელი ამბულატორიული და სტაციონარული მომსახურება ნაწილი.
პროგრამით გათვალისწინებული ლიმიტი ერთეულ შემთხვევაზე – 15 000 ლარია.
