2016 წლის საპარლამენტო არჩევნებზე საზოგადოების ნაწილმა შესაძლოა პარტიის შეთავაზებული კანდიდატს მხარი არ დაუჭიროს და პარლამენტში თავისი კანდიდატი წარადგინოს.
საქმე ეხება არასამთავრობო ორგანიზაციების ინიციატივას, რომელიც საზოგადოებას საშუალებას აძლევს საკუთარ უბანში თავისი წარმომადგენელი თვითონ შეარჩიოს.
როგორც ინიციატორი ორგანიზაციები განმარტავენ, სახალხო დეპუტატი სამართლიან კონკურენციას გაუწევს პარტიის მიერ წამოყენებულ კანდიდატს.
2016 წლის არჩევნებამდე, საზოგადოება დააკვირდება ამ ადამიანის მუშაობას და თუ ნდობის მოპოვებას შეძლებს, ის იქნება ხალხის წარმომადგენელი პარლამენტში. ორგანიზაციები ირწმუნებიან, რომ სახალხო დეპუტატი აქამდე არსებულ რეალობას საერთოდ შეცვლის, ხალხი უკვე მხარს თავის წარმომადგენელს დაუჭერს და არა პარტიების მიერ შეთავაზებულ კანდიდატებს, რომლებსაც საზოგადოება ხშირ შემთხვევაში არ იცნობს.
იდეის ინიციატორი ორგანიზაციები არიან – "ქართული მისია", "ახალი რეალობისთვის", "ვეტერანების პარტია" და "დედაქალაქი თბილისის ყველა უბანში", რომლებმაც სახალხო დეპუტატის შესახებ დღეს გამართულ პრესკონფერენციაზე ისაუბრეს.
რატომ გახდა საჭირო სახალხო დეპუტატის პროექტის შექმნა საჭირო, ვის ექნება უფლება სახალხო დეპუტატი იყოს და რა მოვალეობები ექნება მას? _ ამ და სხვა საკითხებზე "გურია ნიუსს" "ქართული მისიის" გამგეობის წევრი გიორგი ზარნაძე ესაუბრა.
"ამ პროექტის შექმნა საჭირო გახდა იმიტომ, რომ როცა გვაქვს საზოგადოებასთან შეხვედრები სხვადასხვა რაიონებსა და მუნიციპალიტეტებში, არის ძალიან ნიჰილისტური განწყობა; საზოგადოებას დაკარგული აქვს ნდობა როგორც ხელისუფლების წარმომადგენელთა მიმართ (ვგულისხმობ როგორც პარლამენტის წევრებს, საკრებულოს წევრებს ასევე აღმასრულებელი ხელისუფლების და ადგილობრივი ხელისუფლების წარმომადგენლებს), ასევე ოპოზიციის მიმართაც", _ ამბობს ზარნაძე.
მისივე თქმით, პროექტის შექმნის იდეა ხალხის მიერაა მიწოდებული, ამიტომ მისი განხორციელების დიდი შანსი არსებობს.
"სახალხო დეპუტატის შექმნა ხალხის მოთხოვნა იყო. ფაქტობრივად, დღევანდელი ხელისუფლება არ არის საზოგადოების არჩეული. "ქართულმა ოცნება", კერძოდ, ბიძინა ივანიშვილმა ვინც შემოგვთავაზა იძულებულები ვიყავით ის აგვერჩია. ჩვენი მთავარი მიზანია, საზოგადოების ჩართულობა დ აქტიურობა განხორციელდეს იმაში, რომ ხალხმა თვითონ აირჩიოს ვინ იქნება მისი წარმომადგენელი. ცალკე საკითხია ის, ეს ადამიანი რამდენად შეასრულებს ხალხის მოთხოვნებს, მიიღებს თუ არა არჩევნებში მონაწილეობას, ან მხარს რომელ პარტიას დაუჭერს. ის ხალხმა უნდა შესთავაზოს როგორც პოლიტიკურ პარტიებს და ხელისუფლებას, ასევე ოპოზიციას",_ ამბობს ზარნაძე.
როგორც იდეის ერთ-ერთი ავტორი ამბობს, სახალხო დეპუტატის პროექტში მონაწილეობა როგორც პოლიტიკურ პარტიებს, ასევე არასამთავრობო ორგანიზაციებსაც შეუძლიათ.
„მაგრამ ძირითადი მიზანი და პრინციპი უნდა იყოს დაცული; საზოგადოება რომელ კანდიდატსაც დაასახელებს, მისი შეცვლა შეუძლებელი იქნება. ვერავინ ვერ იტყვის, რომ ის არის რომელიმე პოლიტიკური ძალის შემოთავაზებული. პროექტის მეშვეობით ხალხს ექნება საშუალება მისცენ მანდატი ისეთ ადამიანს, რომელიც პრობლემას თუ ვერ მოაგვარებს ბოლომდე, მედიატორი (შუამალი) მაინც იქნება საზოგადოებასა და ხელისუფლებას შორის“, _ ამბობს ზარნაძე და განმარტავს, რომ უკვე არსებობს კონკრეტული გეგმა, რომელიც დამუშავების ეტაპზეა.
"იქნება დებულება, სადაც დეტალურად გაიწერება როგორ უნდა მოხდეს ამ ტიპის წარმომადგენლების არჩევა ადგილებზე და რა უფლებები და მოვალეობები ექნებათ სახალხო დეპუტატებს. გაწერილი იქნება როგორ უნდა აირჩიონ, იქნება სპეციალური ფორმა, რომელიც უნდა შეავსონ. არჩევის შემდეგ გარკვეულწილად ამ ადამიანს მანდატი მიენიჭება და ექნება თავისი ინსტრუქცია და წინასწარ გაწერილი სამუშაო გეგმა. ეცოდინება რა ტიპის პრობლემებზე უნდა იმუშაოს, რა შეიძლება გააკეთოს, სად შეიძლება წარადგინოს პრობლემა და იმუშაოს გადაჭრის გზებზე. ვფიქრობთ, პროექტის განხორციელება მაქსიმუმ ერთ თვეში დაიწყება. ახლა მიმდინარეობს წინა მოსამზადებელი სამუშაოები ტექნიკური თვალსაზრისით", _ ამბობს ზარნაძე.
რა აზრი აქვს ხელისუფლებას არასამთავრობო ორგანიზაციების ინიციატივაზე, ჯერჯერობით უცნობია. როგორც ზარნაძე აცხადებს, ხელისუფლებას აღნიშნული პროექტის შესახებ ოფიციალურად მას შემდეგ აცნობებენ, რაც ტექნიკური საკითხები მოგვარდება და სახალხო დეპუტატის სრული პროექტი მზად იქნება.
