პოლიციელების ცემაში მსჯავრდებული პირები, რომელთა მიმართაც ქუთაისის სააპელაციო სასამართლომ გამამტყუნებელი განაჩენი გამოიტანა, გადაწყვეტილების გაუქმებას მოითხოვენ.
საქმე ეხება 2014 წლის 16 ოქტომბერს, მარტვილის რაიონის სოფელ ბანძაში მომხდარ შემთხვევას, რა დროსაც,პოლიციის შენობიდან ხელბორკილებდადებული ბრალდებული თემურ გაბუნია გაიქცა. გამოძიების მტკიცებით, დაკავებულმა გაქცევა ნათესავების დახმარებით მოახერხა, რომლებიც განყოფილებაში მივიდნენ, პოლიციის თანამშრომლებს თავს დაესხნენ და მათ როგორც სიტყვიერი, ასევე ფიზიკური შეურაცხყოფა მიაყენეს. თუმცა, განსხვავებულ ვერსიაზე საუბრობენ თავად მსჯავრდებული პირები. მათი თქმით, პოლიციელები ალკოჰოლური ზემოქმედების ქვეშ იმყოფებოდნენ და შეურაცხყოფა იქეთ მიაყენეს.
საქმეზე ბრალი 7 პირის წაუყენეს, აქედან ორი ქალია. პირველი ინსტანციის სასამართლომ, ზუგდიდში, 5 პირს (ბოჩია ასაბაშვილს, ვაგნერ წულაიას, შალვა პატარაიას, გოგიტა კეკელიას და ცოტნე გაბუნიას) პატიმრობა, ბრალდებულ ქალბატონებს – მაია და ინეზა კეკელიებს კი, 3-3 ათას ლარიანი გირაო შეუფარდა.
მსჯავრდებულმა პირებმა და მათმა ადვოკატებმა ზუგდიდის რაიონული სასამართლოს მოსამართლის, ნატრული აკობიას მიერ, 2015 წლის 9 ივნისს გამოტანილი განაჩენი ქუათაისის სააპელაციო სასამართლოში გაასაჩივრეს. თუმცა, სააპელაციო სასამართლომ, 5 ნოემბერს, პირველი ინსტაციის სასამართლოს გადაწვეტილება ძალაში დატოვა.
როგორც ერთ-ერთი მსჯავრდებულის მაია კეკელიას ადვოკატმა ტარიელ კაკაბაძემ „გურია ნიუსს“ უთხრა, სააპელაციო სასამართლოს არ უმსჯელია მთელ რიგ მტკიცებულებებთან დაკავშირებით და გადაწყვეტილება საქმის მასალების შესწავლის გარეშე გამოიტანა.
"დღეს გავასაჩივრეთ ქუთაისის სააპელაციო სასამართლოს განაჩენი, რომლითაც სასამართლომ უცვლელად დატოვა პირველი ინსტანციის სასამართლოს განაჩენი. პრაქტიკულად, სააპელაციო სასამართლომ არ იმსჯელა მთელ რიგ მტკიცებულებებზე, რომლებიც ბრალდებულთა უდანაშაულობას ამტკიცებდა. სასამართლომ არ მისცა შეფასება მოსამართლე ნატრული აკობიას არაობიექტურ მსჯელობას, მთელი რიგი მტკიცებულებების დაიგნორებას და სრულიად დაუსაბუთებელ განაჩენს. როგორც გამოჩნდა, სააპელაციო სასამართლოს არც კი შეუსწავლია საქმის მასალები ისე გამოიტანა განაჩენი. სასამართლოს არ უმსჯელია საქმესთან დაკავშირებით, არ მოუხდენია მტკიცებულებათა შეპირისპირება და მტკიცებულებათა თაობაზე მსჯელობა, ისე გადმოაკოპირა პირველი ინსტანციის სასამართლოს მიერ გამოტანილი უკანონო განაჩენი.
პროკურორს თავის რეპლიკაში ერთი სიტყვაც კი არ უხსენებია ჩემს დასკვნით სიტყვაზე და არ წამოუდგენია ერთი კონტრარგუმენტიც კი, რითაც ის გააბათილებდა დაცვის მხარის პოზიციას. სამწუხაროდ, ნაცვლად იმისა, რომ სასამართლოს ეთქვა ღირსეული სიტყვა, მოსამართლეებმა გადაწყვიტეს გადმოეკოპირებინათ პირველი ინსტანციის მიერ გამოტანილი განაჩენი", _ აცხადებს კაკაბაძე.
როგორც ადვოკატი განმარტავს, უზენაეს სასამართლოს სარჩელის განხილვის 6-თვიანი ვადა აქვს. თუ სარჩელს უზენაესი სასამართლოც არ დააკმაყოფილებს, მსჯავრდებული პირები და მათი ადვოკატები სარჩელის სტრასბურგის სასამართლოში გაგზავნასაც გეგმავენ.
ამავე თემაზე:
როგორ გაიქცა დაკავებული – ნასვამი პოლიციელების წინდაუხედაობით თუ ნათესავების "ამბოხით"
პატრულის ცემისთვის ქალბატონებს მოსამართლემ განაჩენი გამოუტანა (ვიდეო)
"ადამიანის უფლებათა ცენტრი" სამართალდამცველთა მიერ ჩადენილი დანაშაულებისდროულ გამოძიებას ითხოვს
პოლიციელების ცემაში ბრალდებული ქალის ღია წერილი
"შვიდ ადამიანს შვიდი წლით თავისუფლების აღკვეთისთვის გვწირავენ"
