"სოფელ ასკანის მოსახლეობას ადგილობრივი ხელისუფლების წარმომადგენლები მთელი ზაფხული ჰპირდებოდნენ, რომ დაიწყებოდა გზის სარეაბილიტაციო სამუშაოები. რამდენიმეწლიანი მოთხოვნის მიუხედავად, სოფელ ასკანის მოსახლეობას არ მიეწოდებოდა სასმელი წყალი. არც ერთი დაპირება არ შესრულებულა, დიდი ზარ-ზეიმით გახსნილი "როიალ-ასკანის" მშენებლობაც შეჩერებულია. რა ხდება, იქნებ გაგვარკვიოთ?! წინასაარჩევნოდ გამოგვიყენეს და ახლა ისევ უყურადღებოდ ვართ. მილიონებია გადაყრილი წყლის რეაბილიტაციისთვის, წყალი კი სასმელად უვარგისია", _"გურია ნიუსს" ოზურგეთის მუნიციპალიტეტის სოფელ ასკანის მცხოვრებლები არაეთხელ დაუკავშირდნენ.
ასკანაში მოსახლეობის უდიდესი პრობლემა უწყლობისა და უგზოობის შემდეგ, მიგრაცია და უმუშევრობაა. აქაურების თქმით, სოფელი ახალგაზრდებისგან დაცლილია, მათი უმეტესობა სამუშაოდ თურქეთშია გადახვეწილი.
ოზურგეთის მუნიციპალიტეტის სოფელ ასკანის თემში სამი სოფელი _ მაღალი ეწერი, დაბალი ეწერი და მზიანი შედის; ცხოვრობს 500 ოჯახი, დაახლოებით, 1 200 კაცი.
როგორც ოზურგეთის მუნიციპალიტეტის ბევრ სოფელში, აქაც წყალთან დაკავშირებული პრობლემები წლების მანძილზე აწუხებს მოსახლეობას.
ასკანაში წყლის სისტემის რეაბილიტაციის ახალი პროექტის გახორციელება ერთი წლის წინ დაიწყო. მისი ღირებულება მილიონ ორასი ათას ლარს შეადგენდა. იგი გათვლილი იყო 800 ოჯახზე და 2014 წლის 1 დეკემბერს უნდა დასრულებულიყო.
"გურია ნიუსი" რამდენჯერმე წერდა, რომ სამუშაოები წინა წელს დარღვევით მიმდინარეობდა და არაკეთილსინდისიერად ხორციელდებოდა _ არხში, მილებთან ერთად, არ მოუწყვიათ ქვიშის "ბალიში", რასაც პროექტი ითვალისწინებდა და ქვიშის მაგივრად, ქვა-ღორღი იყო ჩაყრილი. როგორც კომპეტენტურმა პირებმა გვითხრეს, ეს იმიტომ გაკეთდა, რომ ქვიშის მოტანა დიდ თანხებთან იყო დაკავშირებული.
ასკანის წყლის სარეაბილიტაციო სამუშაოები, რომელიც მილიონ 200 ათასს ლარს შეადგენს, დასრულებულია, თუმცა, წყალი, რომელიც მოსახლეობას მიეწოდება, სასმელად უვარგისია; ვერ ფუნქციონირებს საფილტრავი სადგური, ფუნქციონირებისთვის კი საჭიროა კვალიფიციური სპეციალისტი. სოფლის გამგებლის თქმით, ფილტრი, დაახლოებით, 400 ათასი ლარი ღირს, წყალი კი ტექნიკურია, მოსახლეობა სასმელად ვერ იყენებს. რეაბილიტაცია დასრულებულია და რაც ყველაზე ცუდია, უკვე ზიანდება წყლის მილები. გამოდის, წყალშია გადაყრილი მილიონები.
ოზურგეთის მუნიციპალიტეტის სოფელი ასკანა ბიზნესმენი ძბების _ ჩხაიძეების მშობლიური სოფელია. 2014 წელს დაწყებული "როიალ ასკანას" მშენებლობა, რომელიც აქტიურ ფაზაში იყო, შეჩერებულია.
"ეს იქნება მარანი, მუზეუმი, ტურისტული ბაზა, ქართული ვაზის უძველესი, უნიკალური ჯიშების სანერგე მეურნეობა, სხვადასხვა ტიპის საწარმოები, იგეგმება აეროპორტის მშენებლობაც, საიდანაც ტურისტს შესაძლებლობა ექნება, ეწვიოს ჩვენი მხარის ზღაპრულ სანახებს. უმთავრესი მიზანი კი ისაა, რომ სოფელი აღორძინდეს და ხალხი დასაქმდეს. კვდება სოფლები და კონკრეტულად ეს ობიექტი ასკანას გადაარჩენს", _ ეს სიტყვები კომპანია "კახური ტრადიციული მეღვინეობის" (KTW) დამფუძნებელს, ზურაბ ჩხაიძეს ეკუთვნის.
ასკანელები "გურია ნიუსთან" სოფლის პრობლემებზე საუბრობენ.
ამირან შევარდნაძე: "წყალი ყველა ოჯახშია მიყვანილი, ოღონდ გაუფილტრავია, სასმელად უვაგისი., საფილტრავი, საქლორავი არ არის ჩართული. "ასკანა როიალის" მშენებლობაც შეჩერებულია, რატომ _ არ ვიცით. პრობლემების მეტი რა გვაქვს _ უფულობა, უგზოობა… ელემენტარულად, ხრეშიც არ დაგვიყარეს გზაზე, რომ ცოტა შეღავათი იგრძნოს მოსახლეობამ. უმუშევრობაა, გზა ჩვენ არ გვაქვს და წყალი; ღვინო და საჭმელი არის ყველა ოჯახში _ რაც ჩვენით შევძელით, ესაა, მთავრობისთვის არ მოგვითხოვია".
არინა ნაცვალაძე: "პრობლემების მეტი რა არის?! თუმცა, მე, პირადად, არ ვმათხოვრობ, არავის არ ვაწუხებ".
თათია გაგლოშვილი: "არავინ იცის, რატომ არის შეჩერებული მშენებლობა. მთელი ზაფხული არ უმუშავიათ. არ გვაქვს სასმელი წყალი. სოფელში, ისიც მაღალმთიანში, უწყლობა და უგზოობა გვაწუხებს."
ასკანაში ოზურგეთის მუნიციპალიტეტის გამგებლის წარმომადგენელი ბადრი ჯაველიძე სოფელში წყლის სარეაბილიტაციო სამუშაოებთან დაკავშირებით განმარტავს: "მოდის გაუფილტრავი წყალი, ვერ მოხერხა წყალსადენის ჩაბარება შესაბამისი ორგანიზაციისთვის, რომელიც უზრუნველყოფს ფილტრების მუშაობას, დაყენებულია ძვირადღირებული ფილტრები, რომლებიც ვერ ფუნქციონირებს. ჩვენ არ გვყავს შესაბამისი სპეციალისტები, როლებიც უზრუნველყოფენ შესაბამის სამუშაოებს. წერილი გადაგზავნილი გვაქვს ინფრასტრუქტურის სამინისტროში და ველოდებით პასუხს. რაც შეეხება წყლის მილების დაზიანებას, შეიძლება, მართლაც ზიანდება, მაგრამ ეს არის გამოწვეული იმით, რომ მაგისტრალზე დამონტაჟებულია წნევის დამგდები, რომელიც შესაბამისად არეგულირებს წნევას, რადგანაც მოდის გაუფილტრავი წყალი. დაზიანდა ეს წნევის დამგდები, შესაბამისად, წნევა ვერ რეგულირდება, მაღალმა მომატებულმა წნევამ კი მილები დააზიანა, ჩვენ ადგილობრივი ძალებით შეძლებისდაგვარად ვაკეთებთ, რაც შეგვიძლია. როგორც კი მოხერხდება საფილტრავი სადგურის ჩართვა და გარემონტდება წნევის დამგდები, მაშინვე დარეგულირდება ყველაფერი. რაც შეეხება გზას, რეაბილიტაციის პროექტი უკვე მზადაა და მისი ღირებულება შეადგენს 4 მილიონ 200 ათას ლარს. არის დაპირება, რომ მომავალი წლიდან ბიუჯეტში ნაწილობრივ მაინც ჩაისმება. გარდამავალი პროექტის სახით რომ მოხდეს სარეაბილიტაციო სამუშაოების დაწყება, კარგი იქნება. რაც მთავარია, პროექტი მზადაა, ახლა დაფინანსებას ველოდებით", _ ამბობს სოფელ ასკანის რწმუნებული, რომელიც, ასევე, სოფლის მხარდამჭერი პროგრამის თანხებზეც საუბრობს:
"სოფლის პროექტის ფარგლებში, გამოყოფილი იყო 34 000 ლარი. სოფელ მზიანში და ასკანაში ორი ბაღი ნაწილობრივ შევაკეთეთ, ასევე, შეკეთდა ასკანის ადმინისტრაციული შენობა; მოიხრეშა და შეკეთდა ბასილეთთან დამაკავშირებილი გზა.
შეჩერებულ მშენებლობასთან დაკავშირებით, ზუსტ პასუხს ვერ გაგცემთ, რადგან ეს კერძო კომპანიის ქონებაა. როგორც ვიცი, ყურადღება გადაიტანეს სხვა საწარმოს მშენებლობაზე, ის იყო სასწრაფოდ გასაკეთებელი _ ხილის გადამამუშავებელ საწარმოზეა საუბარი", _ ამბობს ბადრი ჯაველიძე.
კომპანია "კახური ტრადიციული მეღვინეობის" (KTW) დამფუძნებელი ზურაბ ჩხაიძე "გურია ნიუსთან" შეჩერებულ პროექტთან დაკავშირებით საუბრობს: "მშენებლობა გარკვეული პერიოდით გაჩერებული იყო. შიდა მოწყობისა, დიზაინის და ქარხნის გაფართოებისთვის დრო დაგვჭირდა. ჩვენი სამშენებლო ჯგუფი ჯერ ქედაში გადავიდა, მერე ჩოხატაურში, შემდეგ აღმოსავლეთ საქართველოში და იქ დავასრულეთ პროექტები. ჯერ მაინც არ არის რეგიონი მზად, რომ ამ ქარხანამ იმუშაოს. სასწრაფო და საჩქარო არაფერი გვაქვს, თუმცა, მშენებლობა დასრულებულია. ახლა დარჩა მშენებლობის შეფუთვა, ინტერიერის და ექსტერიერის დასრულება. ჩვენ ამას ვეძახით მოპირკეთებას. გარდა ამისა, მოლაპარაკება მქონდა ადგილობრივ მთავრობასთან, რომ მომხდარიყო გზის მოასფალტება ჩვენს სოფელში. ვინაიდან ამ პროექტის დასრულებისას თუ ჩვენ ასფალტირებული გზა არ გვექნა, თუ ინფრასტრუქტურა არ მოწესრიგდა ასკანაში, თუ არ მიეცა საშუალება ადგილობრივ და ჩამოსულ ტურისტს, კომფორტულად იგრძნოს თავი, რა თქმა უნდა, ცოტა გაუჭირდება ამ პროექტს. ეს ერთობლივი ძალებით უნდა მოხდეს. აქედან გამომდინარე, სუბიექტური და ობიექტური მიზეზების გამო, ორი თვე შეჩერებული იყო მშენებლობა. ვერ ვიტყვი, რომ სოფელი მკვდარია _ ამ ობიექტზე ძალიან ბევრი ადგილობრივი მუშაობდა. ეს მშენებლობა გაგრძელდება და ისევ ისინი დასაქმდებიან. წყლის პროექტის გახორციელებაში დიდი შრომა გასწია, როგორც წინა გამგებელმა, ასევე, ახალმა გამგებელმა. მგონი, წყალთან დაკავშირებით პრობლემები აღარ უნდა იყოს", _ ამბობს ზურაბ ჩხაიძე.
