IDFI-ს (ინფორმაციის თავისუფლების განვითარების ინსტიტუტი) 2015 წლის მონაცემებით, ყველაზე დახურულ საჯარო დაწერებულებად საქართველოს ეკონომიკისა და მდგრადი განვითარების სამინისტრო დასახელდა, რომელმაც საჯარო ინფორმაციაზე 44 მოთხოვნა უპასუხოდ დატოვა.
IDFI აცხადებს, რომ საქართველოს 286 ადმინისტრაციულ ორგანოს შორის 2015 წელს 8 დაწესებულება აღმოჩნდა ისეთი, ვინც სრულად უგულებელყო მათზე კანონით დაკისრებული ვალდებულება და უპასუხოდ დატოვა ინსტიტუტის ყველა განცხადება საჯარო ინფორმაციის მითებასთან დაკავშირებით. კერძოდ, IDFI-ს მიერ გაგზავნილი ყველა მოთხოვნა უპასუხოდ დატოვეს იუსტიციის სამინისტროს დაქვემდებარებულმა 7-მა უწყებამ და წალკის საკრებულომ.
ეს 8 უწყება ინსტიტუტმა ყველაზე არაანგარიშვალდებულ დაწესებულებებად დაასახელა. მათ არცერთ მოთხოვნაზე არ გაუციათ პასუხი.
ესენია: სახელმწიფო სერვისების განვითარების სააგენტო (37 მოთხოვნა), სმართ ლოჯიქი (37 მოთხოვნა), საკანონმდებლო მაცნე (35 მოთხოვნა), დანაშაულის პრევენციის ცენტრი (28 მოთხოვნა), იუსტიციის სასწავლო ცენტრი (28 მოთხოვნა), საქართველოს ეროვნული არქივი (28 მოთხოვნა), ნოტარიუსთა პალატა (28 მოთხოვნა), წალკის საკრებულო (26 ნოთხოვნა).
ასევე, IDFI-ს მონაცემებით, 2014-თან შედარებით, 2015 წელს მნიშვნელოვნად გააუარესეს ინფორმაციის ხელმისაწვდომობის მაჩვენებლები შემდეგმა უწყებებმა: იუსტიციის სამინისტრო – 45.9% რეგრესი; ეკონომიკის სამინისტრო – 50.2% რეგრესი; მთავრობის ადმინისტრაცია – 74,8% რეგრესი.
2010-2015 წლების მონაცემებით ყველაზე ანგარიშვალდებულ საჯარო დაწესებულებებად დასახელდნენ: საქართველოს სახალხო დამცველის აპარატი დმანისის მუნჯვიპალიტეტის გამგეობა.
რაც შეეხება 2015 წელს, სპეციალური ჯილდოებით (სიგელებით) "2015 წელს საჯარო ინფორმაციის ხელმისაწვდომობის უზრუნველყოფისთვის" დაჯილდოვდნენ: რეგიონული განვითარების სამინისტრო; სპორტისა და ახალგაზრდობის სამინისტრო; ოკუპირებული ტერიტორიებიდან იძულებით გადაადგილებულთა, განსახლებუსა და ლტოლვილთა სამინისტრო; აჭარის ა/რ მთავრობის აპარატი და ყველა სამინისტრო.
პროექტის ფარგლებში საჯარო ინფორმაციის ხელმისაწვდომობის 100%-იანი მაჩვენებელი 57-მა საჯარო დაწესებულებამ აჩვენა.
საჯარო ინფორმაციის ხელმისაწვდომობის უზრუნველყოფის გაუმჯობესებისთვის ნომინაციაში გაიმარჯვა ენერგეტიკისა და წყალმომარაგების მარეგულირებელმა კომისიამ (61.1%-იანი გაუმჯობესება წინა წელთან შედარებით)
საჯარო ინფორმაციის პროაქტიული ხელმისაწვდომობის უზრუნველყოფისთვის დაჯილდოვდნენ ეროვნული უშიშროების საბჭოს აპარატი და სახელმწიფო აუდიტის სამსახური.
კვლევის პრეზენტაციის დაწყებამდე IDFI-ის დირექტორმა გიორგი კლდიაშვილმა განაცხადა, რომ შარშანდელთან შედარებით ვითარება გაუმჯობესებულია, მაგრამ პრობლემა კვლავაც რჩება.
"მომავალშიც გავაგრძელებთ მუშაობას. სასჯელაღსრულების სამინისტრომ წელს სრულად მოგვცა ინფორმაცია, რომელიც ძირითადად დეპარტამენტს ეხებოდა. ამ საკითხთან დაკავშირებით ჩვენ შევხვდით ბატონ კახი კახიშვილს და დეპარტამენტი სრულად გვაძლევს ინფორმაციას. რაც შეეხება შინაგან საქმეთა სამინისტროს, აღნიშნული უწყება შარშან დასახელებული იყო როგორც ყველაზე გაუმჭვირვალე საჯარო დაწესებულება შარშან, მაგრამ წელს აქვთ გაუმჯობესება. უზენაეს სასამართლოში გვაქვს ახლა დავა სამინისტროს მაღალი თანამდებობის პირების პრემიებთან და დანამატებთან დაკავშირებით, მაგრამ სხვა ინფორმაციებს ვერ ვიღებთ. გაუარესება საგრძნობია ეკონომიკისა და მდგრადი განვითარების სამინისტროში, რომელიც სახელდება, როგორც ყველაზე გაუმჭვირვალე დაწესებულება, გაუარესება არის იუსტიციის სამინისტროსა და მთავრობის ადმინისტრაციაში, რომელიც შარშან დაჯილდოვდა, როგორც ყველაზე გამჭვირვალე უწყება. სამწუხაროდ, ადმინისტრაციას ამ თვალსაზირისით პრობლემები აქვს", _ განაცხადა კლდიაშვილმა.
