2012 წლის 29 მარტს, 11:00 საათზე, “საქართველოს ახალგაზრდა იურისტთა ასოციაციამ” ბოლნისის მე-3 საჯარო სკოლის მასწავლებლის, თამარ ასპანიძის, სავარაუდო პოლიტიკური ნიშნით სამსახურიდან გათავისუფლების ფაქტთან დაკავშირებით, პრესკონფერენცია გამართა.
ბოლნისის მე-3 საჯარო სკოლის პედაგოგმა, თამარ ასპანიძემ საქართველოს ახალგაზრდა იურისტთა ასოციაციას მიმართა და განაცხადა, რომ იგი სამსახურიდან პოლიტიკური შეხედულებების გამო გაათავისუფლეს. კერძოდ, მისი გათავისუფლება, მისი შვილის, დავით ასპანიძის პოლიტიკურ საქმიანობას უკავშირდება. დავით ასპანიძე რესპუბლიკური პარტიის ბოლნისის ორგანიზაციის თავმჯდომარეა.
ასპანიძის განცხადებით, სამსახურიდან გათავისუფლებამდე რამდენიმე დღით ადრე, სკოლის დირექტორმა, მას სამსახურიდან წასვლის შესახებ განცხადების დაწერა სთხოვა. წინააღმდეგ შემთხვევაში იგი იძულებული გახდებოდა ან ასპანიძის სამსახურიდან გათავისუფლების მიზეზი მოეძებნა ან თავად დაეტოვებინა დაკავებული თანამდებობა.
როგორც “საიას” მიერ გავრცელებულ განცხადებაშია ნათქვამი, დირექტორის თქმით ასპანიძის, როგორც პედაგოგის მიმართ, არანაირი პრეტენზია არ არსებობდა, თუმცა ის იძულებული იყო ბოლნისის საგანმანათლებლო რესურს-ცენტრიდან მიღებული მითითება შეესრულებინა. ბოლნისის რესურს-ცენტრის ხელმძღვანელმა, თამარ ასპანიძესთან საუბარში არ უარყო პედაგოგის გათავისუფლების სურვილი და აღნიშნა, რომ მისი გათავისუფლების მიზეზი, ქალბატონი თამარის “ქართული ოცნების” ოფისთან არა ერთხელ “დაფიქსირება” გახდა .
თამარ ასპანიძე სამსახურიდან 2012 წლის 26 მარტს, დასაქმებულის მიერ ხელშეკრულებით გათვალისწინებული პირობების დარღვევის გამო გაათავისუფლეს. იგი ბოლნისის მე-3 საჯარო სკოლის პედაგოგად 20 წლის განმავლობაში მუშაობდა.
პრესკონფერენციისას აღინიშნა, რომ ეს არ არის პირველი შემთხვევა, როდესაც საქართველოს ახალგაზრდა იურისტთა ასოციაციას მიმართავენ პედაგოგები, რომლებიც მიიჩნევენ, რომ მათი სამსახურიდან გათავისუფლების საბაბი მათი ან მათი ოჯახის წევრთა პოლიტიკური შეხედულებებია. უკანასკნელ პერიოდში ასეთი მომართვების რიცხვმა განსაკუთრებულად იმატა. დღეისათვის საქართველოს ახალგაზრდა იურისტთა ასოციაციის რეგიონული ოფისები 10 ასეთი პედაგოგის ინტერესებს იცავენ.
საქართველოს სისხლის სამართლის კოდექსის 156-ე მუხლის მიხედვით ადამიანის დევნა მისი პოლიტიკური მოღვაწეობის ან შეხედულებების გამო, წარმოადგენს სისხლის სამართლის დანაშაულს.
“მიგვაჩნია, რომ სამართალდამცავმა ორგანოებმა დაუყოვნებლივ უნდა გამოიძიონ მოცემული ფაქტები და სისხლის სამართლის დანაშაულის ნიშნების გამოკვეთის შემთხვევაში დასვან შესაბამისი პირების პასუხისგებაში მიცემის საკითხი”, _ ნათქვამია განცხადებაში.
