შინაგან საქმეთა მინისტრის პირველი მოადგილემ, ეკა ზღულაძემ, პარლამენტში, სამთავრობო საათზე გამოსვლისას, საკმაოდ დიდი დრო დაუთმო ხაშურის პოლიციის შენობაში გარდაცვლილი ქიმერიძის საქმეზე საუბარს. ზღულაძის განცხადებით, ამასთან დაკავშირებით შინაგან საქმეთა სამინისტრომ საკმაოდ მყისიერი რეაგირება მოახდინა და შემდეგი სახის ღონისძიებები განახორციელა: თანამდებობიდან გაათავისუფლა ხაშურის პოლიციის უფროსი და ყველა პოლიციელს აუკრძალა გარდაცვლილის ოჯახში მისვლა, რათა, ზღულაძის განმარტებით, ეს არ ჩაეთვალათ ოჯახზე ზეწოლად. მისივე განცხადებით ამ უბედურ შემთხვევასთან დაკავშირებით შსს ძალიან კარგად აცნობიერებს თავის მორალურ პასუხისმგებლობას.
ამ საკითხზე საუბრის შემდეგ, ზღულაძემ ისაუბრა პოლიციელებისადმი დაკისრებულ პასუხისმგებლობებზე. მინისტრის პირველი მოადგილის თქმით, შინაგან საქმეთა სამინისტრომ 1093 პოლიციელს სხვადასხვა სახის პასუხისმგებლობები დააკისრა:
_ ამ პასუხისმგებლობების დაკისრება მოხდა იმ მონიტორინგის სისტემის მიხედვით, რომელიც სამართალდამცავ სტრუქტურებში არსებობს, _ აღნიშნა ზღულაძემ და დასძინა, რომ პოლიციელებს ეს პასუხისმგებლობა არასამთავრობო ორგანიზაციების, მედიისა და მოქალაქეების მხრიდან შესული განცხადებების საფუძველზე დაეკისრათ.
თუმცა, ბოლო წლების განმავლობაში მედიის მიერ შეტანილ განცხადებებზე რეაგირების ფაქტი ჟურნალისტებს არ ახსენდებათ. ყოველ შემთხვევაში, “გურია ნიუსის” ჟურნალისტების მიერ, სხვადასხვა დროს, სხვადასხვა კონკრეტულ ფაქტებზე შეტანილი განცხადებებს რეაგირება არ მოჰყოლია _ დღემდე უცნობია, ვინ ჩაამტვრია “გურია ნიუსის” ჩოხატაურის ოფისის ფანჯარა და რა შედეგი დადო ამ ფაქტზე გამოძიებამ. ცნობილია მხოლოდ ის, რომ მიუხედავად ვიდეო თუ ფოტო კადრების, მოწმეების არსებობისა, რამდენიმე შემთხვევაზე პოლიციამ საქმეც კი არ აღძრა, მათ შორის, ჩოხატაურის პოლიციის აწ უკვე ყოფილი პოლიციის უფროსის, ავთო ვასაძის შვილის, ტატო ვასაძის მიერ ჟურნალისტის ცემის ფაქტზე _ ამ შემთხვევის შემდეგ, ვასაძე, რომლის მიერ ჟურნალისტის ცემის ფაქტს რამდენიმე მოწმე და ფოტო ადასტურებდა, არათუ დასაჯეს, არამედ დააწინაურეს და გურიაში სოდ-ის უფროსად დანიშნეს.
