ლანჩხუთის ხელისუფლება, ოპოზიციისგან განსხვავებით, აქტიურ წინასაარჩევნო რეჟიმში იმყოფება და ყოველდღიურად ხვდება მოსახლეობას. გამგეობისა და საკრებულოს ჯგუფებს განაწილებული ჰქონდათ ლანჩხუთის მუნიციპალიტეტის სოფლები და შეხვედრებს ერთმანეთისგან დამოუკიდებლად მართავდნენ.
27 მარტს, ცუდი ამინდის მიუხედავად, საკრებულოს თავმჯდომარის რევაზ ჩიტიძისა და მისი ჯგუფის შეხვედრა სოფელ აცანის მოსახლეობასთან მაინც შედგა (აცანაში შეხვედრის პარალელურად, მთავრობის წარმომადგენლები მამათელ მოსახლეობასაც ხვდებოდნენ), რითაც თითქმის დაასრულეს ამომრჩეველთან ურთიერთობის პირველი ეტაპი.
აცანა დიდი სოფელია, იგი რამდენიმე უბანს მოიცავს, მაგრამ შეხვედრაზე ხალხმრავლობა არ იგრძნობოდა, თუმცა, რევაზ ჩიტიძეს, მათთან საუბრისას, მადლობის გადახდა არ დავიწყებია იმის გამო, რომ აცანელები, ტრადიციულად, ყველა არჩევნებში მთავრობას უდგანან მხარში(?!).
შეხვედრაზე, ძირითადად, ხანდაზმულები აქტიურობდნენ, რადგან სოფლები ახალგაზრდებისგან თითქმის დაცლილია და აქ მცხოვრები პენსიონერები ათას გასაჭირს მარტო არიან შერჩენილები, სახელისუფლებო პარტიის მხარდაჭერის მიუხედავად.
საკრებულოს თავმჯდომარემ ახალი პროექტის შესახებ ისაუბრა: “მთავრობა წელს გეგმავს ოზურგეთი-ლანჩხუთის დამაკავშირებელი გზის კაპიტალურ რეაბილიტაციას. სწორედ ამ გზის ნაწილს შეადგენს აცანა-მამათის მონაკვეთი. სამუშაოები ზაფხულის დასაწყისიდან დაიწყება და წლის ბოლომდე ლანჩხუთის მაღალმთიანი სოფლების მოსახლეობას ასფალტირებული გზა ექნება”, _ ასეთია მთავრობის მორიგი დაპირება.
აცანელმა დალი წიტაიშვილმა ადგილობრივი კულტურის სახლის მძიმე მდგომარეობის შესახებ ისაუბრა. კომუნისტური ეპოქიდან შემორჩენილი კულტურის სახლები თითქმის განადგურებულია და მხოლოდ სუფსაში და აცანაშია შენარჩუნებული.
რევაზ ჩიტიძემ პირობა დადო, რომ კულტურის სახლს ნაწილობრივ შეაკეთებენ: _ სრული აღდგენისთვის თანხები არ გვეყოფა, _ განმარტა მან.
აცანისთვის მცირემიწიანობა დიდ პრობლემას წარმოადგენს. სოფელს საკუთარი სახნავ-სათესი ფართობები არ გააჩნია და ლანჩხუთის ყოფილი მეურნეობის მიწებით სარგებლობს. ამ ფართობებს “ლიფაშარა” ეწოდება და 12 კილომეტრითაა მოშორებული აცანას. ფართობების სიშორეს უგზოობაც ემატება და მოსავლის აღების შემდეგ მოსახლეობას უჭირს ამ მოსავლის დაბინავება. სწორედ ფართობებთან მისასვლელი გზის შეკეთებას ითხოვდა მოსახლეობის დიდი ნაწილი: _ იქ ტრანსპორტით შესვლა და მოსავლის გამოტანა თითქმის შეუძლებელი გახდაო, _ წუხდა ხალხი.
საკრებულოს თავმჯდომარემ თანაშემწეს ამ საკითხის ჩანიშვნა უბრძანა.
აცანა მეწყრულ ზონას მიეკუთვნება, ბევრი ოჯახი სტიქიით დაზარალებულთა სიაშია მოხვედრილი. მთავრობამ სწორად გათვალა და მათი დახმარება არჩევნებს დაამთხვია _ მადლიერთა რიცხვის გაზრდა საარჩევნოდ სულაც არ აწყენთ “ნაციონალებს”.
ყოველდღიურ საზრუნავთან ერთად, აქაურებს უმუშევრობა მძიმე ტვირთად აწევთ _ ლუკმა-პურის საშოვნელად ნახევარი სოფელი ქვეყნის გარეთაა გადახვეწილი. სოფელში არსებული ხის დამამუშავებელი საამქრო გაჩერებულია _ ხალხი მის ამუშავებასაც ითხოვდა. საკრებულოს თავმჯდომარემ განმარტა, რომ მსგავსი სახერხები ლიცენზიის გარეშე ვეღარ იმუშავებენ, ასეთმა საწარმოებმა რეგისტრაცია უნდა გაიარონ და ლიცენზია მოიპოვონ. მხოლოდ ამის შემდეგ ექნება მის მეპატრონეს სახერხის ამუშავების უფლება.
მთავრობამ კიდევ ერთი პირობა მისცა აცანელებს _ სოფელში გარემონტდება და აღდგება ამბულატორია, რაც სასიცოცხლოდ მნიშვნელოვანია რაიონული ცენტრიდან საკმაოდ მოშორებული სოფლისთვის.
რაც შეეხება წყალს, ამ საკითხზე დაპირებების გაცემისგან საკრებულოს თავმჯდომარემ თავი შეიკავა. ეტყობა, ხალხის მიერ არჩეულ საკრებულოს არ უნდა ყოველგვარ შესაძლებლობებს გადააბიჯოს და ამომრჩევლის თვალში სახელი გაუტყდეს.
