"არ გეგონოთ, რომ ეს ადვილი საქმეა, ჩემთვის მეკვლეობა დიდი პასუხისმგებლობაა. რამე რომ არ გაკეთდეს ისე, როგორც ქვეყნისთვის და ოჯახისთვის არის საჭირო, ყველა ჩემსკენ გამოიშვერს თითს – შენი ფეხების ბრალი არისო." _ ასე დაიწყო საუბარი "გურია ნიუსთან" საუბრის დროს 75 წლის მეკვლემ, გურამ ღლონტმა.
მისივე თქმით, ის ხშირად არის კალანდას მეკვლედ და ყოველთვის განსაკუთრებულად ემზადება ამ დღისთვის.
"პირველად არა ვარ მეკვლედ, მრავალჯერ მომიწია ეს სასიამოვნო რიტუალი შემესრულებინა. მეკვლე კალანდა დღეს, როდესაც შედიოდა ოჯახში თითოეულ წევრს უსურვებდა გამრავლებას, მშვიდობას, ბედნიერებას, ჯანმრთელობას, სიძლიერეს, ეკონომიურ გაძლიერებას და ქვეყნის აღმავლობას ყველასთან ერთად." _ გვითხრა გურამ ღლონტმა, რომელიც ანსამბლ "იადონის" წევრია.
თეატრალური წარმოდგენა შალვა რადიანის სახელობის ეთნოგრაფიულ მუზეუმში საღამოს 19:00 საათზე დაიწყო. გურულების მთავარმა მეკვლემ სტუმრები კარმიდამოში შეიპატიჟა და ყველა ის რიტუალი შეასრულდა, რომელიც ამ დღეს გურიაში ტრადიციადდა ქცეული.
გურიის გუბერნატორმა, გია სალუქვაძე, ოზურგეთის მუნიციპალიტეტის გამგებელმა, მერაბ ჭანუყვაძემ, ოზურგეთის მუნიციპალიტეტის საკრებულოს თავმჯდომარე, დავით დარჩიამ, ქალაქ ოზურგეთის მერმა, ბეგლარ სიორიძემ ადგილობრივი ხელისუფლების წარმომადგენლებთან ერთად თეატრალურ ღონისძიებაში მიიღეს მონაწილეობა.
თეატრალური წარმოდგენის შემდეგ ადგილობრივი ფოლკლორული და ქორეოგრაფიული ანსამბლები წარდგნენ ოზურგეთელების წინაშე, რის შემდეგ ანსამბლ "სნოს" კონცერტი გაიმართა.
ღონისძიების ორგანიზატორები იყვნენ ოზურგეთის მუნიციპალიტეტის გამგეობა, გამგეობის კულტურის, სპორტისა და ტურიზმის განვითარების სამსახური, ა(ა)ი.პ. "ოზურგეთის მუნიციპალიტეტის კულტურის, სპორტისა და ტურიზმის განვითარების ცენტრი" და ა(ა)ი.პ. "ოზურგეთის მუნიციპალიტეტის სამუზეუმო-საბიბლიოთეკო გაერთიანება."
