ლიანა ჩხაიძე ლანჩხუთის მუნიციპალიტეტის სოფელ ჭყონაგორაში ცხოვრობს. სამი სულისგან შემდგარი ოჯახი სოციალურად დაუცველია და მხოლოდ პატარა მიწური სახლი გააჩნიათ, რომელსაც ეზოში გამდინარე წყლებისგან საძირკველი გამოცლილი აქვს და ჭერიდანაც წყალი ჩამოდის.
"წლებია, ასეთ გაუსაძლის ყოფაში მიწევს ცხოვრება. ეზო ჩვენ არ გვაქვს და სახლი. მიწისქვეშა წყლებისგან მიწა ყველგან დამსკდარია, გავლა ჭირს. მე თავად უმძიმესი ოპერაცია მაქვს გადატანილი, მეუღლეც ავადმყოფია, რომ მოკვდეს, დასასვენებელი ადგილი არ მაქვს _ პატარა ქოხის ერთ ოთახში ვცხოვრობთ სამი სული ადამიანი.
რამდენი ხელისუფლება შეიცვალა, რამდენ ვინმეს მივმართე, თუმცა, არავინ ყურადღებას არ გვაქცევს. მოვლენ, სურათებს გადაიღებენ და წავლენ _ ამით მთავრდება ყველაფერი. მითხრან, რა ნახეს აქ მოსაწონი, ნუთუ შეიძლება ადამიანმა ასეთ პირობებში იცხოვროს?! ადრე დამპირდნენ, ქირით გადაგიყვანთო, საბუთებიც შემაგროვებინეს, თუმცა, მერე ყველა დოკუმენტი დამიკარგეს. კიდევ კარგი, რომ არ გადავედი ქირით, ცდილობენ, "შეგიქციონ" და მერე დაგტოვონ ისე. თუ მომხედავენ, დამეხმარებიან და სახლს შემიძენენ, ხომ კარგი, თუ არადა, ერთ დღეს დაგვემხობა ეს სახლი თავზე _ სახურავი ამას არ უვარგა და საძირკველი; მეწყრისგან ძირი ერთიანად გამოთხრილი აქვს. ახლა, თოვლი რომ იყო, სოფლის ახალგაზრდობა დამეხმარა და თოვლისგან გადამიწმინდა ეს მიწური.
სოციალურად დაუცველი ვარ, შეშის მოთხოვნით განცხადებაც დავწერე, მაგრამ ამ დრომდე არაფერია. ავადმყოფ ქალს თავი და ოჯახი დღიური მუშაობით გამაქვს _ ზოგს მიწას ვუბარავ, ზოგსაც სახლს ვულაგებ და სულ ესაა ჩემი ოჯახის შემოსავალი სოციალურ დახმარებასთან ერთად.
ერთადერთი, რასაც ვითხოვ, სახლია, არავინ არასოდეს არაფრით დამხმარებია. ესაა ცხოვრება და სიცოცხლე, ახალ წელს სახლში მჭადის ფქვილი რომ არ გექნება და ზეთი? ნახონ, რა პირობებში მიწევს ცხოვრება და გადაწყვიტონ, მეკუთვნის თუ არა დახმარება, ჩემზე გაჭირვებული არის ვინმე ამ სოფელში?!", _ ამბობს ჩვენთან საუბარში ლიანა ჩხაიძე.
ლიანა ჩხაიძის პრობლემასთან დაკავშირებით მუნიციპალიტეტის გამგეობის პრესსამსახურს დავუკავშირდით, საიდანაც შემდეგი შინაარსის პასუხი მივიღეთ: "ქალბატონს შევთავაზეთ ქირით უზრუნველყოფა და მან უარი განაცხადა. დევნილთა და განსახლების სამინისტროში მუნიციპალიტეტმა გადააგზავნა ინფორმაცია სახლის მდგომარეობის შესახებ. შესყიდვის პროცედურასთან დაკავშირებით სამინისტრო მიიღებს გადაწყვეტილებას და თავად დაუკავშირდება ბენეფიციარს. მუნიციპალიტეტის გამგეობა ქალბატონს დახმარებას უახლოეს დღეებში კიდევ ერთხელ გაუწევს".
