„ისლამური ხალიფატის“ რიგებში მებრძოლი ხვიჩა გობაძის გარდაცვალების ინფორმაციას სახელმწიფო უსაფრთხოების სამსახურში ადასტურებენ. უსაფრთხოების სამსახურში დამატებით დეტალებზე ჯერჯერობით არ საუბრობენ.
სოციალურ ქსელში ხვიჩა გობაძის მეუღლის, სალი ქათამაძის პროფილით გამოქვეყნებულ სტატუსებში წერია, რომ მისი მეუღლე ცოცხალი აღარ არის. სალი ქათამაძე წერს, რომ ხვიჩა გობაძეს სამოთხეში შეხვდება:
"საუკუნოდ მემახსოვრები და მეყვარები სულ ყველაზე მეტად! ჩემი ერთადერთი და ჩემი ყველაფერი შენ იყავი, ხარ და იქნები! დაველოდები იმ დღეს, როცა სამოთხეში შეგხვდები და გადაგეხვევი! ძალიააან ძალიაააან მიყვარხააარ მეც და ჩვენს პატარასაც. ტკივილს, რომელიც შენი წასვლით დამიტოვე, ვერავინ და ვერაფერი გამინელებს და სიყვარულს, რომელიც შენს მიმართ მაქვს ვერავინ შემიცვლის, ისევე წამოვიღებ ჩემს სიყვარულს შენთან, როგორც შენ წაიღე ჩემი…ინ შაა ალლაჰ სამოთხეში შევხვდებით ერთმანეთს, იქ სადაც ვიცი მელოდები! მიყვარხარ", – წერს სალი ქათამაძე.
ხვიჩა გობაძესთან ერთად სავარაუდოდ, კიდევ ერთი ადამიანია გარდაცვლილი. სალი ქათამაძე ხვიჩა გობაძისა და კიდევ ერთი მებრძოლის ფოტოს აქვეყნებს და წუხილს გამოთქვამს მისი გარდაცვალების გამო.
თანასოფლელების ინფორმაციით, ხვიჩა გობაძის ოჯახის ახლობლებს არ აქვთ ზუსტი ინფორმაცია მის გარდაცვალებასთან დაკავშირებით.
„დეიდამ და ბიძამ არაფერი იციან. ისინი ამბობენ, რომ მათ არ ჰქონდა ხვიჩასთან არც სატელეფონო და არც ფეისბუქკავშირები. იციან ის, რომ მისი (გობაძის) მეუღლისთვის, სალომე ქათამაძისთვის დაურეკია თუ მოუწერია ხვიჩას მეგობარს და უთქვამს – ფრონტის წინა ხაზზე დაიღუპაო. ახლა ბიძა და დეიდა ემზადებიან ბათუმში წასასვლელად“, – უთხრეს „ნეტგაზეთს“ სოფელ დიდაჭარაში, საიდანაც წარმოშობით არის ხვიჩა გობაძე.
Developed By Web Features 2025 © All rights reserved