სოციალურ ქსელში აქტიურად ვრცელდება ინფორმაცია, თითქოს სტრასბურგის სასამართლომ ევროპაში ჩვილთა ნათლობის აკრძალვა დააკანონა.
ცხადია, ეს ინფორმაცია სიმართლეს არ შეესაბამება!
ჩვენი საღვთისმეტყველო ცენტრის ერთ-ერთი წევრი – დეკანოზი თამაზ ლომიძე, რომელიც მიუნხენის წმ. ვახტანგ გორგასლის სახ. ეკლესიაში მსახურებს, საკუთარ Facebook გვერდზე აცხადებს:
“დღეს მორიგი ტყუილი გავრცელდა, თითქოს სტრასბურგის სასამართლოს გადაწყვეტილებით 2016 წლიდან ევროპაში ჩვილების ნათლობა იკრძალება. ვერცერთ სერიოზულ ევროპულ მედია-გამოცემაში, ვერც ვატიკანის და ვერც თვით სტრასბურგის სასამართლოს გვერდებზე ვერ იპოვით მსგავს ინფორმაციას.
მორიგი დეზინფორმაციაა ანტიევროპული განწყობის გასაღვივებლად!
P. S. ეს რომ ასე იყოს, ამის შესახებ პირველ რიგში ევროპაში მოქმედმა ეკლესიებმა უნდა ვიცოდეთ, მათ შორის ჩვენც. სხვათაშორის, ამ კვირაში ორი ჩვილი მოვნათლეთ უკვე.”
ჩვენ შევეცადეთ დაგვეზუსტებინა თუ საიდან იღებს სათავეს ეს დეზინფორმაცია.
როგორც გაირკვა, ჭორი ერთ-ერთ იტალიურ წყვილის კონფლიქტის გამო აღმოცენილა, სადაც დედა მისი შვილის ნათლობას აპროტესტებდა. მიუხედავად დედის წინააღმდეგობისა, მამამ შვილი მაინც მოანათლინა. დედამ სარჩელით ჯერ იტალიის სასამართლოს, ხოლო უარის შემდგომ ECHR – ს მიმართა (European Court Of Human Rights). იტალიის ერთ-ერთი ინტერნეტ გამოცემა დაუკავშირდა სასამართლოს და ოფიციალური ინფორმაცია გამოითხოვა. ECHR კატეგორიულად გამორიცხავს ჩვილთა ნათლობის აკრძალვის დაკანონებას. აღნიშნული საქმე კი ჯერაც გამოძიების მოლოდინშია.
არსებულ დეზინფორმაციას დიაკონი ანდრეი კურაევიც ეხმიანება. ის აღნიშნავს, რომ იტალიური ინტერნეტ გვერდების მიერ მსგავსი დეზინფორმაციის გავრცელება პირველი შემთხვევა არ არის.
ისინი კი, ვინც მხოლოდ სათაურს კითხულობენ და არ ინტერესდებიან არც შინაარსით და არც ინფორმაციის წყაროს წარმომავლობით, არ აკვირდებიან ისეთ დეტალებს როგორებიცაა ,მაგალითად, საიტის დასახელება giomale, რომელიც ცნობილი იტალიური ჟურნალის gionale – ს ცრუ ასლია. და არც ცრუ-სტატიის ავტორის – ჟურნალისტ Andrew McFarrell სახელია ცნობილი ვინმესთვის.
