მია 7 წლისაა. ყოველდღიურად სკოლაში 6 კილომდე ჩანთის ტარება უწევს. სკოლამდე მისასვლელად კი 12-15 წუთი სჭირდება. კვირაში რამდენიმე დღე მშობელს ან უფროს დას უწევს სკოლამდე მიაცილოს. თუმცა, ესეც გარკვეულ პრობლემას ქმნის. მშობლებს ხშირად არ სცალიათ და მიას სკოლამდე ჩანთის მიტანა თვითონ უწევს. როგორც ის ამბობს, ჩანთა მისთვის ძალიან მძიმეა.
სახელმძღვანელოების სიმძიმე მოზარდების ჯანმრთელობას გარკვეულწილად საფრთხეს უქმნის და ისეთი დაავადებების ერთ-ერთი გამომწვევი მიზეზია, როგორიცაა სქოლიოზი, გულსისხლძარღვთა დაავადებები და ასე შემდეგ, საუბრობენ პროფესიონალი ექიმები – ორთოპედები და პედიატრები.
თუმცა, მიუხედავად მცდელობისა, შეემცირებინათ სახელმძღვანელოების სიმძიმე, განათლებისა და მეცნიერების სამინისტროსთვის ჯერ კიდევ აქტუალურ საკითხად რჩება. წიგნების ნაწილი სიმსუბუქით და გამძლეობით გამორჩეულ სპეციალურ ქაღალდზე იბეჭდება, მაგრამ ეს შეღავათს მაინც ვერ იძლევა.
"გურია ნიუს-მა" გადაამოწმა თუ რამდენ კილოგრამს იწონის მოსწავლის ჩანთა ყოველდღიურად. აღმოჩნდა, რომ "ბუკის" გარეშე ჩანთა 4 კილოა, ხოლო მისი ჩათვლით 7-8კგ-ს აღწევს.
მე-2 კლასელი მოსწავლის მშობელი თამარ ჯარიაშვილი, რომელიც ექიმია ამბობს, რომ ბავშვის სასკოლო ჩანთის სიმძიმე აზიანებს მის ჯანმრთელობას და განათლების სამინისტროს სთხოვს ეს პრობლემა გადაჭრას.
"ეს საკითხი ყველა მშობლის პრობლემაა. ყოველდღიურად ბავშვის ჩანთა ისეთი მძიმეა, რომ შეუძლებელია ის მე-2 კლასელმა თავად ატაროს. პატარა მის ტარებას ფიზიკურად ვერ შეძლებს. ჩემი შვილი სულ 19 კილოა, როგორ შეიძლება მან 7 -8 კილო ჩანთა ატაროს?! როგორც ექიმმა, შემიძლია ვთქვა, რომ ასეთი მძიმე ჩანთის ტარება არაა სასურველი ბავშვებისთვის, მისი ხერხემალი ვერ გაუძლებს ასეთ დატვირთვას. ხშირია ტანადობის დარღვევა, სქოლიოზის სხვადასხვა ხარისხის განვითარება. სიმძიმის ტარება ასევე ხელს უშლის სიმაღლეში ზრდას. ჩემს გარშემო არიან ისეთი ბავშვები, რომელთაც მძიმე ჩანთის გამო ხერხემლის გამრუდება განუვითარდა. ცხადია , სასურველი იქნება, თუ განათლების სამინისტრო ამ პრობლემას გადაჭრის", _ აღნიშნა ჯარიაშვილმა.
ნათია შენგელია, მშობელი: ჩემი შვილი მე – 2 კლასელი გოგონაა. ყოველდღიურად მე დამყავს სკოლაში და მის ჩანთასაც თავად ვატარებ, რადგან ძნელია ბავშვმა ასეთი სიმძიმე თავად წაიღოს. კვირაში ერთი დღე ჩანთა შედარებით მსუბუქია, თუმცა დანარჩენ დღეებზე ამას ვერ ვიტყვი. წიგნებსა და რვეულებს ემატება "ბუკის " სიმძიმეც. ჩემი შვილის თანაკლასელების მშობლებიც ზუსტად ამ მდგომარეობაში არიან. ჩემი აზრით, განათლების სამინისტრომ რამე აუცილებლად უნდა იღონოს, რადგან ეს პრობლემა მასშტაბურია".
"გურია ნიუს-მა აღნიშნულ საკითხთან დაკავშირებით მოსწავლეები გამოკითხა, რომლებიც ამბობენ, რომ სასკოლო ჩანთების ტარება საკმაოდ უჭირთ.
მარიამ ტრიკიდი, მე-9 კლასის მოსწავლე: ჩემი ჩანთა დაახლოებით 5 კილოგრამამდე იწონის და მისი ტარება მიჭირს.
ბადრი მახარაძე, მე-10 კლასის მოსწავლე : ჩემი ჩანთა 4-5 კილოა, მე დიდად არ მაწუხებს ეს წონა, თუმცა სხვა ბავშვები ძალიან წუხდებიან, კლასში გაბერილი ჩანთებით ძლივს შემოდიან.
როგორც ცნობილია, სასკოლო სახელმძღვანელოებთან დაკავშირებით განათლების სამინისტროში გრიფირების სამმართველო მუშაობს. სახელმძღვანელო სკოლაში შეტანამდე შეფასებისა და გრიფის მინიჭების პირობებს უნდა აკმაყოფილებდეს. განათლების სამინისტროს მიერ დადგენილი სტანდარტის მიხედვით, სახელმძღვანელოს შეფასების სპეციალური კრიტერიუმებით, დარგის სპეციალისტები აფასებენ. თუმცა, სახელმძღვანელო მხოლოდ მისი შინაარსით და დიზაინით ფასდება – ის არ უნდა შეიცავდეს რაიმე დისკრიმინაციულ ელემენტს (ენა, ეროვნება, ეთნიკური და სოციალური კუთვნილება და სხვ.).
აღსანიშნავია ისიც, რომ ამავე შეფასების კრიტერიუმებში სახელმძღვანელოს წონის შესახებ არაფერია ნათქვამი. თუმცა, განათლებისა და მეცნიერების სამინისტროს მტკიცებით, წინა წლებთან შედარებით, სასკოლო სახელმძღვანელოები უკეთესი ტექნიკური მახასიათებლით გამოირჩევა.
"სასკოლო სახელმძღვანელოებში განსხვავება ის არის, რომ მოსწავლეები დავალებებს წაიგნებში აღარ ასრულებენ. ამისათვის, მათ ცალკე რვეულები ურიგდებათ. გასულ წლებთან შედარებით, გაუმჯობესებულია ქაღალდისა და საღებავის უვნებლობის ხარისხი. პირველი კლასის ყველა სახელმძღვანელო დაბეჭდილია თანამედროვე სპეციალურ საბეჭდ ქაღალდზე, რომელიც გამოირჩევა სიმსუბუქითა და გამძლეობით. შესაბამისად, მოსწავლისთვის ბევრად იოლია მისი მოხმარება და ნაკლებია ცვეთა", _ განუცხადეს "გურია ნიუსს" განათლებისა და მეცნიერების სამინისტროში.
განათლების სამინისტროს ინფორმაციით, პირველი კლასის სახელმძღვანელოები ჯერ კიდევ 2014-2015 სასწავლო წელს შემსუბუქდა, დაახლოებით, 30-40%-ით. ეს მოხდა ქაღალდის ხარისხით. ამასთანავე, გაიყო პირველი კლასის მათემატიკის სახელმძღვანელო ორ ნაწილად.
რაც შეეხება წიგნებზე გრიფის მიენიჭას, გრიფირება 2011 წელს, წინა ხელისუფლების დროს განხორციელდა. რის გამოც, მინიმუმ 5 წელი, განათლების და მეცნიერების სამინისტრო ვერაფერს შეცვლიდა.
"შესაბამისად, ახალი გრიფირება რომ გამოცხადდება, წიგნები შეიცვლება როგორც შინაარსობლივად, ასევე ტექნიკური პარამეტრებით, იქნება მაღალი ხარისხის. სავარაუდოდ კი, გრიფირება ამ სასწავლო წელს გამოცხადდება", _ აცხადებენ სამინისტროში.
