_ როგორ და რამდენ წყალს ვსვამთ ზამთარში? წყალზე უარი არ უნდა ვთქვათ ზამთრის პერიოდში. ამ დროს წყურვილი ნაკლებად გვაწუხებს. ეს კი ორგანიზმის დეჰიდრატაციას იწვევს და ხშირად ვერც ვხვდებით, რატომ ვართ დაბნეული, დაღლილი, მოთენთილი და გვეჩვენება, რომ თითქოს, გამოუძინებელიც ვართ.
_ უწყლობა განსაკუთრებით მოქმედებს ტვინის უჯრედებზე. ამიტომ, გვინდა თუ არა, წყალი ზამთარშიც აუცილებლად უნდა ვსვათ. უმჯობესია, ეს დილიდანვე დავიწყოთ. არ შეგიძლიათ წყლის ერთბაშად დალევა? არა უშავს, დაიდგით ჭიქა და შესვენებით, ყლუპებით დალიეთ. ორგანიზმში წყლის რაოდენობას ყავა, კომპოტი, ღვინო და სხვა სასმელიც შეგივსებთ, თუმცა, ეს იმას არ ნიშნავს, რომ წყალი საერთოდ ამოიღოთ რაციონიდან და სვათ ყავა ან ღვინო.
_ ზამთარში, იანვრის სადღესასწაულო დღეებისა და უხვსუფრიანი წვეულებების შემდეგ, როცა ხშირად გრძნობთ სიმძიმეს კუჭის არეში, სრულად უნდა შეცვალოთ კვების რეჟიმი. დილიდან მივირთვათ ხილი; გახეხილ ვაშლს დავუმატოთ ცოტა თაფლი და მივირთვათ უზმოზე. ვაშლთან ერთად რეკომენდირებულია მსხალი და ყურძენი. ბოლოს კი დააყოლეთ ერთი ჭიქა უშაქრო მაწონი.
_მსუბუქი სადილის შემდეგ, შეგიძლიათ მიირთვათ ვაშლი და ბანანი. არ დაგავიწყდეთ წყლის ყლუპები; ძილის წინ გახეხილ ვაშლს დაუმატეთ ცოტა თაფლი და მიირთვით; კუჭის სიმძიმის შეგრძნების მოსახსნელად ნუ გამოიყენებთ სოდას; ასევე, არ დაივიწყოთ ჩაი _ კარგი ჩაი დღის განმავლობაში დალიეთ ორჯერ. ის მოგიხსნით დაღლილობას; ამასთანავე, ძვლოვანი ქსოვილების გამაგრებას მუდამ უწყობს ხელს.
_ გაითვალისწინეთ კიდევ ერთი რჩევა _ ზედიზედ მსუყე მენიუს გამოყენების შემდეგ, კუჭის არეში სიმძიმის შეგრძნების მოხსნა შესაძლებელია, თუ მსუბუქ სადილებზე გადასვლისას, ჭამამდე 5-6 ცალ თხილის გულს მიირთმევთ _ ის ხსნის სტრესულ მდგომარეობას კუჭ-ნაწლავის არეში, დამამშვიდებლად მოქმედებს ტვინის უჯრედებზე. თხილში დიდი რაოდენობით არის მაგნეზია, რომელიც ადამიანს ამშვიდებს.
