"ინფორმაციის პროფესიულად გადაცემის იმაზე უკეთესი გზა, ვიდრე ბეჭდური მედიაა, ძნელად თუ მოიძებნება" _ წერს პარლამენტის ეროვნული ბიბლიოთეკის დირექტორი გიორგი კეკელიძე და საზოგადოებას უხსნის რატომ არის წიგნის კითხვა მნიშვნელოვანი:
" წარმოიდგინეთ, რომ ბიბლიოთეკა არჩევნებში მონაწილეობს. რთულია? ეცადეთ. ახლა, ისიც წარმოიდგინეთ, რომ წინაასარჩევნო სიტყვა აქვს, რომელიც შემდეგ ვიდეო-რგოლად გადაკეთდება და სახლში, სხვათაშორის ჩართულს, რაღაცის პარალელურად უსმენთ. დგას განპიროვნებული ბიბლიოთეკა ვითარცა ჰილარი კლინტონი ტრაფარეტებიანი ხალხით ზურგში და ისმის:
რატომ ბიბლიოთეკა? _ იმიტომ, რომ წიგნი უდრის განათლებას, განათლება უდრის უკეთესად ყოფნას, უფრო საინტერესო ყოფნას, უფრო თავდაჯერებულ ყოფნას.
ანუ, უდრის _ მეტ უნარს, მოხიბლოთ ვინმე, გქონდეთ მეტი ფული, ესაუბროთ ბევრ ადამიანს, მათ შორის სხვა ენებზე, ნახოთ მეტი ადგილი, აღმოაჩინოთ საქართველოც, მსოფლიოც, თქვენი მეზობელი, კაცი ჯაკარტაში, ქალი ბოლივიაში თუ საკუთარი თავი. ანუ უდრის ყველა აქამდე აღმოჩენილის გაგებას პლუს საკუთარი აღმოჩენები.
იმიტომ, რომ ინფორმაციის პროფესიულად გადაცემის იმაზე უკეთესი გზა, ვიდრე ბეჭდური მედიაა, ძნელად თუ მოიძებნება. ბიბლიოთეკა ამ მასალებს სრულად ინახავს – თქვენ შეგიძლიათ ნახოთ სიახლეები წარსულში, სიახლეები აწმყოში, რომ მერე უკეთ დაინახოთ მომავლის სიახლეები.
იმიტომ, რომ წიგნი, ელექტრონული თუ ბეჭდური, არის სამიოდ საათში მთელი ცხოვრების გავლის უნიკალური შანსი. ყველა შეცდომის და თუ გამართლების, სიყვარულის, შურის, ღიმილის და ცრემლების გამოცდის შანსი.
მეტიც, სიკვდილის განცდის შანსი. ასეთი რამ სხვაგან ვერ მოხდება. იცხოვრე სხვისი ცხოვრებით მცირე ხნით, რომ მისი შეცდომების გათვალისწინებით, მერე საკუთარი ცხოვრებით დიდხანს იცხოვრო.
იმიტომ რომ განათლება უდრის შენში არსებული მთავარი მოცემულობის _ თავისუფლების გაღვიძებას. თავისუფლება ადამიანად ყოფნის უმთავრესი ნიშანია! _ წერს კეკელიძე.
