“ეკოლოგიური სამართლის ცენტრის” ინფორმაციით, საქართველოს ხელისუფლების დაუფიქრებელი და გაუწონასწორებელი გადაწყვეტილების შედეგად, მსოფლიო დონის კურორტ ბახმაროს, რომელიც შავი ზღვის დონიდან 2250 მეტრზე მდებარეობს, სერიოზული საფრთხე ემუქრება. არასამთავრობო ორგანიზაციები ბახმაროს გადასარჩენად ერთიანდებიან.
როგორც “ეკოლოგიური სამართლის ცენტრის” მიერ გავრცელებულ განცხადებაშია ნათქვამი, მდინარე ბახვისწყლის ხეობაში, სადაც უშუალოდ კურორტი ბახმარო მდებარეობს, ხუთი კასკადური ჰესი შენდება.
“ეკოლოგიური სამართლის ცენტრის” იურისტის, ნიკოლოზ მჟავანაძისა და “საქართველოს მწვანეთა მოძრაობა _ “დედამიწის მეგობრები საქართველოს” ექსპერტის, მარინე ჟორდანიას თქმით, აღნიშნული ჰესების მშენებლობა შეცვლის ხეობაში არსებულ კლიმატს, რაც ბახმაროს, როგორც კურორტის, ფუნქციის დაკარგვას გამოიწვევს. ჰესების მშენებლობისას უნდა გაიჩეხოს 10 ჰექტარზე მეტი ტყის მასივი, რისი სავარაუდო ზარალის ეკონომიკური გაანგარიშებაც არ გახორციელებულა.
მათივე განმარტებით, ჰესების მშენებლობის შედეგად განადგურდება ბიომრავალფეროვნება _ ფლორისა და ფაუნის იშვიათი და ენდემური სახეობები, რომელთა უმრავლესობაც წითელ ნუსხაშია შეტანილი. მაგალითად: პონტოს მუხა, აღმოსავლური ნაძვის კორომები, თეთრყვავილასა და ყოჩივარდას სახეობები და სხვა.
“ბახვი-1”-ის მშენებლობისას, ბახმაროს თავზე, კეთდება 80 მეტრი სიმაღლის კაშხალი, ხოლო 500 მეტრ სიმაღლეზე დაიდგმება ჰესი. ეს იქნება ყველაზე მაღალი დაწნევის ჰესი საქართველოში. ხელოვნური ტბის სიგრძე კი 3 კილომეტრი იქნება. კასკადური ჰესებისა და მაღალი კაშხლების მშენებლობა საფრთხეს უქმნის იქთიოფაუნის განვითარების ციკლს. აგრეთვე, გაქრობა ელის მტკნარ წყლებს, რომელიც აღნიშნულ ტერიტორიაზე გადის.
“ხუთივე ჰესის საერთო სიმძლავრე 57 მეგავატი იქნება, რომელიც შემდგომ 110 კვტ-იანი ხაზით თურქეთში გადავა. აღნიშნული პროექტის გახორციელებისას, ყველაზე საგანგაშო ის არის, რომ ამ ჰესების მშენებლობა არა საქართველოს, არამედ თურქული მხარის ინტერესებს გამოხატავს, ვინაიდან ჰესები თურქულ კომპანიას გადაეცა მუდმივ მფლობელობაში და დაბალ ფასად ენერგიაც სწორედ თურქეთში გავა. ხოლო საქართველოს მოსახლეობა ენერგიაში იგივე ტარიფს გადაიხდის, რასაც ახლა იხდის”, _ აღნიშნეს ექსპერტებმა.
გასულ სამშაბათს, კოალიცია “ქართული ოცნების” ოზურგეთის ერთ-ერთმა წევრმა, მუნიციპალიტეტის საკრებულოს დეპუტატმა, თემურ სალუქვაძემ სწორედ აღნიშნული ჰესების მშენებლობის გამო ბრიფინგი გამართა. მისი თქმით, ჰესების მშენებლობას დიდი ეკონომიკური მოგება მოაქვს სახელმწიფოსთვის, მაგრამ ყოველთვის დგას საკითხი, დადებითთან ერთად, თუ რა უარყოფითი შედეგი შეიძლება მოიტანოს ბუნებაზე აქტიურმა ზემოქმედებამ: _ ჰესების მშენებლობა მოითხოვს ინერტულ მასალებს. როგორც იცით, უკვე საკმაოდ ბევრი ინერტული მასალის ამოღება მოხდა მდინარე ნატანებიდან, რაც, თავისთავად ბუნებაზე ზემოქმედებაა. ეკონომიკური მიზანშეწონილობის თვალსაზრისითაც კი, როგორც ამას ექსპერტები ამბობენ, ნაკლებად ეფექტურია ის ჩვენთვის, რადგან ჰესების მშენებლობა არა საქართველოს, არამედ თურქული მხარის ინტერესებს გამოხატავს, ვინაიდან ჰესები თურქულ კომპანიას გადაეცა მუდმივ მფლობელობაში და დაბალ ფასად ენერგიაც სწორედ იქ გავა. ხოლო საქართველოს მოსახლეობისთვის ტარიფი იგივე დარჩება.
საკითხი სერიოზულ შესწავლას მოითხოვს. რეგიონული თუ მუნიციპალიტეტის ხელისუფლება ვალდებულია, გამოთქვას არგუმენტირებული პოზიცია ამ საკითხთან დაკავშირებით. ვფიქრობთ, რომ მათ უნდა ჩართონ სხვადასხვა დარგის უმაღლესი დონის სპეციალისტები, საკითხი შესწავლილ იქნას მრავალმხრივ, საფუძვლიანად და საზოგადოებას ამცნონ დეტალური ინფორმაცია ამასთან დაკავშირებით. სხვა შემთხვევაში, მოსალოდნელ უარყოფით შედეგებზე პასუხისმგებლობას გაიზიარებს ყველა ხელმძღვანელი, მათ შორის, სამხარეო, ადგილობრივი თუ მიზნობრივი დარგების ხელმძღვანელთა ჩათვლით, _ თქვა ბრიფინგზე სალუქვაძემ.
ბახვისწყალზე ჰესების მშენებლობის მნიშვნელობაზე, 13 აპრილს ოზურგეთში მყოფმა საქართველოს პრეზიდენტმა მიხეილ სააკაშვილმა ისაუბრა.
პრეზიდენტის განცხადებით, ჰესების მშენებლობა უახლოეს დროში იწყება და მშენებლობაზე ძალიან ბევრი ადამიანი დასაქმდება: “მართლაც აქ იწყება უახლოეს კვირეებში და თვეებში ბახვის ჰესების და რამდენიმე ჰიდროელექტროსადგურის მშენებლობა და ყველა კვალიფიციური ადამიანი დაგვჭირდება, როგორც ენერგეტიკოსები, ასევე, მშენებლები, მძღოლები, ყველა ადამიანი”, _ თქვა ქვეყნის პირველმა პირმა ოზურგეთის იუსტიციის სახლის გახსნისას.
“გურია ნიუსი” შეეცადა, სსიპ ბუნებრივი რესურსების სააგენტოს გურიის სამსახურის ტყის მართვის სამმართველოს უფროსს, ბესიკ ქარჩავას დაკავშირებოდა, თუმცა, მან ჩვენს სატელეფონო ზარებს არ უპასუხა.
გურიის გუბერნატორის მოადგილე, ლელა თავართქილაძე ამბობს, რომ მას, პირადად, ამ საფრთხეებთან დაკავშირებით, კვალიფიციური დასკვნები არ უნახავს და შესაბამისად, კომენტარს ვერ გააკეთებს.
გურიის გუბერნატორის კიდევ ერთი მოადგილის, ლაშა შაფაქიძისთვის, პროექტის შესახებ ინფორმაცია უცნობია, აქედან გამომდინარე, არც საფრთხეებზე სმენია რაიმე.
ოზურგეთის მუნიციპალიტეტის ინფრასტრუქტურის განვითარების სამსახურის უფროსი, მერაბ წივწივაძე ადასტურებს, რომ პროექტი შედგენილია და მისი ინფორმაციით, მშენებლობაც უახლოეს პერიოდში დაიწყება. თუმცა, ის ჯერ არ გაცნობია გარემოზე ზემოქმედების შეფასების ანგარიშს და არც სხვა დეტალებს იცნობს.
“ეკოლოგიური სამართლის ცენტრი” და “საქართველოს მწვანეთა მოძრაობა, დედამიწის მეგობრები საქართველო,” უახლოეს ხანში სატენდერო და ყველა სხვა დოკუმენტაციას გამოითხოვს ამ პროცესთან დაკავშირებით და ყველანაირ სამართლებრივ ბერკეტს გამოიყენებს, რათა არ მოხდეს ჰესების მშენებლობა საქართველოს უნიკალური ბუნების განადგურების ხარჯზე.
