ახლადდაფუძნებული პარტიის “ქართული ოცნება _ დემოკრატიული საქართველოს” თავმჯდომარის მანანა კობახიძის განცხადებით, “ოქტომბერში მთელი საქართველო ერთ მუშტად იქნება შეკრული და ქართულ ოცნებას აიხდენს”.
ამის შესახებ მანანა კობახიძემ გუშინ ივანიშვილის პარტიის სადამფუძნებლო ყრილობაზე განაცხადა და დელეგატებს ნდობისთვის მადლობა გამოუცხადა.
“ეს არის ძალიან რთული და საპასუხისმგებლო თანამდებობა. ჩვენ ყველანი, თქვენი თანადგომით, ბიძინა ივანიშვილთან ერთად, ქართულ ოცნებას ავიხდენთ და ოქტომბერში მთელ საქართველოს ერთ მუშტად შევკრავთ”, _ განაცხადა კობახიძემ.
“გურია ნიუსი” მანანა კობახიძეს დეტალურად ესაუბრა სამომავლო გეგმებზე. ჩვენ იმის გარკვევაც შევძელით, რა კრიტერიუმების გათვალისწინებით ანდო მას ბიძინა ივანიშვილმა ასეთი საპასუხისმგებლო თანამდებობა.
_ ქალბატონო მანანა, რამდენად მოულოდნელი იყო თქვენთვის ეს გადაწყვეტილება? საზოგადოება პარტიის თავმჯდომარედ ეკატერინე ხვედელიძეს ელოდებოდა.
_ ჩემთვის მოულოდნელი იყო ეს გადაწყვეტილება _ ნამდვილად არ განვიხილავდი ჩემს კანდიდატურას ამ თანამდებობაზე. მეც დარწმუნებული ვიყავი, რომ პარტიის თავმჯდომარე იქნებოდა ბიძინა ივანიშვილის ოჯახის წევრი _ ან მეუღლე, ან შვილი. თუმცა, ბოლო წუთს შეიცვალა გადაწყვეტილება.
_ ვინ მიიღო გადაწყვეტილება თქვენს კანდიდატურასთან დაკავშირებით?
_ თავად ბიძინა ივანიშვილის გადაწყვეტილება იყო _ იმ ეტაპამდე, ვიდრე მას კანონმდებლობით ექნება უფლება უხელმძღვანელოს პარტიას, მანამდე პარტიის ხელმძღვანელი ყოფილიყო საინიციატივო ჯგუფის რომელიმე წევრი. საინიციატივო ჯგუფში, მოგეხსენებათ, თავიდანვე ვარ. რა თქმა უნდა, ასეთ შემოთავაზებაზე უარს ნამდვილად ვერ ვეტყოდი. როცა დგები ადამიანის გვერდით ბრძოლაში, ბოლომდე უნდა იდგე და თუ მე აქ ვარ საჭირო, რა თქმა უნდა, მზად ვარ ეს ტვირთი ვიტვირთო. თუმცა, ისიც მესმის, რომ რთული და არის ძალიან საპასუხისმგებლო საქმეა. მაგრამ როცა პოლიტიკაში მიდიხარ, სირთულეებს არ უნდა შეუშინდე. ძალიან რთული არჩევნები გვაქვს მოსაგები და ქვეყანა გვყავს გამოსაყვანი იმ მდგომარეობიდან, რა მდგომარეობაშიც დღეს არის. როცა ებმები ამ ბრძოლაში, ყველაფრისთვის უნდა იყო მზად. მოულოდნელი იყო, მაგრამ ვერ ვიტყვი, რომ მზად არ ვიყავი.
_ როდესაც ადამიანს ასეთ საპასუხისმგებლო მისიას ანდობ, მას კარგად უნდა იცნობდე. რა კრიტერიუმებით შეგარჩიათ ბიძინა ივანიშვილმა?
_ ალბათ, ეს კრიტერიუმები თავიდანვე ჰქონდა განსაზღვრული, როდესაც გადაწყვიტა, ვყოფილიყავი ამ ჯგუფში. კრიტერიუმები ალბათ ის საქმეა, რასაც ვაკეთებდი. ადამიანის უფლებების დაცვა ახლადდაფუძნებული პარტიის ერთ-ერთი პრიორიტეტია, იმიტომ, რომ პოლიტიკა სწორედ ადამიანის უფლებების დაცვაზე უნდა იყოს ორიენტირებულ. შესაბამისად, ეს საკითხი წინა პლანზეა წამოწეული.
საკუთარ თავზე საუბარი ძალიან რთულია და არც ვთვლი ამას საჭიროდ. ჩემი საქმიანობა ადამიანის უფლებების დაცვის სფეროში და გარკვეული ავტორიტეტი, რომელიც მეტნაკლებად გამაჩნდა, ალბათ, მისაღები აღმოჩნდა ბატონი ბიძინასთვის. არ ვიცი, თვითონ, ალბათ, რაღაცნაირად გათვალა, პარტიის თავმჯდომარე ყოფილიყო ადამიანი, ვისაც თუნდაც დიდი წარსული პოლიტიკური არ აქვს, მაგრამ თავის საქმეში რაღაცა უკეთებია ისეთი, რომელიც საზოგადოების ნდობას იმსახურებს. ვინც აქ არის, ყველა ღირსეული ადამიანია და ყველა გაწვდებოდა ამ საქმეს. ყველას ძალიან დიდ პატივს ვცემ. ბატონი ბიძინას ეს გადაწყვეტილება ჩემთვის დიდი ნდობის გამოცხადებაა.
_ ნიშნავს თუ არა ასეთი გადაწყვეტილების მიღება იმას, რომ “ქართული ოცნება – დემოკრატიული საქართველოს” პრიორიტეტი არის ადამიანის უფლებები და დამოუკიდებელი სასამართლო?
_ აუცილებლად. ერთ-ერთი პრიორიტეტი არის დამოუკიდებელი და სამართლიანი სასამართლო. ადამიანის უფლებები იწყება სოციალური უფლებებიდან. დღეს ძალიან ბევრ ადამიანს აქვს სიღატაკის და შიმშილის პრობლემა. ადამიანები ჯანმრთელობის პრობლემების და უსახსრობის გამო არ უნდა იღუპებოდნენ. ეს არის სასიცოცხლოდ მნიშვნელოვანი პრობლემა, რომელიც პირველ რიგშია გამოკვეთილი. დღეს მატერიალურად შეჭირვებულ ადამიანებს ძნელია სასამართლოზე, გამოხატვის თავისუფლებაზე ელაპარაკო. ამიტომ პრიორიტეტად წამოწეულია ისეთი საკითხები, როგორიც არის დაუბეგრავი მინიმუმის შემოღება _ საარსებო მინიმუმის მქონე ხელფასის ადამიანს არ დაბეგრავენ 20%-ით. ეს გაცხადდა იმ დეკლარაციაში, რომელიც პარტიამ მიიღო.
პრიორიტეტია ისიც, რომ ყველა მოქალაქე უნდა იყოს დაზღვეული და არა ისე, როგორც დღეს ხელისუფლება აცხადებს ანუ არა შერჩევით.
რა თქმა უნდა, მნიშვნელოვანია სამართლიანი სასამართლო, პოლიციისა და პროკურატურის დეპოლიტიზაცია. იყო ხაზგასმა საპროცესო შეთანხმებების მახინჯ პრაქტიკაზე, პრობაციონერებზე, თანხების ამოღების მექანიზმზე ადამიანებისგან. მოსახლეობაში ეს ყველაზე დიდ პრობლემად აღიქმება.
დეკლარაციაში ძალიან კარგად არის შეფასებული და ჩამოყალიბებული, რა ვითარებაა ქვეყანაში და რას აპირებს პარტია ხელისუფლებაში მოსვლის შემთხვევაში. დანარჩენი უნდა დაიწეროს საარჩევნო პროგრამაში. რადგან კოალიციურად გამოვდივარ პარტიებთან ერთად, საარჩევნო პროგრამა იქნება ერთი. თუმცა, ჩვენ ვართ კოალიციის სრულუფლებიანი წევრები, ყველა პარტიას თავისი მიზნები და პრინციპები აქვს, რომელიც ამ შემთხვევაში თანხვედრაშია კოალიციის მიზნებთან.
_ მოწინააღმდეგე თუ ჰყავდა თქვენს კანდიდატურას?
_ ვფიქრობ, იქ ადამიანებს ნამდვილად ჰქონდათ საშუალება, დაეფიქსირებინათ თავიანთი პოზიცია მიუხედავად იმისა, რომ ღია კენჭისყრა იყო. ყველამ ერთხმად გადაწყვიტა, რომ ჩემი კანდიდატურა მათთვის მისაღებია _ არც ერთი წინააღმდეგი არ ყოფილა და ეს ჩემთვის უზარმაზარი პასუხისმგებლობაა. ნათქვამია: უფალი იმაზე მეტ ტვირთს არ მოგივლენს, რისი ზიდვაც არ შეგიძლიაო. ალბათ, უფლის ნება იყო, ამ ბრძოლაში ასეთი მასშტაბებით ჩავრთულიყავი. ღმერთი მომცემს ძალას, რომ მე ეს გავაკეთო.
_ არა გეშინიათ ზეწოლების?
_ იცით რა, ზეწოლას აქამდე შეეცდებოდნენ, ალბათ. როცა უკვე ასეთ პოზიციაზე ხარ, არ მგონია მათთვის ხელსაყრელი იყოს რამე ფორმით ზეწოლა ჩემზე, იმიტომ რომ, ძალიან სასაცილოა, პარტიის თავმჯდომარეზე ღიად ან ფარულად რაღაც დაიწყო. თუმცა, დღევანდელი ხელისუფლებისგან გამორიცხული არაფერია და ალბათ ყველაფერს უნდა ელოდე. მზად ვარ ამისთვისაც. კიდევ ერთხელ ვიმეორებ _ როცა ებმები ასეთ ბრძოლაში, ისეთი პრინციპებით უნდა იცხოვრო, რომ დაბრკოლებამ არ შეგაშინოს.
პარტიის სადამფუძნებლო ყრილობას 1109 კაცი ესწრებოდა. ეს რიცხვი კიდევ გაიზრდება და ჩვენ ვიქნებით ასიათასები.
