საფრანგეთის ციხეში მყოფი ქართველი კანონიერი ქურდი კახაბერ შუშანაშვილი ესპანური სასამრთლოს წინაშე წარსდგება. საფრანგეთის ხელისუფლებამ ის და მისი დაჯგუფების რამდენიმე წევრი უკვე გადასცა ესპანურ მხარეს.
ესპანური მედიის ცნობით, შუშანაშვილს სხვადასხვა დანაშაულისათვის, მათ შორის ფულის გათეთრებისათვის, მკვლელობისათვის, საბუთების გაყალბებისათვის, იარაღის უკანონო შენახვისა და კიდევ სხვა რამდენიმე დანაშაულისათვის ორი მილიონი ევრო ჯარიმა და 33 წლიანი პატიმრობა ემუქრება.
შუშანაშვილის ძმა ლაშა შუშანაშვილი 2013 წლიდან საბერძნეთის ციხეში იხდის სასჯელს. მასთან ერთად გაასამართლეს ძმების კონტროლირებადი დანაშაულებრივი დაჯგუფების 17 წევრიც, რომლებიც ძირითადად ეთნიკური ქართველები, რუსები და სომხები იყვნენ. სამართალდამცველების თქმით, სწორედ მაშინ გამოიკვეთა, რომ დაჯგუფება მადრიდიდან იმართებოდა და მას სათავეში კახაბერ შუშანაშვილი ედგა.
ესპანური პოლიციის ცნობით, დაჯგუფება საერთო ფონდიდან ფინანსდებოდა და მას ტრანსნაციონალური ხასიათი ჰქონდა. ამ დაჯგუფების არაერთი სხვა წევრი სამართალდამცველებმა ევროპის სხვადასხვა ქვეყნებში 2010 წელს დააკავეს.
ამ დროისათვის კახაბერ შუშანაშვილი ესპანეთის სოტო დე რეალის ციხეშია მოთავსებული და მისი გადაყვანა გაძლიერებული დაცვის თანხლებით მოხდა.