საქართველოს ყოფილმა პრემიერ-მინისტრმა ბიძინა ივანიშვილმა ტელეკომპანია GDS-ის მიერ მომზადებულ დოკუმენტურ ფილმში "ლილიოდენდრონი" ციხისძირში ასწლოვანი ხეების გადარგვის შესახებ ისაუბრა.
ივანიშვილი ამბობს, რომ ხე, რომლის გადარგვასაც აპირებე "ვერ გამოდგება დეკორატიულად ადგილზე და არავითარი ფასეულობა არ გააჩნია".
"მინუსიც შეიძლება ჰქონდეს, წაიქცეს და რკინიგზა დააზიანოს… მახსოვს, დეპუტატები მიცავდნენ, რას ერჩით ამ კაცს, საკონცერტო დარბაზს აშენებსო _ არა, არც ერთ შემთხვევაში. ის რაც კეთდება იქ, სხვა გაკეთებული საქმით არ უნდა გამართლდეს.
თვითონ ეს საქმე კონკრეტულად, არცერთ შეკითხვას არ იწვევს ჩემში. ეს თემა ხელოვნურად აწეულია "ნაციონალური მოძრაობის" მიერ. ეს არის ნორმა. ამაზე დიდი ხეები ჩილედან და ესპანეთიდან ჩამომაქვს ახლა. ტყიდან შეიძლება ხე გადაირგოს და გაიყიდოს, ეს არის ნორმა. საქართველოში იყო უპრეცედენტო და ამიტომ ბევრი განმარტების გაკეთება გვიწევს"_ განაცხადა ივანიშვილმა.
ფილმში ყოფილმა პრემიერმა სააკაშვილთან კარგი ურთოერთობის პერიოდიც გაიხსენა და აღნიშნა, რომ ყოფილ პრეზიდენტს ბოტანიკური ბაღის გასხვისება უნდოდა:
"სააკაშვილმა გახშირებულად დაიწყო რეკვა თბილისის ბოტანიკურ ბაღზე. მერე ბათუმიც მოაბა. ვერ გავიგე რა უნდოდა. მერე, რომ გამაწვალა და რამდენიმე ზეტმეტი ზარი გააკეთა მკვახედ ვკითხე, რა გინდა მეთქი. გასხვისება უნდოდა, ერთის თუ მეორის, ვერ გავიგე.
მე ვუთხარი, რომ ეს არის საერთო მოხმარების და არ შეიძლება ამაზე საუბარი. ბოლო-ბოლო რა გინდაო, ერთ-ერთი აირჩიეო, ერთი შენი იყოს, ერთი ჩვენიო. მე ვუთხარი, მაგას როგორ ვიკადრებ, ბოტანიკური ბაღი გავითავისო.
მერე მეორე კუთხიდან მიუდგა. ჩვენ გვინდა მაგის პრივატიზაცია და შენც თუ მიიღებ პრივატიზაციაში მონაწილეობასო. ვუთხარი, მე არ მივიღებ, მაგრამ შევხედავ, თუ უხეშად რაღაცას აკეთებთ, რომ მათ ფუნქცია დაკარგონ, ასეთ შემთხვევაში ვიყიდი, მაგრამ იმ წუთშივე სახელმწიფოს დავუბრუნებ საჩუქრად.
მეტი საუბარი მე არ მქონია. მერე, აჭარაში ამბობდნენ ჭორად, რომ მას უნდოდა რეზიდენციის აშენება, სახლების ჩადგმას აპირებდნენ და ა.შ. საკმაოდ დიდი გავლენა მქონდა მაშინ მთელ მთავრობასა და პარლამენტზე, დასამალი აღარ არის, ვეხმარებოდი და მგონია, რომ ეს პროცესი შევაჩერე" _ აღნიშნა ივანიშვილმა.
მისივე თქმით, ხეების გარდგვა მისი გატაცებაა, თუმცა "არც-ერთ შემთხვევაში თავს უფლებას არ მისცემს ამით ვინმე დააზიანოს":
"რაც შეეხება ამ ხეებს და ბუნებასთან დაკავშირებულ თემებს, როდესაც გაჭირვებულ ქვეყანაში ასეთ რაღაცეებს აკეთებ, მაინც ჩემი მხარდამჭერებისთვის და ხალხისთვის, ვისაც პატივს ვცემ და ვინც პატივს მცემს, განმარტებას გავაკეთებ, რომ მე ფუფუნებით არ ვცხოვრობ, ძვირფასეულობა, ჩასაცმელი ან სხვა რამ კომფორტი არ გამაჩნია ისეთი, რომ მომერიდოს.
მე მაქვს ეს გატაცება, მაგრამ არცერთ შემთხვევაში თავს უფლებას არ მივცემ, რომ ამით ვინმე დავაზიანო. ვისაც გააჩნია კითხვა, რომ შეიძლება გადაჭარბებული იყოს, ამდენ თანხას რომ ვხარჯავ ხეების გადატანასა, დარგვასა თუ ჩამოტანაზე, მე ვეთანხმები", _ თქვა ბიძინა ივანიშვილმა.
