ბუნებას უდიდესი ღირებულება აქვს, როგორც მატერიალური დოვლათის პირველწყაროს. საარსებოდ ადამიანი ბუნებიდან იღებს ყველაფერს. კაცობრიობის მომავალი იმაზეა დამოკიდებული, თუ რამდენად გონივრულად გამოვიყენებთ ბუნებრივ რესურსებს, რამდენად გონივრულად მოვიხმართ მის სიმდიდრეს, რამდენად გონივრულად მოვეფერებით და დავიცავთ ბუნებას.
დღევანდელ პირობებში, ტექნიკის, საწარმოო, საყოფაცხოვრებო და სამედიცინო ქიმიის მძლავრი განვითარების გამო, ყოველდღიურ ცხოვრებაში მასობრივადაა გამოყენებული ქიმიური საშუალებები, პესტიციდები და შხამქიმიკატები მცენარეთა მავნებლებისა და დაავადებების წინააღმდეგ საბრძოლველად, კოსმეტიკური საშუალებები, საღებავები, გამხსნელები, სარეცხი ფხვნილები, დანამატები, ესენციები და ხელოვნური კვების პროდუქტები, უამრავი ახალი სამკურნალო პრეპარატები, რომელთა გამოყენებასაც, დიდ სიკეთესთან ერთად, ზოგიერთ შემთხვევაში საკმაოდ სერიოზული უარყოფითი შედეგები ახლავს თან. ტექნიკის და სატრანსპორტო საშუალებების მძლავრი განვითარების გამო, ატმოსფერო მნიშვნელოვნად იწამლება და მასში ჟანგბადის რაოდენობა მცირდება. საკმარისია აღინიშნოს, რომ ოკეანეზე ამერიკიდან ევროპაში გადმოფრენისა და უკან დაბრუნებისას სამგზავრო რეაქტიული თვითმფრინავი ხარჯავს და ანადგურებს იმდენ ჟანგბადს, რამდენიც 1000 კაცს ეყოფოდა ოცი წლის განმავლობაში.
გარემოს დაბინძურებისა და გართულებული ეკოლოგიური პირობების გამო, ბუნებრივია, ადამიანის ორგანიზმში ბიოსფეროს ზემოქმედებით (სასმელი წყალი, საკვები, ჰაერი და სხვა) გარკვეული რაოდენობით ხვდება ტოქსიკური ნივთიერებები, რაც უარყოფით გავლენას ახდენს ჯანმრთელობაზე. ამიტომ დიდი მნიშვნელობა ენიჭება ორგანიზმის გაწმენდას, რაც უმეტეს შემთხვევებში ასოცირდება კუჭ-ნაწლავის და სხვა შინაგანი ორგანოებიდან “წიდების” (ტოქსინების) გამოდევნასთან _ მათი არსებობა ორგანიზმში იწვევს ადამიანის საერთო მდგომარეობის გაუარესებას. ამისთვის ყველაზე კარგია სამკურნალო მცენარეების და მათგან მიღებული ნაყენების გამოყენება, რაც ცნობილია უძველესი დროიდან და რეკომენდებულია ხალხურ მედიცინაში სხვადასხვა დაავადებების სამკურნალოდ და პროფილაქტიკისთვის.
ცნობილია ისიც, რომ სამკურნალო მედიკამენტების ერთი მესამედი მზადდება სამკურნალო მცენარეებისგან. ამასთან, მომხმარებელთა უმრავლესობა ჯერ კიდევ არ არის გაცნობიერებული სამკურნალო მცენარეების დიეტური და სამკურნალო თვისებების, მათი მომზადების და მოხმარების სწორი მეთოდების შესახებ. საგულისხმოა, ისიც, რომ სამკურნალო მცენარეები ბუნებრივი წარმოშობის ეკოლოგიურად სუფთა ნედლეულია და მათი გამოყენებით პრაქტიკულად გამორიცხულია ტოქსიკური მოქმედება და უარყოფითი გვერდითი ეფექტები.
ორგანიზმის გამწმენდი საშუალების ერთ-ერთი რეცეპტი, რომელიც ფართოდ არის ცნობილი ხალხურ მედიცინაში ასეთია: იღებენ ქვემოთ ჩამოთვლილ მასალებს შემდეგი რაოდენობით: 1. ოხრახუში _ 50 გრამი; 2. ნიახური _ 50 გრამი; პრასის ფოთოლი _ 6 ცალი; 4. ასკილის მშრალი ნაყოფი _ ნახევარი ჭიქა (იყიდება აფთიაქში); 5. სიმინდის ულვაშები (ფოჩები) _ პატარა პორცია; 6. ზაფრანის მშრალი ყვავილი (თავი) _ 4 ცალი; 7. ბუშმალის მშრალი ფოთოლი _ 3 ცალი; 8. სტაფილო _ 150 გრამი; 9. ბაბუაწვერას ფოთლები _ 3-5 ცალი. ეს უკანასკნელი აუცილებელი არაა.
ნარევის შემადგენელი კომპონენტების ფოთლოვანი მასა დაიჭრება დანით, საშუალო ზომის ნაწილაკებად, შემდეგ ყველა კომპონენტი თავსდება მომინანქრებულ ჭურჭელში, ემატება ერთი ლიტრი წყალი, იხარშება 15-20 წუთი თავდახურულ ჭურჭელში. გაცივების შემდეგ გაიფილტრება; მიღებული (ნახარში) ერთ ლიტრამდე, თავსდება ერთლიტრიან ბოთლში და ინახება მაცივარში. მიიღება დღეში 3-ჯერ, ჭამის წინ ნახევარი საათით ადრე, თითო ჯერზე _ 60-70 გრამი. იმის მიხედვით, თუ რა რაოდენობის ექსტრატის დამზადებაა ერთდროულად საჭირო, კომპონენტები შეიძლება აღებულ იქნას 2-ჯერ, 3-ჯერ და ა.შ. მეტი რაოდენობით და შესაბამისად, დაემატება გამოსახარში წყალი. მკურნალობის ვადა ერთი თვეა.
ადამიანი ამ ნახარშის მიღების პირველივე დღიდან იგრძნობს სიმსუბუქეს და კარგ განწყობილებას. პირადი პრაქტიკული გამოცდილებით შეიძლება ვთქვა, რომ იგი უებარი საშუალებაა ყველა თაობის ადამიანის შრომისუნარიანობის და საერთო მდგომარეობის გასაუმჯობესებლად.
ი. ჭოლაძე, პროფესორი, ღირსების ორდენის კავალერი, მებოსტენობა-მებაღეობის მოყვარული
